Den Bibel, Inhoudende dat Oude ende Nieuwe Testament (Biestkensbijbel)

¶ Dat .xvj. Capittel.

¶ Een ghelijckenisse vanden rijcken man, die eenen huyshouder hadde, ende hoe niemant twee heeren dienen en mach, ende Hemel ende aerde eer vergaen soude, dan een Tittel van de woorden Gods, Ende oock vanden rijcken man ende vanden armen Lazaro.

1

⁺ ENde hy sprack oock tot zijnen Iongheren: Daer was een rijck man, die hadde eenen Huyshouder, die wert voor hem berucht, als oft hy hem zijn goet verquist hadde.

+ A vers 1

2

Ende hi riep hem, ende sprack tot hem: Hoe hoor ick dat van v? Doet rekeninge van dijn huyshoudinge, want ghi en muecht nv voortaen gheen Huyshouder meer zijn.

3

De Huyshouder sprac by hem seluen:^* Wat sal ick doen? Mijn Heere neemt dat Officie van my: Grauen en can ick niet, so schame ick my te bedelen.

* Iob. 31.b.14.

4

Ic weet wel wat ick doen wil, wanneer ick nv van mijn Officie gheset worde, dat sy my in haer huysen nemen.

5

Ende hy riep tot hem, alle de Schuldenaers zijns Heeren, ende sprack tot den eersten: Hoe veel zijt ghy mijnen Heere schuldich?

6

Hy sprack: Hondert Tonnen Olys. Ende hi sprack tot hem: Neemt uwen brief set v, ende schrijft haest vijftich.

7

Daer nae sprack hy totten anderen: Ende ghy, hoe veel zijt ghy schuldich? Hy sprack: Hondert maten Terwe. Ende hy sprack tot hem: Neemt uwen brief, ende schrijft tachtentich.

8

Ende de Heere loofde den onrechtuaerdighen Huyshouder, dat hy cloeckelijck ghedaen hadde. Want de kinderen deser werelt zijn cloecker, dan de kinderen des lichts, in haren geslachte.

9

⁺ Ende ick seg v oock:^† Maect v vrienden met den onrechtuaerdigen Mammon, op dat, wanneer ghy nv ghebreck hebt, sy v aennemen inde eewighe Hutten.

+ B vers 9

† Matt. 6.c.19. 19.c.21. 1.Tim. 6.d.19

10

Wie int cleynste getrou is, die is ooc int groote ghetrou: Ende wie int cleynste onrechtueerdich is, die is ooc int groote onrechtueerdich.

11

Ist dat ghy nv inden onrechtueerdighen Mammon niet ghetrou en zijt, wie wil v dat waerachtighe bertrouwen?

12

Ende ist dat ghy inden vreemden niet getrou en zijt, wie wil v gheuen dat ghene, dat uwe is?

13

^† Gheen huysknecht en can twee Heeren dienen, oft hy sal eenen haten, ende den anderen liefhebben: Oft sal den eenen aenhanghen, ende den anderen verachten. Ghy en connet Gode niet dienen, ende den Mammon.

† Matt. 6.c.24

14

Dat alle hoorden oock de Phariseen, die waren gierich, ende bespotteden hem.

15

Ende hy sprack tot haer: Ghy zijt het, ghy die v seluen rechtueerdicht voor den menschen,^* maer Godt kent uwe herten wel. Want wat^† hooch is onder den menschen, dat is eenen grouwel voor Gode.

* Psal. 7.b.10.

† 1.Re. 16.b.7 Iudith. 9.c.15

16

^+‡ De Wet ende de Propheten propheteren tot op Iohannem: Ende van dier tijt aen, wordt dat Rijcke Gods door dat Euangelium ghepredict, ende een yegelijck dringt met ghewelt daer in.

+ C vers 16

‡ Mat. 11.b.13

17

Maer^* het is lichter, dat Hemel ende Aerde vergaen, dan dat een tittel vander Wet valle.

* Esai. 40.a.8. Matt. 5.b.18.

18

^† Wie hem scheyt van zijnen Wijue, ende trout een ander, die breect dat houwelijck: Ende wie de afghescheydene vanden Man, trout, die breect oock dat houwelijck.

† Mat. 5.d.31. 19.b.9. Mar. 10.a.11. 1.Cor. 7.b.10.

19

Daer was een Rijck Man, die cleedde hem met Purpur, ende costelijcken Lijnwaet, ende hy leefde alle daghe

[p. 33v]

heerlijcken, ende in vruechden,

20

Ende daer was een arm Man met name Lazarus, die lach voor zijn duere vol sweren,

21

Ende begeerde hem te versaden vanden Cruymen, die van des Rijcken Tafel vielen. Doch quamen de honden, ende lecten hem zijn sweren.

22

Ende het gheschiedde, dat de arme sterf, ende wert gedraghen vanden Engelen in Abrahams schoot:

23

Ende de Rijcke sterf oock, ende wert begrauen. Als hi nv inder Helle ende inder quale was, hief hi zijn oogen op ende sach Abraham van verre, ende Lazarum in zijnen schoot,

24

⁺ Riep ende sprac: Vader Abraham, ontfermt v mijnder, ende seynt Lazarum, dat hy dat wterste zijns vingers int water stippe, ende coele mijn tonge: Want ick^† lijde groote pijne in deser vlammen.

+ D vers 24

† Esa. 66.d.24 Eccle. 7.b.19.

25

Maer Abraham sprac:^‡ Ghedenct sone, dat ghy uwe goet ontfangen hebt in uwe leuen, ende Lazarus heeft daer teghen dat quaet ontfangen. Maer nv wort hy ghetroost, ende ghy wort gepijnicht.

‡ 4.Es. 9.b.10 Galat. 6.a.9. Iaco. 5.a.5.

26

Ende bouen dat alle, is tusschen ons ende v, een groote cloue beuesticht, dat die, die daer wouden van hier af varen tot v, en connen niet, ende oock niet van daer tot ons ouer varen.

27

Doen sprack hy: So bidde ick v Vader, dat ghy hem seynt, in mijns vaders huys:

28

Want ic heb noch vijf broeders dat hy haer betuyge, op dat sy oock niet en comen, in dese plaetse der quale.

29

Abraham sprac tot hem:^† Sy hebben Mosen ende de Propheten, laetse die selue hooren.

† Esa. 34.c.16. Ioan. 5.d.39. Acto. 17.b.11.

30

Maer hy sprac: Neen, Vader Abraham, maer waert datter een vanden dooden tot haer ginghe, so souden sy boete doen.

31

Hy sprack tot hem: Hooren sy Mosen ende de Propheten niet, so en sullen sy ooc niet geloouen, oft yemant vanden dooden op stonde.