Den Bibel, Inhoudende dat Oude ende Nieuwe Testament (Biestkensbijbel)

¶ Dat .x. Capittel.

¶ Hoe Iesus tseuentich Iongheren vercoos ende seyndese te prediken, ende onderwees haer, hoe sy hen hebben souden, ende hoe Martha Iesum in haer herberghe ontfinck. Ende Iesus voorseyde, dat Maria Magdalena dat beste deel vercoren hadde.

1

⁺ DAer nae scheydde de Heere ander tseuentich wt, ende seyndese twee ende twee voor hem henen, in alle Steden ende plaetsen, daer hy henen wilde comen.

+ A vers 1

2

^† Ende sprack tot haer: Den Oogst is groot, maer der Arbeyders is weynich.^‡ Bidt den Heere des Oogsts, dat hy Arbeyders wt seynde in zijnen Oogst.

† Matt. 9.d.37 Ioan. 4.d.35.

‡ 2.Tess. 3.a.1.

3

Gaet henen,^* Siet, ick seynde v als Lammeren midden onder de woluen.

* Mat. 10.b.16

4

^† En draecht geenen buydel, noch tessche, noch schoen,^‡ ende en gruet niemanden op der straten.

† Matt. 10.a.9. Marc. 6.a.8.

‡ 4.Regum. 4.d.29.

5

^* Waer ghy in een huys coemt, daer spreect ten eersten: Vrede sy in desen huyse.

* mat. 10.b.12 Marc. 6.b.10

6

Ende ist dat aldaer een kint des vredes zijn sal, so sal uwen vrede op hem rusten. Maer is dies niet, so sal uwe vrede hem weder tot v keeren.

7

^† Ende inden seluen huyse blijft, eet ende drinct, wat sy hebben:^‡ Want een arbeyder is zijns loons weerdich. Ghy en sult niet vanden eenen huyse tot den anderen gaen.

† Eccli. 29.d.11. 1.Cor. 16.c.27

‡ Leui. 19.c.13. Deut. 24.c.15 Tobie. 4.c.15

8

^* Ende waer ghy in een Stadt coemt, ende sy v aennemen, daer eet, wat v voor gheset wort.

* mat. 10.b.14 Marc. 6.b.11. Acto. 13.e.51. 18.a.6.

9

Ende gheneest de

[p. 30r]

crancken die aldaer zijn, ende segt haer: Dat Rijcke Gods is na tot v ghecomen.

10

Maer waer ghi in een Stadt coemt, daer sy v niet aen en nemen, daer gaet wt op haer straten, ende spreect:

11

Oock dat stof, dat hem aen ons ghehanghen heeft van uwer Stadt, slaen wy af op v. Nochtans sult ghy weten, dat v dat Rijcke Gods na gheweest is.

12

^† Ick seg v: Het sal Sodoma verdraechlijcker vergaen in dien dage, dan sulcker Stadt.

† Mat. 11.d.24 Mar. 6.b.12.

13

^+‡ Wee v Chorazin, wee v Bethsaida: Want, waren de daden tot Tyro ende Sydon geschiet, die by v geschiet zijn, sy hadden in voortijden in sacken ende inder asschen gheseten, ende boete gedaen.

+ B vers 13

‡ Mat. 11.d.21.

14

Doch het sal Tyro ende Sidon verdraghelijcker vergaen in dat ioncste ordeel, dan v.

15

Ende ghy Capernaum, ghi die tot aenden Hemel verheuen zijt, ghy sult tot inder Hellen neder ghestooten worden.

16

^* Wie v hoort, die hoort my:^† Ende wie v veracht, die veracht my. Maer wie my veracht, die veracht den ghenen, die my ghesonden heeft.

* Mat. 10.e.40 Mar. 9.d.36. Ioan. 13.c.20.

† 1.Tes. 4.b.8

17

Ende die tseuentich quamen weder met vruechden, ende spraken: Heere, ons zijn oock de duyuelen onderdanich in uwen Naem.

18

Maer hy sprac tot haer:^‡ Ick sach den Satan wel van den Hemel vallen, als eenen blixem.

‡ Esa. 14.b.12. Apo. 12.c.14.

19

^* Siet, ic hebbe v macht gegeuen, te treden op slangen ende scorpioenen, ende ouer alle ghewelt des viants, ende niet en sal v schaden.

* mar. 16.c.18. Act. 28.a.5.

20

Nochtans daer in en verblijt v niet, dat v de gheesten onderdanich zijn,^† maer verblijt v, dat uwe namen inden Hemel gheschreuen zijn.

† Philip. 4.a.3 Apoc. 17.b.8. 20.c.15.

