Den Bibel, Inhoudende dat Oude ende Nieuwe Testament (Biestkensbijbel)

¶ Dat .xiij. Capittel.

¶ Hoe Christus een ghelijckenisse van eenen vijgeboom die geen vruchten en droech, seyde. Ende een beseten vrouwe verloste, ende veel schoone leeren dede.

1

⁺ MAer daer waren ter seluer tijt sommighe daer by, die vercondichden hem, vanden^* Galileeschen welcker bloedt Pilatus met haren offer ghemengt had.

+ A vers 1

* Act. 5.e.38.

2

Ende Iesus antwoorde, ende sprack tot haer: Meynt ghy, dat dese Galileesche, voor alle Galileeschen, sondaren gheweest zijn, daerom dat sy dat gheleden hebben?

3

Ick segge, neen:^† Maer ist dat ghy v niet en betert, soo sult ghy alle oock alsoo vergaen.

† Eccle. 17.b.19

4

Of meynt ghy, dat die achtien, op welcker den toorn in Siloa viel, ende haer versloech, schuldich gheweest zijn, voor alle menschen, die tot Ierusalem woonen?

5

Ick seg, neen: Maer ist dat ghy v niet en betert, so sult ghi alle ooc also vergaen.

6

Ende hy seyde haer dese ghelijckenisse: Daer was een die hadde eenen^† vijgenboom, die was gheplant in zijnen wijngaert, ende quam, ende socht vrucht daer op, ende en vantse niet.

† Mat. 21.b.19.

7

Doen sprack hi tot den wijngaerdenier: Siet, ick ben nv drie Iaer lanck, alle Iaer ghecomen, ende heb vrucht ghesocht op desen vijghenboom, ende en vindese niet, hout hem af,

[p. 32r]

wat verhindert hy dat lant?

8

Maer hy antwoorde, ende sprack tot hem: Heere, laet hem noch dit iaer geworden, tot dat ick rontsom hem graue, ende messe hem, of hy wilde vrucht brengen, is des niet, so hout hem daerna af.

9

Ende hy leerde in een schole op den Sabbath: Ende siet, daer was een wijf, die had eenen gheest der crancheyt achtien Iaer, ende sy was crom, ende en conde niet wel op sien.

10

Ende doense Iesus sach, riep hyse tot hem, ende sprack tot haer: Vrouwe, weest los van uwer cranckheyt.

11

Ende leyde de handen op haer. Ende terstont richtede sy haer op, ende prees Godt.

12

⁺ Doen antwoorde de Ouerste der scholen, ende^† was onwillich, dat Iesus op den Sabbath heelde, ende sprack tot den volcke:^* Daer zijn ses dagen, daermen in arbeyden sal, in den seluen coemt ende laet v heelen, ende niet op den Sabbathdach.

+ B vers 12

† namt qualijc

* Exo. 20.b.8. Deu. 5.b.12. Ezech. 20.b.12

13

Doen antwoorde hem de Heere, ende sprack: Ghy ypocrijt,^† en ontbindt niet een yegelijck van v zijnen Ossche ofte Ezel van der Cribben op den Sabbath, ende brengten ter drencke?

† Deu. 22.a.4. Luce. 14.a.5.

14

En soude dan dese niet ontbonden worden op den Sabbath, die doch Abrahams dochter is, van desen bande, die Satanas ghebonden hadde, nv wel achtien Iaer?

15

Ende als hy sulcx seyde, soo moesten haer schamen, alle die hem teghen gheweest waren. Ende alle dat volc verhuechde hem ouer alle heerlijcke daden, die van hem geschiedden.

16

Ende hy sprac: Wien is dat Rijcke Gods ghelijck? Ende wien sal ickt gelijcken?

17

^* Het is een mostert corn ghelijck, dat een mensch nam, ende wierpt in zijnen hof, ende het wies, ende werdt eenen grooten boom: Ende de voghelen des Hemels woonden onder zijn tacken.

* Mat. 13.d.31. Mar. 4.c.29.

