Den Bibel, Inhoudende dat Oude ende Nieuwe Testament (Biestkensbijbel)

¶ Dat .v. Capittel.

¶ Hoe Iesus eenen mensche die achtendertich iaer cranck was gheweest, gesont maecte, ende van veel schoonder leeren die hy den Ioden seyde.

1

⁺ DAer na was een^* Feest der Ioden, ende Iesus tooch op nae Ierusalem.

+ A vers 1

* Leuit. 23.a.5. Deut. 16.a.1.

2

Ende daer is te Ierusalem by dat schaephuys een^‡ Wijer, die heet opt Hebreeusch Bethesda, ende heeft vijf voorhuysen,

‡ Vyuer.

3

In welcken lagen veel crancken, blinden, lammen, dorren, die verwachteden, wanneer hem dat water beweechde.

4

Want de Engel voer af tot zijnder tijt in den Wijer, ende beweechde dat water. Wie nv de eerste, nae dattet water beweecht was, daer in clam, die wert gesont, met welckerley siecte hy beuangen was.

5

Ende aldaer was een mensch, die hadde achtendertich Iaer cranc gelegen.

6

Doen Iesus den seluen sach liggen, ende vernam, dat hy so lange gelegen hadde, spreect hy tot hem:

7

Wilt ghy gesont worden? De crancke antwoorde hem: Heere, ick en heb geenen mensch, wanneer dat water hem beweecht, die my in den Wijer late: Ende wanneer ic come, so climt daer een ander voor my in.

8

Iesus spreeckt tot hem:^† Staet op, neemt dijn bedde, ende gaet henen.

† Matt. 9.a.6. Marc. 2.a.12. Luce. 5.c.24.

9

Ende terstont wert de Mensch gesont, ende nam zijn bedde, ende ghinc henen.^* Ende het was Sabbath, op den seluen dach.

* Ioan. 9.b.14

10

^‡ Doen spraken de Ioden tot den genen die gesont was geworden: Het is heden Sabbath, het en betaemt niet, dat ghy dat bedde draecht.

‡ Exo. 20.b.10 Matt. 12.a.2. Marc. 2.c.24 3.a.2. Luce. 6.a.2. 13.b.12. 14.a.3 Ioan. 7.b.23. 9.b.16.

11

Hy antwoorde haer: Die my gesont maecte, die sprac tot my: Neemt dijn bedde, ende gaet henen.

12

Doen vraechden si hem: Wie is de mensce, die tot v gheseyt heeft: Neemt dijn bedde, ende gaet henen?

13

Maer die gesont was geworden, en wist niet, wie hi was.^* Want Iesus was gheweken, dewijle datter so veel volcks aen de plaetse was.

* Ioan. 6.b.15.

14

⁺ Daer na vant hem Iesus inden Tempel, ende sprac tot hem: Siet toe, ghy zijt gesont geworden,^† en sondicht nv voortaen niet meer, dat v niet wat ergers en geschie.

+ B vers 14

† Ioan. 8.a.11.

15

De mensch ghinc henen, ende vercondichde het den Ioden, Het sy Iesus, die hem gesont gemaect heeft.

16

Daerom veruolchden de Ioden Iesum, ende sochten hem te dooden, om dat hi sulcx gedaen hadde op den Sabbath.

17

Ende Iesus antwoorde haer:^* Mijn vader werct tot noch toe, ende ick werck ooc.

* Ioan. 14.b.10 1.Cor. 12.a.6.

18

Daerom leyden de Ioden nv veel meer op hem toe, dat si hem doodden, om dat hy niet alleen den Sabbath brac, maer ooc seyde:^† Godt sy zijn Vader, ende maecte hem seluen Gode ghelijck.

† Mat. 26.f.63. Mar. 14.g.61 Luce. 22.e.69.

19

Doen antwoorde Iesus, ende sprac tot haer: Voorwaer, voorwaer, ic seg v:^* De soon en can niet van hemseluen doen, dan wat hy siet den vader doen:^† Want wat die selue doet, euen desgelijcken doet ooc de soon.

* Ioan. 9.a.4

† Esai. 54.a.5. Ioan. 10.c.30. 14.a.9. 17.a.5

20

De Vader heeft den soon lief, ende wijst hem al wat hy doet, ende sal hem noch groter wercken wijsen, dat ghy v verwonderen sult.

21

Want gelijc als de vader de dooden verwect, ende maectse leuendich, also maect ooc de soon leuendich, die hy wil.

22

Want de vader en ordeelt niemant,^* maer alle het ordeel heeft hy den soon gegeuen,

* Mat. 11.e.27. Luce. 10.c.22.

23

⁺ Op dat si alle den soon eeren, gelijc als si den vader eeren. Wie den soon niet en eert, die en eert den vader niet, die hem geseynt heeft.

