Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxiij. Capittel.

¶ Hoe de Euangelist voort beschrijft de Passie oft lijden Christi totten eynde, Ende de menschen in zijnen doot haer verwonderden.

1

⁺ ENde den gantschen hoop stont op,^* ende leyden hem voor Pilatum.

+ A vers 1

* Mat. 27.a.1. Mar. 15.a.1. Ioan. 18.d.28

2

Ende begosten hem te beschuldigen, ende spraken: Desen vinden wy, dat hy dat volck af keert^† ende verbiet dat Schot den Keyser te gheuen, ende spreeckt: Hy sy Christus een Coninck.

† mat. 17.d.25 22.b.21. Rom. 13.b.7.

3

^* Ende Pilatus vraechde hem, ende sprack: Sijt ghy der Ioden Coninck? Hy antwoorde hem, ende sprack: Ghy segghet.

* mat. 27.b.11. Mar. 15.a.2. Ioan. 18.d.33.

4

Pilatus sprack tot den hooghen Priesteren, ende tot den volcke: Ick en vinde geen oorsake aen desen mensche.

5

Mer sy en lieten niet af, ende spraken: Hy heeft dat volck beroert, daer mede, dat hy gheleert heeft, hier ende daer int geheel Iootsche lant,^† ende heeft in Galilea begost, tot hier toe.

† Mat. 4.b.12.

6

Maer doen Pilatus Galileam hoorde, vraechde hy: Of hy wt Galilea ware?

7

^† Ende als hy vernam, dat hy onder Herodis Ouerheyt was, seynde hy hem ouer tot Herodes, die in die selue daghen oock tot

† Luce. 3.a.1.

[p. 37r]

Ierusalem was.

8

Ende doen Herodes Iesum sach, wert hy seer blijde, want hy had hem al lange gheern gesien.^* Want hy had veel van hem gehoort, ende hoopte, hy soude een teecken van hem sien.

* Luce. 9.a.7.

9

Ende hy vraechde hem menigherley: Maer hy en antwoorde hem niet.

10

Ende de hooghe Priesteren ende Schriftgheleerden, stonden ende verclaechden hem hert.

11

Maer Herodes met zijn Hofgesin verachtede ende bespottede hem, tooch hem een wit cleet aen, ende seynde hem weder tot Pilato.

12

⁺ Op dien dach,^† werden Pilatus ende Herodes weder te samen vrienden, wandt te voren waren sy onder malcanderen viant.

+ B vers 12

† Acto. 4.c.27.

13

Ende Pilatus riep de hooghe Priesteren, ende de Ouersten ende dat volck te samen, ende sprack tot haer:

14

^* Ghy hebt desen mensch tot my gebracht, als eenen, die dat volck af keere, ende siet, ick heb hem voor v verhoort, ende en vinde aen desen mensche der sake gheene, daer ghy hem mede beschuldicht,

* Mat. 27.b.23 Mar. 15.b.14 Ioan. 18.e.38. 19.a.4.

15

Herodes oock niet. Want ick heb v tot hem gesonden, ende siet, men heeft niet op hem ghebracht, dat des doots weert sy.

16

Daerom^† wil ick hem castijen, ende los laten.

† Ioan. 19.a.1.

17

^* Want hy moeste haer eenen nae ghewoonheyt des Feests los gheuen.

* mat. 27.b.15. Marc. 15.a.6.

18

Doen riep de gantsen hoop, ende sprack: Wech met desen,^† ende gheeft ons Barrabam los,

† Acto. 3.b.14.

19

Welck was om eens oploops, die inder Stadt gheschiedde, ende om eens moorts wille, in de gheuanckenis gheworpen.

20

Doen riep Pilatus noch eenmael tot haer, ende woude Iesum los laten. Maer si riepen, ende spraken: Cruyst, Cruyst hem.

21

Maer hy sprack ten derdenmael tot haer: Wat heeft dan dese quaets gedaen? Ick en vinde gheen oorsake des doots aen hem, daerom wil ick hem castijen ende los laten.

22

Maer si hielden aen met grooten geroep, ende eyschten, dat hy gecruyst werde. Ende haer, ende der hoogen Priesteren gheroep, nam de ouerhant.

23

^+* Ende Pilatus oordeelde, dat haer bede gheschiedde,

+ C vers 23

* Mat. 27.c.26 Ioan. 19.b.16 Acto. 3.b.14.

24

Ende liet dien los, die om des oploops ende des moorts wille, was in de gheuanckenis gheworpen, om welcken si baden: Maer Iesum ouergaf hy haren wille.

25

^† Ende als si hem wech leydden, grepen si eenen aen, Simon van Kyrenen, die daer quam vanden velde, ende leyden dat Cruys op hem, dat hijt Iesu nae droeghe.

† Mat. 27.d.32. Ioan. 19.b.17

26

Ende hem volchde na eenen grooten hoop volcks,^* ende wijuen, die beclaechden ende beweenden hem.

* Sach. 12.c.10.

27

Ende Iesus keerde hem om tot haer, ende sprac: Ghy dochteren van Ierusalem, en weenet niet ouer my, maer weenet ouer v seluen, ende ouer uwe kinderen.

