Den Bibel, Inhoudende dat Oude ende Nieuwe Testament (Biestkensbijbel)

Euangelium S. Iohannis.

¶ Dat eerste Capittel.

¶ Hoe dat inden beginne dat woort was, ende was by Gode, etc. Ende hoe de Ioden van Ierusalem tot Iohannem sonden, Ende hoe Iohannes Iesum sach.

1

⁺ INden^* beginne was dat^† woort, ende dat woordt was by Gode, ende^‡ Godt was dat woordt.

+ A vers 1

* Miche. 5.a.1.

† Apo. 19.c.13.

‡ 1.Ioan. 5.c.20

2

Dat selue was inden beghinne by Godt.

3

^* Alle dingen zijn door dat selue ghemaect, ende sonder dat selue en isser niet ghemaect, watter ghemaect is.

* Genes. 1.a.1. Psalm. 33.a.6 Prou. 8.b.22.

4

^† In hem was dat Leuen, ende dat Leuen was^‡ dat Licht der Menschen,

† Ioan. 5.c.26. 14.a.6.

‡ Ioan. 8.b.12 9.a.5. 12.e.46

5

Ende dat^* Licht schijnt in de duysternissen, ende de duysternissen en hebbent niet begrepen.

* Ioan. 3.c.19.

6

^† Daer wert een mensch van Gode wtgesonden, die hiet Iohannes.

† Matt. 3.a.1.

7

Die selue quam ter getuychenisse, dat hy vanden Lichte ghetuychenis gaue, op dat si alle door hem geloofden.

8

Hy en was dat Licht niet, maer dat hy vanden Lichte getuychenis gaue.

9

^‡ Dat was dat waerachtighe Licht, welck alle Menschen verlicht, die in dese Werelt comen.

‡ Ioan. 8.b.12. 9.a.5. 12.f.46

10

Het was inder Werelt,^* ende de Werelt is door dat selue ghemaect, ende de Werelt en^‡ kende het niet.

* Hebre. 11.a.3.

‡ Mat. 11.e.27. Ioan. 8.b.19.

11

Hy quam in zijn Eygendom, ende de zijne en namen hem niet aen.

12

Maer so vele als hem aen namen, dien ghaf hy macht,^* Godts kinderen te worden, die daer aen zijnen Naem gheloouen.

* Esaie. 56.b.5. Hosee. 2.a.1. Roma. 8.b.15 Galat. 4.a.6.

13

Welcke niet van den bloede, noch van den wille des vleeschs, noch van den wille eens mans, maer^† van Godt gheboren zijn.

† Ioan. 3.a.3.

14

⁺ Ende dat Woort wert vleesch,^‡ ende woonde onder ons,^* ende wy sagen zijn heerlijcheyt, eene heerlijcheyt, als des eengheboren soons van den Vader, vol ghenade ende waerheyt.

+ B vers 14

‡ Baruc. 3.e.38.

* matt. 17.a.2. 2.Petri. 1.c.17 1.Ioan. 1.a.1.

15

Iohannes^† gheeft ghetuychenis van hem, roept, ende spreect: Dese was het, van dien ick gheseyt heb: Na my sal comen, die voor my gheweest is: Wandt hy was eer dan ick.

† Mat. 3.b.11. Marc. 1.a.8.

16

Ende van zijnder^* volheyt hebben wy alle ontfangen genade voor ghenade.

* Collos. 1.b.19. 2.b.9.

17

Want de^† Wet is door Mosen ghegheuen, De ghenade ende waerheyt, is door Iesum Christum gheworden.

† Exo. 20.a.1. Deut. 5.a.6.

18

^‡ Niemant en heeft Godt oyt ghesien. De eengheboren soon, die in des Vaders schoot is, die heeftet ons vercondicht.

‡ Exo. 33.d.20 Deut. 4.b.12. 1.Ioan. 4.b.12.

19

^* Ende dit is dat ghetuychenisse Iohannis, doen de Ioden seynden van Ierusalem Priesteren ende Leuiten, dat sy hem vraechden: Wie zijt ghy?

* Ioan. 5.d.33.

20

^† Ende hy bekende, ende en versaecktet niet.^† Ende hy bekende, ick en ben Christus niet.

† Ioan. 3.d.28.

† Acto. 13.d.25.

21

Ende sy vraechden hem: Wat dan?^‡ Sijt ghy Elias? Hy sprack: Ick en bens niet.^* Sijt ghy een Propheet? Ende hy antwoorde: Neen.

‡ Mat. 11.b.14

* Deu. 18.c.15

22

Doen spraken sy tot hem: Wat zijt ghy dan? Dat wy een antwoort gheuen, dien, die ons wt gesonden hebben? Wat segt ghy van v seluen?

23

Hy sprack:^† Ic ben een stemme eens Predickers in der woestijne. Maeckt den wech des Heeren recht,^‡ als de Propheet Esaias gheseyt heeft.

† Matth. 3.a.3. Marc. 1.a.1. Luce. 3.a.4.

‡ Esa. 40.a.3.

24

⁺ Ende die daer wtghesonden waren, die waren vanden Phariseen:

+ C vers 24

25

Ende vraechden hem, ende spraken tot hem: Waer om doopt ghy dan, ist dat ghy Christus niet en zijt, noch Elias, noch een Propheet?

