Den Bibel, Inhoudende dat Oude ende Nieuwe Testament (Biestkensbijbel)

¶ Dat .ij. Capittel.

¶ Hoe Iesus in der bruyloften van water wijn maecte, ende de coopers ende vercoopers wt den Tempel sloech, Ende hoe veel menschen aen hem geloofden.

1

⁺ ENde ten derden daghe, werdt een Bruyloft tot Cana in Galilea, ende de moeder Iesu was daer.

+ A vers 1

2

Ende Iesus ende zijn Iongheren werden oock ter bruyloft ghenoot.

3

Ende doen daer wijn ghebrack, spreeckt de moeder Iesu tot hem: Sy en hebben gheenen wijn.

4

Iesus spreeckt tot haer:^* Wijf, wat heb ick met v te doen? Mijn vre en is noch niet ghecomen.

* Luce. 2.g.48.

5

Sijn moeder spreect tot den Dienaeren: Wat hy v seyt dat doet.

6

Ende daer waren ses Steenen water cruycken geset, na de maniere der Iootscher reyninghe, ende in een yeghelijck ghinck twee oft drie maten.

7

Iesus spreect tot haer: Vult de water cruycken met water. Ende si vuldense tot bouen aen.

8

Ende hy spreeckt tot haer: Ghietet nv in, ende brenghet den Spijsmeester:

9

Ende si brachtent hem. Maer als de Spijsmeester den wijn smaecte, die water was gheweest, ende en wist niet, van waer hy quam, maer de dienaers wistent wel, die dat water ghehaelt hadden, roept de Spijsmeester den Bruydegom,

10

Ende spreeckt tot hem: Alle man geeft ten eersten den goeden wijn, ende wanneer si droncken gheworden zijn, als dan, den ergheren. Ghy hebt den goeden wijn tot nv toe behouden.

11

⁺ Dat is dat eerste teecken, dat Iesus dede, gheschiet tot Cana in Galilea, ende openbaerde zijn heerlijcheyt. Ende sine Iongheren gheloofden aen hem.

+ B vers 11

12

^* Daer na tooch hy af na Capernaum, Hy, zijn moeder, zijn broederen, ende sine Iongeren, ende en bleef niet lange aldaer.

* Mat. 4.b.13. Marc. 1.b.21. Luce. 4.d.31.

13

Ende der Ioden Paesschen was nae by, ende Iesus tooch op nae Ierusalem,

14

^† Ende vant inden Tempel sitten, die daer Ossen, Schapen, ende Duyuen veyl hadden, ende de Wisselaers.

† Mat. 21.b.12. Marc. 11.b.15 Luce. 19.d.45

15

Ende hy maeckte een gheessel van seelkens, ende dreefse alle ten Tempel wt, met den Schapen ende Osschen, ende vergoot den Wisselaers dat ghelt, ende stiet de Tafelen om.

16

Ende sprack tot dien, die de Duyuen veyl hadden: Draecht dat van hier, ende en maect mijns Vaders huys niet tot een Coophuys.

17

Ende zijn Iongheren dachten daer aen,^* datter geschreuen staet: De ijuer om dijn huys heeft my opghegheten.

* Psal. 69.b.10

18

⁺ Doen antwoorden nv de Ioden, ende spraken tot hem:^† Wat thoont ghy ons voor een teecken, dat ghy sulcx doen moghet?

+ C vers 18

† Matt. 16.a.1. 26.f.60. Ioan. 6.d.30.

19

Iesus antwoorde ende sprack tot haer: Breect desen Tempel, ende aen den derden dach wil ick hem op richten.

20

Doen spraken de Ioden:^* Dese Tempel is in sesenveertich Iaren getimmert, ende wilt ghy hem in drie dagen op richten?

* 1.Esdre. 5. 6.

21

Maer hy sprack vanden Tempel zijns Lijfs.

22

Doen hy nv opghestaen was vanden dooden, dachten sine Iongheren daer aen, dat hy dit gheseyt hadde, ende gheloofden de Schrift ende der Reden, die Iesus ghesproken hadde.

23

Als hy nv te Ierusalem was inden Paeschen op het Feest, geloofdender veel aen sinen Naem, doen sy de teeckenen

[p. 39r]

saghen die hy dede.

24

Maer Iesus en betroude hemseluen haer niet, want hy kendese alle,

25

Ende en behoefde niet, dat yemandt ghetuychnis gaue van eenen mensche,^* want hy wiste wel, wat inden mensche was.

* 1.Reg. 16.b.7 Iere. 17.b.10. Apoca. 2.d.23.