28

Wandt siet, de tijt sal comen, in welcken men segghen sal: Salich zijn de onuruchtbare, ende de Lijuen, die niet ghebaert en hebben, ende de borsten, die niet ghesoocht en hebben.

29

^† Dan sullen sy beghinnen te segghen tot den Berghen: Valt op ons, ende tot den hueuelen: Bedect ons.

† Esai. 2.c.19. Iere. 7.d.36. Hose. 10.b.8. Apoca. 6.c.16 9.a.6.

30

^* Want ist datmen dat doet aenden groenen houte, wat wil dan aenden dorren gheschien?

* 1.pet. 4.c.18

31

^* Ende daer werden ooc wech geleyt twee andere quaetdoenders, dat sy met hem verdaen werdden.

* Esaie. 53.c.15. Ioan. 19.b.18.

32

Ende als sy quamen aen de stede, die daer heet galghenberch, cruysten si hem aldaer, ende de misdaders met hem, eenen ter rechter, ende eenen ter slinckerhant.

33

Ende Iesus sprack:^* Vader, vergheuet haer, want si en weten niet, wat si doen.

* Acto. 7.g.60.

34

^† Ende sy deylden zijn cleeder, ende wierpen dat lot daer om. Ende dat volck stont, ende sach toe.^‡ Ende de Ouersten met haer, bespotteden hem, ende spraken: Hy heeft de anderen gheholpen, hi helpe nv hemseluen, Is hy Christ de wtuercoren Godts.

† Psa. 22.b.19 Mat. 27.c.34 Mar. 15.c.24 Ioan. 19.c.23.

‡ Matt. 27.e.40. Marc. 15.c.31.

35

⁺ De Crijchsknechten bespotteden hem oock, traden tot hem, ende brachten hem Azijn,

+ D vers 35

36

Ende spraken: Bistu der Ioden Coninck, soo helpt v seluen.

37

^* Oock was de ouerschrift bouen hem gheschreuen, met Grieckschen ende Latijnschen, ende Hebreeuschen letteren: Dit is der Ioden Coninck.

* Mat. 27.d.36 Marc. 16.c.26 Ioan. 19.b.19.

38

Ende een vanden misdaders, die daer ghehanghen waren, lasterde hem, ende sprack: Sijt ghy Christus, so helpt v seluen, ende ons:

39

Doen antwoorde de ander, strafte hem, ende sprack: En vreest ghy v oock voor God niet, ghy die doch in ghelijcker verdoemenisse zijt?

40

Ende tis waer, wy zijn billicx daer in, wandt wy ontfanghen, wat onse daden weert zijn. Maer dese en heeft niet onbillicx gehandelt.

41

Ende sprack tot Iesu: Heere, ghedenct mijnder, wanneer ghy in uwe rijck coemt.

42

Ende Iesus sprack tot hem: Voorwaer ic seg v, Heden sult ghy met my inden Paradijse zijn.

43

^* Ende het was ontrent de seste vre. Ende daer wert een duysternisse ouer dat gheheele Lant, tot aen de neghenste vre.

* mat. 27.e.44 Mar. 15.d.33.

44

Ende de Son verloos haer schijnsel.^† Ende dat voorhancksel des Tempels schuerde midden ontwee.

† Mat. 27.f.50 Mar. 15.d.38.

45

⁺ Ende Iesus riep luyde, ende sprack:^‡ Vader, ic beueel mijnen Gheest in dijne handen. Ende als hy dat gheseyt hadde, verschiet hy.

+ E vers 45

‡ Psal. 31.a.6. Acto. 7.g.59.

46

^* Doen nv de Hooftman sach, wat daer gheschiedde, prees hy Godt, ende sprack: Voorwaer, dese is een goed Mensche gheweest.

* Mat. 27.f.53. Marc. 15.d.39

47

Ende alle dat volck, dat daer by was, ende toe sach, doen sy saghen, wat daer gheschiedde, sloeghen si aen haer borsten, ende keerden wederom.

48

Ende alle zijn bekenden stonden van verre, ende de wijuen, die hem wt Galileen waren na gheuolcht, ende sagen dat alle.

49

^† Ende siet, een Man met name Ioseph, een Raetsheer, die was een goet vroom man,

† Mat. 27.g.56 Mar. 15.e.42 Ioan. 19.d. 38.

50

Die en hadde niet bewillicht in haren Raet ende handel, die was van Arimathia der Stadt der Ioden, die oock op dat rijcke Godts wachtede,

51

Die ghinck tot Pilato, ende badt om dat Lichaem Iesu.

52

Ende namt af, ende want het in een linden cleet,^* ende leyde het in een wtgehouwen graf, daer noch noyt niemant in gelegen en hadde.

* Mat. 12.d.40 26.a.11. 27.g.59. Mar. 15.e.46

53

Ende het was de Rustdach, ende de

[p. 37v]

Sabbath brack aen.

54

^* Ende de Wijuen die met hem ghecomen waren wt Galileen, volchden hem na, ende besaghen dat graf, ende hoe zijn Lichaem gheleyt werdt.

* Luce. 8.a.2.

55

Ende si keerden wederom, ende bereyden de specerie, ende salue: Ende den Sabbath ouer,^† waren si stil, na de Wet.

† Exod. 20.b.8.