Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxiiij. Capittel.

¶ Hoe de vrouwen totten graue quamen, ende vercondichden tghene dat haer ghebuert was. Ende vanden tween die tot Emaus ghingen, ende den Heere int breken des broots bekenden, Hoe Iesus int middel der Iongeren stont, hen vrede bootscapte.

1

⁺ ENde^* op een der Sabbathen seer vroech, quamen si tot den graue, ende droeghen de specerije, die si bereyt hadden, ende sommighe met haer.

+ A vers 1

* Matt. 28.a.1. Marc. 16.a.1. Ioan. 20.a.1.

2

Ende si vonden den steen af ghewentelt vanden graue, ende ghingen daer in, ende en vonden dat Lichaem des Heeren Iesu niet.

3

^† Ende het gheschiedde, doen sy daerom becommert waren, Siet, doen traden twee Mannen by haer, met blinckenden cleederen.

† Ioan. 20.b.12.

4

Ende si verschricten, ende sloegen haer aensicht neder ter Aerden.^* Doen spraken die tot haer: Wat soect ghy den leuenden by den dooden?

* Matt. 28.a.5. Marc. 16.a.6

5

Hy en is hier niet, hy is op gestaen. Ghedenct daer aen, hoe hy v seyde, doen hy noch in Galilea was,

6

Ende sprac:^† Des menschen Soon moet ouer geleuert worden in de handen der Sondaren, ende gecruyst worden, ende ten derden daghe weder op staen.

† Mat. 16.c.21. Luce. 9.c.22. 18.d.31.

7

Ende sy dachten aen sine woorden.

8

^* Ende si ghinghen weder vanden graue, ende vercondichden dat alle den eluen, ende den anderen altemael.

* Matt. 28.b.8. Marc. 16.b.8.

9

Ende het was Maria Magdalena, ende Iohanna, ende Maria Iacobi, ende andere met haer, die sulcx den Apostelen seyden.

10

Ende hare woorden dochten haer, euen als warent bueselinghen, ende en gheloofden haer niet.

11

^* Maer Petrus stont op, ende liep tot den graue, ende buychde hem daer in, ende sach de lijnen doecken alleen liggen, ende ghinck wech.⁺ Ende het gaf hem wonder hoet toe ghinghe.

* Ioan. 20.a.3.

+ B vers 11

12

^† Ende siet, Twee van haer, ghingen op den seluen dach in een vlecke, die was van Ierusalem tsestich velt weechs, welcx name was Emmahus.

† Marc. 16.b.12

13

Ende si spraken met malcanderen, van alle dese gheschiedenissen.

14

Ende het gheschiedde, doen si alsoo spraken, ende beuraechden haer met malcanderen,^* naecte Iesus tot haer, ende wandelde met haer.

* Mat. 18.c.20. Luce. 24.c.35.

15

Maer haer ooghen werden ghehouden dat si hem niet en kenden.

16

Ende hy sprack tot haer: Wat zijn dat voor Reden, die ghy tusschen v handelt, onder wegen, ende zijt truerich?

17

Doen antwoorde een genaemt Cleophas, ende sprac tot hem: Sijt ghi alleen onder den vreemdelingen tot Ierusalem, die niet en wete, wat in desen daghen daer binnen gheschiet is?

18

Ende hy sprac tot haer: Wat? Ende si spraken tot hem: Dat, van Iesu van Nazareth, die daer was^† een Pro-pheet, machtich van daden ende woorden, voor Gode, ende alle volck,

† mat. 21.e.46 Luce. 7.b.16. Ioan. 4.c.19. 7.d.40.

19

Hoe hem onse hooghe Priesteren ende Ouersten ouergheleuert hebben totter verdoemenisse des doots ende ghecruyst.

20

Maer wy hoopten,^* hy soude Israel verlossen. Ende bouen dat alle, ist heden den derden dach, dat sulcx gheschiet is.

* Acto. 1.a.6.

21

Oock^† hebben ons verschrict sommighe Wijuen vanden onsen, die zijn vroech byden graue gheweest,

† Luce. 24.a.8. Ioan. 20.a.2.

22

En hebben zijn Lichaem niet gheuonden, comen, ende segghen, si hebben een ghesicht der Enghelen ghesien, die daer segghen: Hy leue.

23

Ende sommighe van ons, ghinghen henen tot den graue, ende vondent also, als de Wijuen seyden, maer hem en vonden si niet.

24

⁺ Ende hy sprac tot haer: O ghy dwasen ende traech van herten te gheloouen alle dien, dat de Propheten ghesproken hebben:

+ C vers 24

25

^* Moeste niet Christus sulcx lijden, ende tot zijnder heerlijckheyt in gaen?