26

Iohannes antwoorde haer, ende sprac:^* Ick doope met water, maer hy is midden onder v ghetreden, dien ghy niet en kent:

* Matt. 3.b.11. Marc. 1.a.8. Luce. 3.c.16. Acto. 1.a.5. 11.b.16. 19.a.4.

27

Die ist, die na my comen sal, die voor my gheweest is, dies ick niet weerdich en ben, dat ick zijn schoenriemen ontbinde.

28

Dit ghesciedde tot Bethabara ouer de Iordaen,^† daer Iohannes doopte.

† Ioan. 3.d.23. 10.d.40.

29

Des anderen daechs, siet Iohannes Iesum tot hem comen, ende spreeckt: Siet, dat is dat^‡ Lam Godts, welck der Werelt sonde draecht.

‡ Esaie. 53.b.7. Ioan. 1.d.36. 1.Cor. 5.b.7.

30

Dese ist, daer ick v af gheseyt heb: Na my coemt een Man, die voor my gheweest is. Want hy was eer dan ick,

31

Ende ick en kende hem niet, maer op dat hy openbaer werde in Israel, daerom ben ick ghecomen te doopen met water.

32

⁺ Ende Iohannes gaf getuychenisse,^* ende sprac: Ic sach, dat de gheest neder daelde,

+ D vers 32

* Matt. 3.b.16. Marc. 1.a.10. Luce. 3.c.21.

[p. 38v]

als een duyue, vanden Hemel, ende bleef op hem,

33

Ende ick en kende hem niet. Maer die my seynde, te doopen met water, die selfde sprack tot my: Op welcken ghy sien sult, den gheest neder dalen, ende op hem blijuen, die selue isset, die met den heylighen gheest doopt.

34

Ende ick sach het, ende gaf getuychenis,^* dat dese Godts soon is.

* Mat. 16.c.16. Ioan. 1.e.49. 6.g.69.

35

Des anderen daechs stont Iohannes wederom, ende twee zijnder Iongheren.

36

Ende als hy Iesum sach wandelen, sprack hy:^† Siet, dat is dat Lam Gods.

† Exodi. 12.a.3. Esaie. 53.b.7. Ioan. 1.c.29. Acto. 8.d.31. 1.Cor. 5.a.6.

37

Ende twee zijnder Iongeren hoorden hem spreken, ende volchden Iesu nae.

38

Ende Iesus keerde hem om, ende sachse na volghen, ende sprack tot haer: Wat soeckt ghy? Ende si spraken tot hem: Rabbi (dat is verduytst, Meester) Waer zijt ghy ter herberghe?

39

Hy sprac tot haer: Coemt, ende siet het. Sy quamen ende saghent, ende bleuen den seluen dach by hem. Ende het was ontrent der thiender vren.

40

Een vanden tween, die van Iohanne hoorden, ende Iesu nae volchden, was Andreas de broeder Simonis Petri.

41

Die selue vint ten eersten zijnen broeder Simon, ende spreect tot hem: Wy hebben den Messias gheuonden (welck is verduytst, de Ghesalfde.)

42

Ende bracht hem tot Iesu. Doen hem Iesus sach, sprack hy:^* Ghy zijt Simon Ionas soon, ghy sult Kephas heeten, dat wordt verduytst, eenen Steen.

* Mat. 16.c.17.

43

⁺ Des anderen daechs woude Iesus weder in Galileam trecken, ende vint Philippum, ende spreect tot hem: Volcht my nae.

+ E vers 43

44

Ende^† Philippus was van Bethsaida, wt Andreas ende Peters Stadt.

† Ioan. 12.c.21.

45

Philippus vindet^* Nathanael, ende spreect tot hem: Wy hebben dien geuonden, van welcken^† Moses in de Wet, ende de Propheten geschreuen hebben, Iesum Iosephs soon van Nazareth.

* Ioan. 21.a.2.

† Gen. 3.c.15. 22 c.18. 49.b.10. Deut. 18.c.15. Esaie. 7.b.14 9.b.5. 40.b.9 Ierem. 23.a.5. 33.c.14. Miche. 5.a.1.

46

Ende Nathanael sprac tot hem:^* Wat can van Nazareth goets comen? Philippus spreect tot hem: Coemt, ende siet het.

* Ioan. 7.d.41

47

Iesus sach Nathanael tot hem comen, ende spreeckt van hem: Siet een recht Israelijt, in welcken geen bedroch en is.

48

Nathanael spreect tot hem: Waer af kent ghy my? Iesus antwoorde, ende sprac tot hem: Eer v Philippus riep, doen ghi onder den vijgheboom waert, sach ick v.

49

Nathanael antwoordet, ende spreect tot hem: Rabbi, ghy zijt^† Godts Soon, ghy zijt de Coninck van Israel.

† Ioan. 1.d.34. 6.g.69. 11.c.27.

50

Iesus antwoorde, ende sprac tot hem: Ghy ghelooft, om dat ick v gheseyt hebbe, dat ick v gesien heb onder den vijgeboom, ghy sult noch wat grooters sien dan dat.

51

Ende spreect tot hem: Voorwaer, voorwaer ick segge v: Van nv aen sult ghy^† den Hemel open sien, ende de Enghelen Godts op ende neder varen, op des menschen Soon.

† Gene. 28.b.12 Acto. 7.f.56.