Den Bibel, Inhoudende dat Oude ende Nieuwe Testament (Biestkensbijbel)

¶ Dat .xv. Capittel.

¶ Noch van dat lijden Christi, tot

[p. 23r]

den eynde toe. Hoe hy met luyder stemme sinen geest gaf, Hoe dat cleet des Tempels schuerde, Ende hoe hy int graf gheleyt werdt.

1

⁺ ENde terstont des morgens, hielden de hooghe Priesters eenen^† Raet, met den Outsten, ende de Schriftgheleerden, daer toe den gheheelen raet. Ende bonden Iesum, ende leydden hem henen, ende leuerden hem Pilato ouer.

+ A vers 1

† Psalm. 2.a.1. Matt. 27.a.1. Luce. 23.a.1. Ioan. 18.d.28.

2

^* Ende Pilatus vraechde hem: Sijt ghy een Coninck der Ioden? Ende hy antwoorde, ende sprac tot hem: Ghy segghet.

* Mat. 27.b.11.

3

Ende de hooghe Priesters beschuldichden hem herdt.

4

Ende Pilatus vraechde hem weder om, ende sprac: En antwoort ghy niet? Siet, hoe herdt sy v beschuldighen.

5

Maer Iesus en antwoorde niet meer, alsoo dat hem Pilatus oock verwonderde.

6

^† Ende hy plach haer op het Paesschenfeest eenen gheuanghen los te gheuen, welcken sy begheerden.

† Mat. 27.b.15

7

Ende daer was een, ghenaemt Barrabas, gheuanghen met den oproerighen, die inden oproer een moort gedaen hadde.

8

Ende dat volc ghinck henen op, ende badt, dat hy dede als hy plach.

9

Ende Pilatus antwoorde haer: Wilt ghy, dat ick v den Coninc der Ioden los gheue?

10

Want hy wiste wel, dat hem de hooghe Priesters wt nijt ouergeleuert hadden.

11

^‡ Maer de hooghe Priesters verweckten dat volck, dat hy haer veel lieuer Barrabam los gaue.

‡ Mat. 27.b.20

12

^+* Maer Pilatus antwooorde wederom, ende sprack tot haer: Wat wilt ghy dan, dat ick dien doe, dien ghy beschuldicht, hy sy een Coninck der Ioden? Sy riepen wederom: Cruyst hem.

+ B vers 12

* Mat. 27.c.22.

13

Maer Pilatus sprack tot haer:

14

Wat heeft hy quaets gedaen? Maer sy riepen noch veel meer: Cruyst hem.

15

Ende Pilatus dacht den volcke ghenoech te doen, ende gaf haer Barrabam los. Ende leuerde hen Iesum ouer, dat hy ghegheesselt ende gecruyst werde.

16

^† Ende de Crijchsknechten leydden hem binnen in dat richthuys, ende riepen te samen de gheheele schare.

† Mat. 27.d.27 Ioan. 19.a.2.

17

Ende togen hem eenen purpur aen, ende vlochten een doornen croone, ende settedense hem op,

18

Ende begosten hem te grueten: Ghegroet zijt ghy Coninck der Ioden,

19

Ende sloeghen hem dat hooft met het Riet, ende bespoghen hem, ende vielen op de knien, ende baden hem aen.

20

Ende doen si hem bespot hadden, toghen si hem het purpur wt, ende toghen hem zijn eygen cleederen aen, ende leydden hem wt, dat si hem cruysten.

21

^+† Ende dwongen eenen, die daer voorby ghinc, gheheeten Simon van Cyrene, die vanden velde quam (die een vader was Alexandri ende Ruffi) dat hy hem dat cruys droeghe.

+ C vers 21

† Mat. 27.d.32. Luce. 23.c.25.

22

Ende si brachten hem aen de plaetse Golgatha, dat is verduytst, galghen berch,

23

Ende si gauen hem Myrrhe in wijn te drincken. Ende hy en nams niet tot hem.

24

Ende doen si hem ghecruyst hadden,^* deylden si sine cleederen, ende worpen dat lot daer om, wie wat vercreghe.

* Psa. 22.b.19 mat. 27.d.34. Ioan. 19.c.23.

