Den Bibel, Inhoudende dat Oude ende Nieuwe Testament (Biestkensbijbel)

¶ Dat .vij. Capittel.

¶ Hoe Iesus den knecht van Centurio gesont maecte, ende eenen Weduwen sone vander doot verwecte, ende hoe Iohannes sinen Iongeren tot Iesum sant, ende een Sondersche den Heere sine voeten wiesch.

1

⁺ ENde doen hy voor den volcke wtghesproken hadde,^* ghinck hy nae Capernaum,

+ A vers 1

* Matth. 8.a.5. Ioan. 4.f.46

2

Ende eens Hooftmans knecht, dien hi weerdich hielt, lach doot cranck.

3

Ende doen hy van Iesu hoorde, seynde hy de Outsten der Ioden tot hem, ende badt hem dat hy quame, ende sinen knecht ghesont maecte.

4

Ende doen si tot Iesu quamen, baden si hem neerstelijck ende spraken: Hy ist weerdich, dat ghy hem dat bewijst,

5

Wandt hy heeft ons volck lief, ende heeft ons de Schole ghetimmert.

6

Ende Iesus ghinc met haer henen. Ende doen si nv niet verre vanden huyse en waren, seynde de Hooftman vrienden tot hem, ende liet hem seggen: Och Heere en vermoeyt v niet, Ick en bens niet weerdich, dat ghy onder mijn dack gaet,

7

Daerom en heb ic ooc my seluen niet weerdich gheacht, dat ick tot v quame,^* maer spreeckt een woort, so wort mijn Ionghen gesont.

* Psal. 107.c.20 Sapi. 16.c.12.

8

Want ick ben oock een mensche der Ouerheydt onderdaen, ende hebbe Crijchsknechten onder my, ende ick seg tot den eenen: Gaet henen, soo gaet hy henen. Ende tot den anderen: Coemt herwaerts, so coemt hi. Ende tot mijnen knecht: Doet dat, so doet hijt.

9

Ende doen Iesus dat hoorde, verwonderde hy hem zijnder, ende keerde hem om, ende sprack tot den volcke dat hem nauolchde: Ick seg v, Sulcken ghelooue en heb ic in Israel niet geuonden.

10

Ende doen die ghene, die wtgesonden waren, wederom int huys quamen, vonden si den crancken knecht ghesont.

11

⁺ Ende het gheschiedde daer na, dat hy in een stadt, (met name Nain) ghinck, ende veel van sine Iongheren ghinghen met hem, ende veel volcx.

+ B vers 11

12

Ende als hy naby der poorten der stadt quam, siet, doen droechmen eenen dooden wt, die een eenich soon zijnder Moeder was, ende sy was een Weduwe, ende veel volcks wt der stadt ghinck met haer.

13

Ende doense de Heere sach, iammerde hem haerder, ende sprack tot haer: En weent niet.

14

Ende tradt toe, ende roerde de Bare aen, ende de draghers stonden stille. Ende hy sprack: Ionghelinck, ick segghe v, staet op.

15

Ende^† de doode richtede hem op, ende begost te spreken. Ende hy gaf hem zijnder moeder.

† 3.Reg. 17.c.23 4.Re. 4.d.36 Acto. 9.f.40. 20.b.10.

16

Ende een vreese quam haer allen aen, ende presen Godt, ende spraken:^* Daer is een groot Propheet onder ons opghestaen, ende Godt heeft zijn volck besocht.

* Luc. 24.b.18 Ioan. 4.c.19. 6.b.14. 7.d.40.

17

Ende dese Reden van hem, wert verbreyt ouer dat gantsche Iootsche landt, ende in alle omligghende Landen.

18

^† Ende dat alle vercondichden Iohanni sine Iongheren.

† Matth. 11.a.2

19

Ende hy riep twee van sine Iongheren tot hem, ende seyndese tot Iesu, ende liet hem segghen: Sijt ghy, die daer comen sal? Oft sullen wy eenen anderen verwachten?

20

Ende doen de Mannen tot hem quamen, spraken si: Iohannes de Dooper, heeft ons tot v ghesonden, ende laet v seggen: Sijt ghy die daer comen sal? Oft sullen wy eenen anderen verwachten?

21

⁺ Ende ter seluer vren maecte hyder veel gesont, van sieckten ende plaghen, ende boose gheesten, ende vele blinden schencte hy dat ghesicht.

+ C vers 21

22

Ende Iesus antwoorde ende sprack tot haer: Gaet henen, ende vercondicht Iohanni, wat ghy ghesien ende gehoort hebt.^* De Blinden sien, de Lammen gaen, de Melaetschen worden reyn, de Doouen hooren, de Dooden staen op,^† den Armen wort dat Euangelium gepredict.

* Esaie. 29.d.18 35.a.5. Matt. 15.c.30.

† Esai. 61.a.1.

23

Ende salich is die, die hem aen my niet en erghert.

24

^* Ende doen de Boden Iohannis wech ghingen, begost Iesus te spreken tot den volcke van Iohanne: Wat zijt ghy wtghegaen inde woestijne te sien? Wilt ghy een Riet sien, dat vanden wint beweecht wordt?

* Matt. 11.a.7.

