Den Bibel, Inhoudende dat Oude ende Nieuwe Testament (Biestkensbijbel)

¶ Dat .iij. Capittel.

¶ Hoe Nicodemus des nachts tot Iesu quam, Ende hoe Iesus hem vele schoone leeren vande wedergheboorte seyde, Ende hoe Iesus in Iudea, ende Iohannes in Ennon by Salim doopte, ende ghetuygenisse van Iesu gaf.

1

⁺ ENde daer was een mensche onder den Phariseen, met name^* Nicodemus, een ouerste onder den Ioden:

+ A vers 1

* Ioan. 7.e.50. 19.d.39.

2

Die quam tot Iesu by nacht, ende sprack tot hem: Meester, wy weten, dat ghy zijt een Leeraer van God gecomen,^† want niemant en can de Teeckenen doen, die ghy doet, ten sy dan, dat Godt met hem sy.

† Ioan. 9.b.16.

3

Iesus antwoorde ende sprac tot hem: Voorwaer, voorwaer, ick seg v: Ten sy dan, dat yemant^‡ van nieu gheboren worde, soo en can hy dat Rijcke Gods niet sien.

‡ Ioan. 1.a.13. 1.Petri. 2.a.2.

4

Nicodemus spreect tot hem:^* Hoe can een mensch gheboren worden, wanneer hy oudt is? Can hy ooc weder in zijn moeders Lijf gaen, ende gheboren worden?

* Ioan. 4.b.11. 6.f.52.

5

Iesus antwoorde: Voorwaer, voorwaer, ick seg v: Ten sy dan,^* dat yemant gheboren worde, wt den water ende gheest, soo en can hy in dat Rijcke Godts niet comen.

* Titum. 3.a.5.

6

^+† Wat van den vleessche ghebooren wordt, dat is vleesch: Ende wat vanden gheest gheboren wort, dat is gheest.

+ B vers 6

† Roma. 8.a.5.

7

En laet het dy niet verwonderen, dat ick dy gheseyt hebbe: Ghy moet van nieus gheboren worden.

8

^‡ De windt blaest waer hy wil, ende ghy hoort zijn ruysschen wel, maer ghy en weet niet, van waer hy coempt, ende waer hy henen vaert. Alsoo is een yeghelijck, die wt den gheest gheboren is.

‡ Eccle. 11.a.5.

9

Nicodemus antwoorde, ende sprack tot hem:^‡ Hoe mach sulcx gheschieden?

‡ Ioan. 6.f.52.

10

Iesus antwoorde, ende sprack tot hem: Sijt ghy een Meester in Israel, ende en weet dat niet?

11

Voorwaer, voorwaer ic seg v:^* Wy spreken, dat wy weten, ende betuyghen, dat wy ghesien hebben, ende ghy en neemt onse ghetuychnis niet aen.

* Ioan. 7.b.16. 8.d.28. 12.g.49. 14.c.24.

12

Ghelooft ghy niet, als ick v van aertsche dinghen segge, hoe sout ghy dan geloouen, waert dat ick v van Hemelsche dingen seyde?

13

^† Ende niemant en vaert ten Hemel, dan alleene die vanden Hemel neder gecomen is, Namelijc, des menscen Soon, die inden Hemel is.

† Ioan. 6.g.62. Ephe. 4.a.9.

14

^‡ Ende ghelijck als Moses inder woestijne een slanghe verhoocht heeft, also moet des menschen Soon verhoocht worden,

‡ Num. 21.b.9. Ioan. 8.c.28. 12.d.32.

15

Op dat alle die aen hem gheloouen, niet verloren en worden, maer dat eewich leuen hebben.

16

^+* Alsoo lief heeft God de Werelt gehadt, dat hy sinen eenighen Soon gaf,^† op dat alle die aen hem gheloouen, niet verloren en worden, maer dat eewich leuen hebben.

+ C vers 16

* mar. 16.b.16 Luce. 19.a.10. Roma. 5.a.8. 1.Ioan. 4.b.9

† Ioan. 3.e.36 6.f.47.