18

^* Ende wederom sprack hy: Wien sal ick dat rijcke Gods ghelijcken?

* Matt. 13.e.33.

19

Het is eenen suerdeech ghelijck, welck een vrouwe nam,^* ende vermengdet onder drie schepel meels, tot dattet geheel suer wert.

* Gen. 18.a.6.

20

Ende^† hy ginck door Steden ende vlecken, ende leerde, ende ghinck zijnen wech na Ierusalem.

† Mat. 9.d.35. Marc. 6.a.6.

21

⁺ Ende daer sprack een tot hem: Heere, meynt ghy datter weynich salich worden?

+ C vers 21

22

Maer hy sprack tot haer:^* Worstelt daer na, dat ghy ingaet door de^† enge poorte: Want vele (dat segghe ick v) sullen daer na soecken, hoe sy daer in comen, ende en sullent niet connen ghedoen.

* Mat. 7.b.13.

† 4.Es. 7.a.7

23

^* Van die tijdt aen, als de huysweert op gestaen is, ende de duere toe gesloten heeft, soo sult ghy dan beghinnen daer buyten te staen, ende aen de duere te cloppen,^‡ ende segghen: Heere, Heere, doet ons op. Ende hy sal antwoorden ende tot v segghen: Ick en kenne v niet, van waer ghy zijt.

* Mat. 25.a.10.

‡ Mat. 25.a.11. Luce. 6.g.46

24

Soo sult ghy dan beginnen te seggen: Wy hebben voor v ghegheten ende gedroncken, ende op de Straten hebt ghy ons geleert.

25

Ende hy sal seggen:^† Ick segge v, Ick en kenne v niet, van waer ghy zijt, wijcket alle van my ghy quaetdoenders.

† Psal. 6.b.9. Mat. 7.b.23. 25.d.42.

26

^‡ Daer sal zijn huylinghe ende knersinghe der tanden, wanneer ghi sien sult Abraham ende Isaac ende Iacob, ende alle Propheten int rijcke Gods, ende v daer wtgheslooten.

‡ Mat. 8.b.12 13.f.42. 22.b.13.

27

^* Ende daer sullender comen, van Oosten ende van Westen, van Noorden ende van Suyden, die ter Tafel sitten sullen int Rijcke Gods.

* Esa. 41.d.25. Matt. 8.b.11.

28

Ende^† siet, Daer zijnder sommighe, die de laetste zijn, die sullen de eerste zijn: Ende daer zijnder sommige, die de eerste zijn, die sullen de laetste zijn.

† Mat. 19.d.30. 20.b.16. Marc. 10.c.31.

29

⁺ Op den seluen dach, quamen sommige Phariseen, ende spraken tot hem: Maect v wt, ende gaet van hier, want Herodes wil v dooden.

+ D vers 29

30

Ende hy sprack tot haer:^‡ Gaet henen, ende segt den seluen Vossche: Siet, Ick drijue Duyuelen wt, ende make gesont, heden ende morghen, ende op den derden dach sal ick een eynde nemen.

‡ Psalm. 11.a.1.

31

Nochtans moet ick heden ende morgen, ende ouermorgen wandelen, want ten can niet geschieden, dat een Propheet vergae buyten Ierusalem.

32

^* Ierusalem, Ierusalem, ghy die doodet de Propheten, ende steenicht die tot v geseynt worden, hoe dickwils heb ick uwe kinderen willen vergaderen,^‡ gelijck een Hin haren Nest onder haer vluegelen, ende ghy en hebt niet ghewilt?

* Mat. 23.e.36.

‡ 4.Esd. 1.c.30.

33

^* Siet uwe huys sal v woest gelaten worden. Want ick seg v: Ghy en sult my niet sien, tot dat het come, dat ghy sult seggen:^‡ Ghelouet sy, die daer coemt inden Name des Heeren.

* Psal. 69.d.26 Esa. 1.b.7. Iere. 7.d.33. Mich. 3.c.12.

‡ psal. 118.c.26 Luc. 19.d.38.