21

^+‡ Ter seluer vren verhuechde hem Iesus inden Gheest, ende sprac: Ick prijse v vader ende Heere des Hemels ende der Aerden,^* dat ghy sulcx verborgen hebt, den Wijsen ende Cloecken, ende hebtet geopenbaert den onmondighen. Ia Vader, also wast wel behaechlijc voor v.

+ C vers 21

‡ Mat. 11.e.25

* Prou. 11.a.2. 1.Cor. 1.d.19. 2.a.7.

22

^† My is alle dinck ouergegeuen van mijnen Vader.^‡ Ende niemant en weet, wie de Sone sy, dan alleen de Vader: Noch wie de Vader sy, dan alleen de Sone, ende wient de Sone wil openbaren.

† Mat. 11.e.27 28.c.18. Ioan. 3.e.35. 17.a.2.

‡ Ioan. 7.c.29 8.b.19. 10.b.15

23

^* Ende hy keerde hem om tot zijne Iongeren, ende sprack in sonderheyt: Salich zijn de ooghen, die daer sien, dat ghy siet.

* Mat. 13.c.16

24

Want ick segge v: Veel Propheten ende Coninghen, wouden sien dat ghy siet, ende en hebbent niet ghesien, ende hooren dat ghy hoort, ende en hebbent niet ghehoort.

25

^† Ende siet, doen stonter een Schriftgeleerde op, tempteerde hem, ende sprack: Meester, wat moet ick doen, dat ick dat eewich leuen beerue?

† Mat. 22.d.35. Mar. 12.c.28.

26

Ende hy sprack tot hem: Hoe stater in de Wet gheschreuen? Hoe leest ghy?

27

Hy antwoorde ende sprac:^* Ghy sult Godt uwen Heere lief hebben, van gheheelder herten, van gheheelder siele, van allen crachten, ende van gheheelen ghemoede:^† Ende uwen naesten, als v seluen.

* Deut. 6.b.4. 10.c.12. 30.b.6

† Leuit. 19.c.18. Rom. 13.b.9. Gal. 5.b.14. Iaco. 2.b.8.

28

Ende hy sprack tot hem: Ghy hebt recht gheantwoort, doet dat, soo sult ghy leuen.

29

⁺ Maer hy woude hemseluen rechtuaerdighen, ende sprac tot Iesu: Wie is dan mijn naeste?

+ D vers 29

30

Doen antwoorde Iesus, ende sprac: Daer was een mensch die ginck van Ierusalem af, na Iericho, ende viel onder de Moordenaers, die toghen hem wt, ende sloegen hem, ende gingen wech, ende lieten hem half doot liggen.

31

Ende het gheschiedde by gheualle, dat een Priester den seluen wech af tooch, ende doen hy hem sach, ghinck hy voorby.

32

Des seluen ghelijcken oock een Leuijt, doen hy quam by de plaetse, ende sach hem, ghinck hy voorby.

33

Maer een Samaritaen reysde, ende quam daer henen: Ende doen hy hem sach, iammerde hem zijns,

34

Ghinck tot hem, verbant hem zijn wonden, ende goot daer in oly ende wijn: Ende leyde hem op zijn beest, ende voerde hem in de herberghe, ende droech sorge voor hem.

35

Des ander daechs reysde hy wech, ende tooch wt twee penninghen, ende ghafse den Weert, ende sprack tot hem: Draecht sorghe voor hem, ende ist dat ghy wat meer wtlegghen sult, soo wil ickt v betalen, als ick weder come.

36

Welcker dunct v onder desen drien, de naeste gheweest sy, dien, die onder de Moordenaers gheuallen was?

37

Hy sprack: Die bermherticheyt aen hem dede. Doen sprack Iesus tot hem: So gaet henen, ende doet des ghelijcken.

38

Ende het gheschiedde, doen sy wandelden, ginck hy in een vlecke, daer was een Wijf met name^† Martha, die ontfinck hem in haer huys,

† Ioan. 11.a.1.

39

Ende sy hadde een suster, die hiet Maria,^‡ die sat tot Iesus voeten, ende aenhoorde zijne Redene.

‡ Deu. 33.a.3.

40

Maer Martha maeckte haer veel te doen, om hem te dienen. Ende sy tradt toe, ende sprac: Heere, en vraecht ghy daer niet na, dat my mijn Suster laet alleen dienen? Segt haer doch, dat zijt oock aengrijpe.

41

Maer Iesus antwoorde ende sprack tot haer: Martha, Martha, ghy hebt veel sorgen ende moeyten:^† Maer eenderley is van nooden.

† Psal. 27.a.4.

42

Maria heeft een goet deel wtuercoren, dat en sal niet van haer ghenomen worden.