Den Bibel, Inhoudende dat Oude ende Nieuwe Testament (Biestkensbijbel)

¶ Dat .iiij. Capittel.

¶ Hoe Iesus metter Samaritaensce vrouwe byden Put van Iacob sprac, ende haer seyde dat sy vijf mans ghehadt had, Ende hoe Iesus een Conincx soon vander cortsen ghenas.

1

⁺ DOen nv de Heere vernam, dat het voor de Phariseen gecomen was,

+ A vers 1

[p. 39v]

dat Iesus meer Iongeren maecte,^* ende doopte, dan Iohannes

* Ioan. 3.d.22.

2

(Hoe wel Iesus seluer niet en doopte, maer sine Iongheren)

3

Verliet hy dat Lant Iudeam, ende tooch weder in Galileen:

4

Maer hy moeste door Samarien reysen.

5

Doen quam hy in een Stadt Samarie, die Sichar heet,^† nae by dat Dorpken, dat Iacob sinen soon Ioseph gaf.

† Gen. 48.d.22 Iosu. 24.f.32

6

Ende aldaer was Iacobs Fonteyn. Doen nv Iesus moede was vander reyse settede hy hem also op de Fonteyne. Ende het was ontrent de seste vre.

7

Doen coemter een vrouwe van Samaria om water te sceppen. Iesus spreect tot haer: Geeft my te drincken.

8

Want sine Iongeren waren henen in de Stadt ghegaen, dat si spijse cochten.

9

So seyt nv de Samaritaensche vrouwe tot hem: Hoe bidt ghy van my drincken, soo ghy doch een Iode zijt, ende ick een Samaritaensche vrouwe?^* Want de Ioden en hebben gheen ghemeynschap met den^† Samaritanen.

* 4.Reg. 17.e.24.

† Ioan. 8.e.48.

10

⁺ Iesus antwoorde ende sprack tot haer: Waert dat ghy bekende de gaue Godts, ende wie die is die tot v seyt: Gheeft my te drincken, ghy baedt hem, ende hy gaue v^* leuendich water.

+ B vers 10

* Esaie. 55.a.1. Ierem. 2.b.10 Ioan. 7.d.38.

11

De vrouwe spreect tot hem:^† Heere, ghy en hebt doch niet daer ghy mede puttet, ende de Put is diep, van waer hebt ghy dan leuendich water?

† Ioan. 3.a.4. 6.f.52.

12

Sijt ghy meerder, dan onse vader Iacob, die ons desen Put ghegheuen heeft? Ende hy heeft daer wt ghedroncken, ende zijn kinderen, ende zijn vee.

13

Iesus antwoorde, ende sprac tot haer: Wie van dat water drinct, dien sal weder dorsten:

14

Mer wie vanden water drincken sal, dat ick hem gheue, dien en sal eewichlijck niet dorsten: Maer dat water dat ic hem geuen sal^* dat sal in hem een Fonteyne des waters worden, dat in dat eewich leuen springhet.

* Ioan. 7.d.38.

15

^† De vrouwe seyt tot hem: Heere, geeft my dat selue water, op dat my niet en dorste, dat ick niet en derue herwaerts comen, om water te putten.

† Ioan. 6.d.34

16

Iesus spreeckt tot haer: Gaet henen, roept uwen man, ende coemt herwaerts.

17

⁺ De vrouwe antwoorde ende sprack tot hem: Ick en heb gheenen man. Iesus spreect tot haer: Ghy hebt recht gheseyt, ick en heb gheenen man,

+ C vers 17

18

Wandt ghy hebt vijf mannen ghehadt, ende dien ghy nv hebt, die en is uwe man niet, daer hebt ghy recht aen gheseyt.

19

De vrouwe spreeckt tot hem: Heere, ick sie, dat ghy^* een Propheet zijt.

* Luce. 7.b.16. 24.b.18. Ioan. 6.b.14 7.d.40.

20

Onse vaderen hebben op desen^† berch aenghebeden,^‡ Ende ghy segt, tot Ierusalem sy de plaetse, daermen moet aenbeden.

† Deu. 11.d.29 27.b.12.

‡ 3.Reg. 9.a.3. 2.Par. 7.c.11.

21

Iesus spreect tot haer: Vrouwe, ghelooft my, de tijt coemt, dat ghy noch op desen berch, noch te Ierusalem den Vader sult aenbidden.

22

Ghy en weet niet, wat ghy aenbidt: Maer wy weten, wat wy aenbidden,^* want het Heyl coemt vanden Ioden.

* Gene. 22.c.18. 26.a.4. Heb. 7.b.14.

23

Maer de tijt coemt, ende is nv alreede, dat de warachtige aenbidders, sullen den vader aenbidden,^† inden gheest, ende inder waerheyt. Want de Vader wil oock hebben, die hem alsoo aenbidden.

† Rom. 1.a.9.

24

^* Godt is een gheest, ende die hem aenbidden, die moeten hem inden gheest ende inder waerheyt aenbidden.

* 2.Cor. 3.c.17.