+ C vers 23

24

Voorwaer voorwaer, seg ick v:^† Wie mijn woort hoort, ende gelooft dien, die my gesonden heeft, die heeft het eewige leuen,^* ende en coemt niet in het ordeel, maer hy is van der doot tot den leuen door gedrongen.

† Ioan. 8.e.51.

* Luc. 23.d.42.

25

^† Voorwaer voorwaer, ick seg v: De vre coemt, ende is nv alreede, dat de dooden sullen hooren de stemme, des soons Godts, ende diese sullen hooren, die sullen leuen.

† Marc. 5.e.42 Ioan. 11.e.43.

26

^* Want gelijc als de Vader dat leuen heeft in hemseluen, alsoo heeft hy den soon gegeuen, dat leuen te hebben in hemseluen,

* Ioan. 1.a.4. 14.a.6.

27

Ende^† heeft hem macht gegeuen, ooc dat ordeel te houden, daerom, dat hy des menschen soon is.

† Matt. 28.c.18.

28

En verwondert v dies niet:^‡ Want de vre coemt, in welcke, alle die in den grauen zijn, sullen zijn stem hooren,

‡ Dani. 12.a.12. mat. 25.d.47. 1.Cor. 15.f.52. 1.Tess. 4.b.16

29

Ende sullen voort gaen, die goet gedaen hebben, tot der verrijsenisse des leuens: Maer die quaet gedaen hebben, tot de verrijsenisse des ordeels.

30

Ic en can niet van my seluen doen. So ic hoore, so ordeele ick, ende mijn oordeel is recht.^* Want ic en soeck niet mijnen wille, maer des Vaders wille, die my ghesonden heeft.

* Mat. 26.d.38

31

^† Ist dat ick van my selue ghetuychenisse geue, so en is mijn ghetuychenisse niet waer.

† Ioan. 8.b.14

32

^‡ Een ander ist, die van my getuychenisse gheeft: Ende ick weet, dat het getuychenisse waer is, dat hy van my gheeft.

‡ Esa. 40.b.10. Matt. 3.c.17.

33

^+* Ghy schicte tot Iohannes, ende hy gaf getuychenisse vander waerheyt.

+ D vers 33

* Ioan. 1.b.19.

34

Mer ick en neme geen getuychenisse van den menschen: Maer sulcx seg ick, op dat ghy salich wordet.

35

Hy was een bernende ende schijnende licht, maer ghy woudet een cleyne wijle vrolijck zijn, van zijnen lichte.

36

^* Maer ick heb een grooter getuychenis, dan Iohannis ghetuychenisse:^† Want de wercken die my de Vader gegeuen heeft, dat ickse volbrenghe, die selue wercken, die ick doe, gheuen getuychenisse van my, dat my de Vader gesonden heeft:

* 1.Ioan. 5.a.9.

† Ioan. 10.c.25.

37

Ende de Vader die my gesonden heeft,^‡ die selue heeft van mi ghetuychnisse

‡ Mat. 3.b.17. 17.a.5. Ioan. 8.b.18.

[p. 40v]

ghegheuen.^† Ghy en hebt noch noyt zijn stemme gehoort, noch zijn gedaente ghesien,

† Exod. 33.d.20 Deut. 4.b.12. Ioan. 1.b.18. 1.Ioan. 4.b.12.

38

Ende zijn woort en hebt ghy niet in v woonende. Want ghy en ghelooft dien niet, dien hy ghesonden heeft.

39

Soeckt inder^* Schrift, wandt ghy meynt, ghy hebt dat eewighe leuen daer in.^† Ende si ist, die van my getuygenisse gheeft,

* Acto. 17.b.11.

† Deut. 18.c.15. Luce. 24.c.26

40

Ende ghy en wilt niet tot my comen, dat ghy dat leuen moecht hebben.

41

^‡ Ick en neem geen eere vanden menschen.

‡ Ioan. 12.f.43

42

Maer ick kenne v, dat ghy Godts liefde in v niet en hebt.

43

Ick ben ghecomen in mijns Vaders Naem, ende ghi en neemt my niet aen.^* Ist datter een ander in zijnen eyghen naem sal comen, dien sult ghy aennemen.

* 2.Tessa. 2.a.3. 1.Ioan. 2.c.18

44

Hoe moecht ghy gheloouen, ghy die eere van malcanderen ontfangt? Ende de eere, die van Gode alleen is, en soect ghy niet.

45

Ghy en sult niet meynen, dat ick v voor den Vader beschuldigen sal:^* Daer is een die v beschuldicht, de Moses, op welcken ghy hopet.

* Deut. 31.f.27.

46

Waert dat ghy Mosi gheloofde, so gheloofde ghy oock my,^† want hy heeft van my ghescreuen:

† Genes. 3.c.15. Deut. 18.c.15.

47

Maer ist dat ghy zijne Scriften niet en gelooft, hoe sout ghi dan mijne woorden gheloouen?