25

Oft wat zijt ghy wtghegaen te sien? Wilt ghy eenen mensche sien in saechten cleederen? Siet, die in heerlijcken cleederen, ende lusten leuen, die zijn inde Coninclijcke Houen.

26

Oft wat zijt ghy wtghegaen te sien? Wilt ghy eenen Propheet sien? Iae ick seg v, die daer meer is dan een Propheet.

27

Hy ist, van dien gheschreuen staet:^* Siet, Ick seynde mijnen Enghel voor dijn aensicht, die daer bereyden sal dijnen wech voor dy.

* Malac. 3.a.1. Matt. 11.b.10 Marc. 1.a.2.

28

Wandt ick seg v: Dat onder dien, die van Wijuen gheboren zijn, gheen grooter Propheet en is, dan Iohannes de Dooper:^† Maer die cleynder is int Rijcke Godts, die is grooter dan hy.

† Hebre. 2.b.9. Philip. 2.a.7.

29

Ende al dat volck dat hem hoorde, ende de Tollenaren gauen Gode recht, ende lieten haer doopen, met het doopsel Iohannis.

30

Maer de Phariseen ende Schriftgeleerden, verachteden

[p. 28r]

Godts raet, teghen haer seluen, ende en lieten haer niet van hem doopen.

31

^+* Ende de Heere sprack: Wien sal ick de menschen van dit geslacht gelijcken? Ende wien zijn si ghelijck?

+ D vers 31

* Matt. 11.c.16.

32

Sy zijn ghelijck de kinderen, die op de Marckt sitten, ende roepen teghen malcanderen, ende spreken: Wy hebben v ghepepen, ende ghy en hebt niet gedanst: Wy hebben v gheclaecht, ende ghy en hebt niet gheweent.

33

Want Iohannes de Dooper is ghecomen,^† ende en at gheen broot, ende en dranck gheenen Wijn, soo segt ghy: Hy heeft den Duyuel.

† Matt. 3.a.4. Marc. 1.a.6.

34

Des menschen Sone is ghecomen, eet ende drinckt, soo segt ghy: Siet, die mensche is een verslinder ende Wijnsuyper, der Tollenaren ende der Sondaren vrient.

35

Ende de Wijsheyt moet haer laten rechtuaerdighen van alle haren kinderen.

36

^* Ende een vanden Phariseen badt hem, dat hi met hem ate. Ende hy ginc binnen in des Phariseus huys, ende sette hem ter Tafelen.

* Mat. 26.a.6. Mar. 14.a.3. Ioan. 12.a.2.

37

Ende siet, een Vrouwe was inder Stadt, die was een Sondersche, doen die vernam, dat hy ter Tafelen sadt in des Phariseers huys, bracht si een ghelas met salue,

38

Ende tradt van achter tot sine voeten, ende weende, ende begost zijn voeten te netten met tranen,^† ende met den hayre haers hoofts te droogen, ende custe zijn voeten, ende salfdese met salue.

† Ioan. 12.a.3.

39

^+* Maer doen de Phariseus dat sach, die hem ghenoot hadde, sprack hy by hemseluen, ende seyde: Waer dese een Propheet, soo wiste hy, wie ende wattet voor een wijf is, die hem aenroert, want si is een Sondersche.

+ E vers 39

* Luce. 15.a.2.

40

Iesus antwoorde ende sprack tot hem: Simon, Ick heb v wat te segghen. Ende hy sprack: Meester, segt.

41

Daer was een Woeckeraer, die hadde twee^† Schuldenaers, die een was hem sculdich vijf hondert Penninghen, die ander vijftich,

† Mat. 18.c.24

42

Maer doen zijt niet en hadden te betalen, schenckte hijt alle beyden. Segt aen, welcker van dien sal hem aldermeest lief hebben?

43

Simon antwoorde, ende sprack: Ick houde, dien hy aldermeest gheschoncken heeft. Ende hy sprack tot hem: Ghy hebt recht gheoordeelt.

44

Ende hy keerde hem tot de Vrouwe, ende sprack tot Simon: Siet ghy dese Vrouwe wel? Ick ben ghecomen in dijn huys, ghy en hebt my gheen water ghegeuen tot mijne voeten, maer dese heeft mijne voeten met tranen ghenet, ende met dat hayr haers hoofts ghedroocht.

45

Ghy en hebt my gheenen cus ghegeuen, maer dese, nae dat si hier in ghecomen is, en heeft si niet afghelaten mijne voeten te cussen.

46

Ghy en hebt mijn hooft met Olie niet gesalft, maer si heeft mijne voeten met salue ghesaluet.

47

Daerom seg ick v: Haer zijn vele sonden vergheuen, wandt si heeft veel lief ghehadt. Maer wien weynich vergheuen wordt, die heeft weynich lief.

48

Ende hy sprac tot haer:^* Dy zijn dijne sonden vergheuen.

* Matth. 9.a.2.

49

Doen begosten die met hem ter Tafelen saten, ende spraken by haerseluen: Wie is dese, die oock de sonden vergheuet?

50

^* Ende hy sprack tot der Vrouwen: Dijn ghelooue heeft dy gheholpen, Gaet henen met vrede.

* Mar. 5.d.34.