* Esaie. 50.b.6. 53.b.13.

26

^† Ende begost van Mose ende alle Propheten, ende leyde haer alle Schriften wt, die van hem geseyt waren.

† Ge. 3.c.15. 22 c.18. 26.a.4. Deut. 18.c.18. Psal. 131.b.11. Esaie. 4.a.1. 7.b.14. 9.b.5. 42.a.1. Ierem. 23.a.5. 33.c.14. Ezec. 34.d.23. 37.d.24. Danie. 9.e.26 Miche. 5.a.1.

27

Ende si quamen naby der vlecken, daer si henen gingen: Ende hy stelde hem, als oft hy voorder woude gaen.

28

^* Ende si dwonghen hem, ende spraken: Blijft by ons, want het wil auont worden, ende de dach heeft hem gheneycht. Ende hy ghinck in, om by haer te blijuen.

* Gen. 19.a.2. Luce. 14.c.23. Acto. 16.b.15.

29

Ende het gheschiedde, doen hy met haer ter tafelen sat, nam hy dat broot, dancte, bract, ende gaft haer.

30

Doen werden haer ooghen gheopent, ende bekenden hem: Ende hy verdween voor haer.

31

Ende si spraken onder malcanderen: Brande niet onse hert in ons, doen hy met ons sprack op den wech, als hy ons de Schrift opende?

32

Ende si stonden ter seluer vren op, keerden weder na Ierusalem, ende vonden de elue vergadert, ende die by haer waren, welcke spraken:

33

De Heere is waerachtich opgestaen, ende Simon verschenen.

34

Ende si vertelden haer, wat op den wech gheschiet was, ende hoe hy van haer bekent ware, aen dien, doen hy dat broot brack.

35

^* Ende doen si daer af spraken, tradt Iesus selue midden onder haer, ende sprack tot haer: Vrede sy met v.

* Ioan. 20.c.19. 1.Cor. 15.a.5.

36

Ende si verschricten, ende vreesden, meynden, si saghen eenen gheest.

37

Ende hy sprack tot haer: Wat zijt ghy soo verschrickt? Ende waerom comen sulcke gedachten in uwen herten?

38

⁺ Siet mijn handen ende mijn voeten, Ick bent seluer, tast my, ende siet: Want een gheest en heeft gheen vleesch ende beenders, als ghy siet dat ick heb.

+ D vers 38

39

Ende doen hy dat seyde, thoonde hy haer handen ende voeten.

40

Maer doen si noch niet en gheloofden van blijschappen, ende haer verwonderden, sprack hy tot haer:^† Hebt ghy hier wat te eten?

† Ioan. 21.b.10.

41

Ende si leyden hem een stuck van eenen ghebraden visch, ende honich voor.

42

Ende hy namt, ende attet voor haer.

43

Ende hy sprac tot haer:^* Dat zijn de Reden, die ic tot v seyde, doen ic noch by v was. Want het moet altemael veruult

* mat. 16.c.21. 17 d.22. 20.b.18. Marc. 8.d.31. Luce. 9.c.22. 18.d.31.

[p. 38r]

worden, wat van my gheschreuen is inde Wet Mosi, inde Propheten, ende inde Psalmen.

44

Doen opende hy haer dat verstant, dat si de Schrift verstonden,

45

Ende sprack tot haer:^* Alsoo ist gheschreuen, ende alsoo moeste Christus lijden,^† ende weder op staen vanden dooden ten derden daghe,

* Psal. 22.b.7. Acto. 17.a.3.

† Mat. 20.c.19

46

Ende laten predicken in sinen Name,^‡ boete ende vergheuinge der sonden onder alle volcken, ende beghinnen te Ierusalem.

‡ Acto. 13.d.38.

47

Ende ghy zijt dies alle ghetuyghen.

48

^* Ende siet, ick wil op v seynden, de Beloftenisse mijns Vaders. Maer ghy sult in der Stadt Ierusalem blijuen, soo langhe tot dat ghy aenghetoghen wordt met cracht wt der hoochte.

* Ioan. 14.c.26 15.c.26. 16.a.7 Acto. 1.a.8. 2.a.2.

49

Ende hy leyddese wt, tot Bethanien toe, ende hief de handen op, ende seghendese.

50

^† Ende het gheschiedde, doen hyse seghende, schiet hy van haer, ende voer op ten Hemel.

† Marc. 16.c.19 Acto. 1.b.9.

51

Ende si baden hem aen, ende keerden wederom nae Ierusalem met grooter vruechden.

52

Ende waren altijt inden Tempel, presen ende loofden Godt.

¶ Het eynde des Euangelij S. Lucas.