Den Bibel, Inhoudende dat Oude ende Nieuwe Testament (Biestkensbijbel)

¶ Dat .ix. Capittel.

¶ Hoe Iesus eenen mensche die blint gheboren was verlichte, ende sprack, ick ben in een oordeel ghecomen in deser werelt, op dat de blinde sien, ende de siende blint worden.

1

⁺ ENde Iesus ghinck voorby, ende sach eenen, die daer blint gheboren was.

+ A vers 1

2

Ende zijne Iongheren vraechden hem, ende spraken: Meester, wie heeft ghesondicht? Dese, oft zijn Ouders, dat hy blint gheboren is?

3

Iesus antwoorde: Daer en heeft noch dese gesondicht noch zijn Ouders,^* maer op dat de wercken Gods openbaer werden aen hem.

* Ioan. 11.a.4.

4

^† Ick moet wercken de wercken des gheens, die my ghesonden heeft, alsoo langhe alst dach is. De nacht coemt, wanneer niemant wercken en can.

† Ioan. 5.b.19.

5

Dewijle dat ick ben inder werelt,^‡ ben ick dat licht der werelt.

‡ Ioan. 1.a.9. 8.b.12. 12.e.46.

6

Doen hy sulcx gheseyt hadde, spooch hy op der Aerden, ende maecte een Slijc wt den speecsel, ende smeerde dat Slijck op des blinden ooghen,

7

Ende sprack tot hem: Gaet henen tot den Wijer^* Siloha (dat is verduytst, gheseynt) ende wascht v. Doen ghinck hy henen, wiesch hem, ende quam siende.

* Esa. 7.d.31.

8

De naghebueren, ende die hem te voren ghesien hadden, dat hy een bedelaer was, spraken: En is dese niet, die daer sat ende bedelde?

9

Sommighe spraken: Hy ist. Ende sommighe: Hy is hem gelijck. Hy seluer sprack: Ick bent.

10

Doen spraken sy tot hem: Hoe zijn dijne oogen opghedaen?

11

Hy antwoorde, ende sprack: De mensche die Iesus heet, maecte een Slijck, ende smeerde mijn oogen, ende sprack: Gaet henen tot den Wijer Siloha, ende wascht v. Ick ghinck henen, ende wiesch my, ende wert siende.

12

Doen spraken sy tot hem: Waer is die selue? Hy sprack: Ick en weets niet.

13

⁺ Doen leydden sy hem, die te voren blint was, tot den Phariseen.

+ B vers 13

14

(^* Ende het was Sabbath, doen Iesus dat Slijck maeckte, ende zijn ooghen opende.)

* Matt. 12.a.1. Mar. 2.c.23. Luce. 6.a.1. Ioan. 5.a.9. 7 b.23.

15

Doen vraechden sy hem wederom, oock de Phariseen, hoe hy ware siende gheworden? Ende hy sprack tot haer: Slijck leyde hy my op de ooghen, ende ick wiesch my, ende ben nv siende.

16

Doen spraken sommighe der Phariseen: Die mensche en is niet van Godt, dewijle dat hy den Sabbath niet en hout. Maer de andere spraken:^† Hoe can een sondich mensche sulcke Teeckenen doen?^* Ende daer werdt een tweedracht onder haer.

† Ioan. 3.a.2.

* Ioan. 7.a.12. 10.b.19.

17

Sy spraken weder tot den blinden: Wat segt ghy van hem, dat hy uwe ooghen opghedaen heeft?^† Hy sprack: Hy is een Propheet.

† Ioan. 4.c.19. 6.b.14. 7.d.40. Luce. 7.b.16. 24.b.18.

18

De Ioden en gheloofden niet van hem, dat hy blint gheweest, ende siende ware gheworden, tot dat sy de Ouders riepen, des gheens, die siende was gheworden, vraechden haer en spraken:

19

Is dat uwe soon, dien ghy segt hy sy blint gheboren? Hoe is hy dan nv siende?

20

Sijn Ouders antwoorden haer, ende spraken: Wy weten, dat dese onse soon is, ende dat hy blint gheboren is:

21

Maer hoe hy nv siende is, en weten wy niet, oft wie hem zijn oogen op heeft ghedaen, en weten wy oock niet. Hy is out ghenoech, vraghet hem, laet hem selue voor hem spreken.

22

⁺ Sulcx spraken zijne Ouders, want sy vreesden haer voor de Ioden.^* Want de Ioden hadden haer nv vereenicht, waert dat yemant hem voor Christum bekende, dat die selue inden Ban gedaen

+ C vers 22

* Ioan. 11.f.57. 12.f.42.

[p. 43r]

soude worden.

23

Daerom spraken zijn Ouders: Hy is out ghenoech, vraghet hem.

24

Doen riepen sy ten anderen mael, den mensche die blint gheweest was, ende spraken tot hem:^* Gheeft Gode de eere, wy weten, dat dese mensche een Sondaer is.

* Iosue. 7.c.19. Actor. 12.d.23.

25

Hy antwoorde, ende sprack: Is hy een Sondaer, dat en weet ic niet. Eenderley weet ick wel, dat ick blint was, ende ben nv siende.

26

Doen spraken sy weder tot hem: Wat dede hy v? Hoe dede hy uwe oogen op?

27

Hy antwoorde haer: Ick hebt v nv eensgancx gheseyt, en hebt ghijt niet gehoort? Wat wilt ghy noch eenmael hooren? Wilt ghy oock zijne Iongheren worden?

28

Doen vloeckten sy hem, ende spraken: Sijt ghy zijn Iongher, maer wy zijn Moses Iongheren.

29

Wy weten dat Godt met Mosi ghesproken heeft, maer dese en weten wy niet, van waer hy is.

30

⁺ De mensche antwoorde ende sprack tot haer: Dat is een wonderlijck dinck, dat ghy niet en weet, van waer hy sy, ende hy heeft mijn ooghen opghedaen.

+ D vers 30

31

^* Maer wy weten dat Godt de Sondaren niet en hoort, maer ist dat yemant Godt vreesende is, ende doet zijnen wille, dien hoort hy.

* Miche. 3.a.4

32

Vander werelt aen, en ist niet ghehoort, dat yemant eenen gheboren blinden, de ooghen opghedaen hebbe.

33

^† En waer dese niet van Godt, hy en condet niet doen.

† Ioan. 3.a.2.

34

Sy antwoorden ende spraken tot hem: Ghy zijt gansch in sonden gheboren, ende leert ons? Ende stieten hem wt.

35

Het quam voor Iesum, dat sy hem wtgestooten hadden, ende doen hy hem vant, sprack hy tot hem: Ghelooft ghy aenden Soon Gods?

36

Hy antwoorde en sprack: Heere, wie ist? Op dat ick aen hem ghelooue.

37

Iesus sprack tot hem:^† Ghy hebt hem ghesien, ende die met v spreect, die ist.

† Mat. 26.f.63. mar. 14.g.61. Ioan. 4.d.26

38

Ende hy sprack: Heere, ick ghelooue. Ende badt hem aen.

39

Ende Iesus sprack: Ick ben tot een ordeel op dese werelt ghecomen, op dat die daer niet en sien, siende worden:^* Ende die daer sien, blint worden.

* Mat. 13.b.13.

40

Ende sulcx hoorden sommighe der Phariseen die by hem waren, ende spraken tot hem: Sijn wy dan oock blint?

41

Iesus sprack tot haer: Waert^† ghy blint, soo en hadt ghy gheen sonde: Maer nv ghy spreeckt: Wy zijn siende, soo blijft uwe sonde.

† Ioan. 15.c.23.