17

^‡ Want Godt en heeft sinen Soon niet gesonden in de Werelt, dat hy de Werelt oordeele, maer dat de Werelt door hem salich worde.

‡ 1.Ioan. 4.b.14.

18

Wie aen hem ghelooft, die en wort niet gheordeelt:^* Maer wie niet en ghelooft, die is alreede gheordeelt, want hy en ghelooft niet aen den Name des eengheboren Soon Gods.

* Marc. 16.c.16 Ioan. 8.b.24.

19

Ende dit is dat ordeel,^† dat het licht in de werelt gecomen is, ende de Menschen beminden meer de duysternisse, dan het Licht, want haer wercken waren quaet.

† Ioan. 1.a.5. 12.f.46.

20

Wie quaet doet, die haet het licht, ende en coemt niet aen het licht, op dat zijn wercken niet ghestraft en worden.

21

^‡ Maer wie de waerheyt doet, die coemt aen het licht dat zijne wercken openbaer wordden, want sy zijn in Godt ghedaen.

‡ Ephesi. 5.b.8.

22

⁺ Daer na quam Iesus ende zijne Iongheren in het Iootsche lant, ende hadde aldaer zijn wesen met haer,^* ende doopte.

+ D vers 22

* Ioan. 4.a.1.

23

Ende^† Iohannes doopte ooc noch, tot Enon, nae by Salim, want aldaer was veel waters. Ende sy quamen daer henen, ende lieten haer doopen,

† Mat. 3.a.6. Marc. 1.a.5. Luce. 3.a.7.

24

^‡ Want Iohannes en was noch niet inde gheuanckenis gheleyt.

‡ mat. 4.b.12.

25

Doen stont een vraghe op onder de Iongheren Iohannis met den Ioden, ouer de reyninghe.

26

Ende quamen tot Iohannes, ende spraken tot hem: Meester, die by v was ouer de Iordaen,^* van welcken ghy ghetuychnis gaeft,^† siet, die doopt, ende alle man coemt tot hem.

* Marc. 1.a.7.

† Ioan. 4.a.1.

27

Iohannes antwoorde, ende sprac: Een mensche en can niet ontfanghen, ten worde hem dan ghegheuen van den Hemel.

28

Ghy zijt selue mijn ghetuyghen, dat ick gheseyt heb:^* Ick en sy Christus niet,^† maer voor hem ghesonden.

* Ioan. 1.b.20. Actor. 13.d.25.

† Mala. 3.a.1. Mat. 11.b.10.

29

^‡ Wie de Bruyt heeft, die is de Bruydegom. Mer de vrient des Bruydegoms staet, ende hoort hem aen, ende verblijdt hem hoochelijc ouer des Bruydegoms stemme.

‡ Esa. 54.a.5. 2.Cor. 11.a.4. Apoca. 21.a.2.

30

Die selue mijn blijschap is nv veruult. Hy moet wassen, maer ick moet af nemen.

31

⁺ Die van bouen af coemt, die is bouen alle: Wie van der Aerden is, die is van der Aerden, ende spreect van der Aerden. Die vanden Hemel coemt, die is bouen alle,

+ E vers 31

32

Ende gheeft getuychenisse van dien, dat hy ghesien ende ghehoort heeft, ende zijne getuychnisse en neemt niemant aen.

33

Maer wiese aen neemt, die besegheltet,^* dat Godt waerachtich sy.

* Roma. 3.a.4.

34

Want wien Godt ghesonden heeft, die spreect Gods woorden.^† Want Godt en gheeft den Gheest niet nae der mate.

† Esaie. 61.a.1. Ephes. 4.a.7.

35

De Vader heeft den Soon lief,^* ende heeft hem alle dinck in zijn hant ghegheuen.

* Mat. 11.c.27 Luce. 10.c.22.

36

^‡ Wie aen den Soon gelooft, die heeft dat eewige leuen: Wie den Soon niet en ghelooft, die en sal dat leuen niet sien, maer den toorn Gods blijft op hem.

‡ Ioan. 6.f.47 1.Ioan. 5.b.10