25

Ende het was ontrent der derder vren, doen sy hem cruysten.

26

Ende het was bouen ouer hem gheschreuen, waermen hem schuldt af gaf, Namelijck, Een Coninck der Ioden.

27

Ende sy cruysten met hem twee Moorders, eenen tot zijnder rechter hant, ende eenen ter slincker.

28

Doen werdt de Scrift veruult, die daer seyt:^* Hy is onder de Misdadighen gherekent.

* Esaie. 53.b.15

29

^† Ende die daer voorby ginghen lasterden hem, ende schuddeden haer hoofden, ende spraken: Pfy v aen, hoe fijn breect ghy den Tempel af, ende timmert hem in drie dagen:

† Mat 27.e.38. Luce. 23.d.34

30

Helpt v nv seluer, ende daelt af van den Cruyce.

31

Des seluen ghelijcken bespotteden hem de hooghe Priesters onder malcanderen met den Scriftgheleerden, ende spraken: Hy heeft ander lieden geholpen, ende en can hemseluen niet helpen.

32

Is hy Christus ende Coninck in Israel, soo dale hy nv vanden Cruyce, dat wijt sien, ende gheloouen. Ende die met hem ghecruyst waren, versmaedden hem oock.

33

^+‡ Ende na de seste vre werter een duysternisse ouer dat gheheele Lant, tot ontrent der negender vre.

+ D vers 33

‡ mat. 27.e.44 Luce. 23.d.43

34

Ende ontrent de neghenste vre, riep Iesus luyde, ende sprack: Eli, Eli, lamma asabthani? Dat is verduytst:^* Mijn Godt, mijn Godt, waerom hebdy my verlaten?

* Psal. 22.a.1.

35

Ende sommighe die daer by stonden, doen sy dat hoorden, spraken sy: Siet, hy roept Heliam.

36

^† Doen lieper een toe, ende vulde een spongie met Azijn, ende stackse op een Riet, ende ghaf hem te drincken, ende sprack: Welaen, laet sien, oft Helias comen sal, ende hem af nemen.

† mat. 27.e.47. Ioan. 19.c.29.

37

Maer Iesus riep luyde, ende verscheydde.

38

^† Ende de voorhanck in den Tempel schuerde in twee stucken, van bouen aen tot beneden wt.

† Mat. 27.f.50. Luce. 23.c.44

39

Ende de hooftman, die daer by stont teghen hem ouer, doen hy sach, dat hy met sulcken gheroep verscheydde, sprac hy: Voorwaer, dese mensche is Gods Sone gheweest.

40

^+† Ende daer waren ooc vrouwen, die van verre sulcx aen sagen, onder welcke was Maria Magdalena, ende Maria des cleynen Iacobs ende Ioses moeder, ende Salome,

+ E vers 40

† Mat. 27.f.54 Luce. 23.e.48 Ioan. 19.c.25.

41

Die hem oock nae gheuolcht waren, doen hy in Galilea was,^* ende hem ghedient hadden, ende vele andere, die met hem op nae Ierusalem ghegaen waren.

* Luce. 8.a.2.

42

^† Ende aen den auont, dewijle dattet de Rustdach was, die daer is de Voorsabbath, quam Ioseph van Arimathia, een eerbaer Raedtsheer, die oock op dat Rijcke Godts wachtede,

† Mat. 27.g.56 Luce. 23.e.49 Ioan. 19.c.38.

43

Die waechdet, ende ghinck henen in tot Pilato, ende badt om dat lichaem Iesu.

44

Ende Pilatus verwonderde hem, dat hy alreede doot was: Ende riep den Hooftman, ende vraechde hem: Oft hy langhe doot gheweest ware?

45

Ende als hijt vanden Hooftman vernomen hadde, gaf hy Ioseph dat Lichaem.

46

Ende hy cocht lijnwaet, ende nam hem af, ende wandt hem in dat lijnwaet,^† ende leyde hem in een Graf, dat was in een steenrootse gehouwen, ende

† Mat. 12.d.40 27.g.59.

[p. 23v]

wentelde eenen steen voor des Graefs duere.

47

^† Ende Maria Magdalena, ende Maria Ioses saghen toe, waer hy henen gheleyt werdt.

† Mat. 27.g.60