25

⁺ De vrouwe spreect tot hem: Ick weet het dat Messias coemt, die daer Christus heet: Wanneer die selue sal comen, soo sal hijt ons altemael vercondighen.

+ D vers 25

26

Iesus seyt tot haer:^‡ Ic bent, die met v spreect.

‡ Mat. 26.f.63. mar. 14.g.61. Luce. 22.e.69. Ioan. 9.d.37. 10.c.24.

27

Ende met dien quamen zijn Iongheren, ende het gaf haer wonder dat hy met een vrouwe sprack: Nochtans en seyde niemandt: Wat vraecht ghy? Oft wat spreect ghy met haer?

28

Doen liet de vrouwe haer cruyck staen, ende ghinc inde Stadt, ende seyt tot den lieden:

29

Coemt, siet eenen mensch, die my gheseyt heeft al wat ic gedaen heb, oft hy niet Christus en sy?

30

Doen gingen si wt der Stadt, ende quamen tot hem.

31

Ende daer en tusschen vermaenden hem de Iongeren, ende spraken: Rabbi, eet.

32

Maer hy sprac tot haer: Ic heb een spijs te eten, daer ghy niet af en weet.

33

Doen spraken de Iongheren onder malcanderen: Heeft hem yemandt wat te eten ghebracht?

34

Iesus spreeckt tot haer: Mijn spijse is die, dat ick doe den wille des gheens die my gheseynt heeft, ende volbrenghe zijn werck.

35

En segt ghy niet selue: Het zijn noch vier maenden, so coemt de Oogst? Siet, ick seg v, heft uwe ooghen op, ende siet in dat velt:^* Wandt het is alreede wit totten Oogst.

* Matt. 9.d.37 Luce. 10.a.2.

36

Ende wie daer maeyt, die ontfangt loon, ende vergadert vrucht totten eewigen leuen, op dat haer met malcanderen verblijden, die daer saeyt ende die daer maeyt.

37

⁺ Want hier is de spruecke waer: Dese saeyt, de ander maeyt.

+ E vers 37

38

Ick heb v ghesonden te maeyen, dat ghy niet en hebt gearbeyt. Andere hebben ghearbeyt, ende ghy zijt in haren arbeyt ghecomen.

39

Ende vele der Samaritanen wt der seluer stadt, gheloofden aen hem, om der vrouwen Reden wille, die daer betuychde: Hy heeft my gheseyt al wat ick ghedaen heb.

40

Als nv de Samaritanen tot hem quamen, baden si hem, dat hy by haer bleue.

41

Ende hy bleef daer twee daghen. Ende veel meer geloofden om zijns woorts wille,

42

Ende spraken totter vrouwen: Wy en gheloouen nv voortaen niet om dijner reden wille,^† wy hebben seluer gehoort ende bekent, dat dese is voorwaer Christus der werelt Heylant.

† Ioan. 17.b.8.

43

Ende na twee dagen tooch hy wt van daer, ende tooch in Galileam.

44

Want^‡ Iesus betuychde selue, Dat een Propheet thuys niet en gelt.

‡ Mat. 13.g.57. Marc. 6.a.4. Luce. 4.c.24.

45

Doen hy nv in Galileen quam, namen hem de Galileesche aen, die gesien hadden al wat hy tot Ierusalem op het Feest gedaen had: Want si waren ooc tot het Feest gecomen.

46

Ende Iesus quam weder tot Cana in Galilea,^* daer hy dat water tot wijn ghemaeckt hadde.

* Ioan. 2.a.8.

47

^+† Ende daer was eens Conincx Officier, diens soon lach cranc tot Capernaum. Dese hoorde dat Iesus quam van Iudea in Galileen. Ende ghinc henen tot hem, ende badt hem: Dat hy af quam, ende holpe sinen soon, want hy was doot cranc.

+ F vers 47

† Matt. 8.a.5. Luce. 7.a.1.

[p. 40r]

48

Ende Iesus sprack tot hem:^† Wanneer ghy geen tekenen ende wonderheden en siet, soo en gelooft ghy niet.

† Matt. 16.a.1. 1.Cor. 1.d.20.

49

Des Conincx officier sprac tot hem: Heere, coemt af, eer mijn kint sterft.

50

Iesus spreect tot hem: Gaet henen, dijn Soon leeft. De mensce geloofde den woorde, dat Iesus tot hem sprac: Ende ginc henen.

51

Ende met dien als hy af ginc, ontmoeteden hem zijn knechten, vercondichden hem, ende spraken: Dijn kint leeft.

52

Doen vereyschte hy van haer de vre, in welcke het beter met hem geworden was. Ende si spraken tot hem: Ghisteren ontrent de seuenste vre, verliet hem de cortse.

53

Doen mercte de vader, dattet ontrent dier vren ware, in welcke Iesus tot hem gesproken hadde: Dijn soon leeft.^* Ende hy geloofde, met sinen geheelen huyse.

* Acto. 16.e.34. 18.a.8.

54

Dat is nv dat tweede teecken, dat Iesus dede, doen hy wt Iudea in Galileam quam.