Den Bibel, Inhoudende dat Oude ende Nieuwe Testament (Biestkensbijbel)

¶ Dat .xvj. Capittel.

¶ Vander verrijsenisse ons Heeren, ende zijn openbaringhe, ende hoe dat hy ghebiet te prediken dat Euangelium ouer alle de Werelt, hoe hy ten Hemel gheuaren is.

1

⁺⁺ ENde doen den Sabbath voorby was, cochten Maria Magdalena, ende Maria Iacobi, ende Salome, specerije, op dat si quamen, ende salfden hem.

+ A vers 1

+ Matt. 28.a.1. Luce. 24.a.3. Ioan. 20.a.1.

2

Ende si quamen totten Graue, op eenen Sabbath dach seer vroegh, doen de Sonne op ghinck.

3

Ende si spraken onder malcanderen: Wie wentelt ons den Steen van des Graefs duere?

4

Ende si saghen derwaerts, ende werden ghewaer, dat de Steen af ghewentelt was, want hy was seer groot.

5

^* Ende si ghingen daer in, in dat Graf, ende saghen eenen Ionghelinck ter rechter hant sitten, die had een lanc wit cleet aen, ende si ontsetteden haer.^† Ende hy sprack tot haer: En ontsettet v niet. Ghy soect Iesum van Nazareth den ghecruysten: Hy is op ghestaen, ende en is hier niet. Siet daer, de plaetse, daer si hem henen leyden.

* Ioan. 20.b.11.

† Matt. 28.a.5. Luce. 24.a.4

7

Maer gaet henen, ende segtet sinen Iongheren, ende Petro, dat hy voor v henen gaen sal in Galilea,^* daer sult ghy hem sien, als hy v geseyt heeft.

* Acto. 1.b.9. 1.Cor. 15.a.5.

8

^† Ende si ghinghen snellijc wt, ende vloden vanden Graue, Want haer was een beuinghe ende ontsettinghe aen ghecomen, ende en seyden niemanden niet, want si waren beureest.

† Mat. 28.a.8 Luce. 24.a.8.

9

⁺ Als nv Iesus opgestaen was, vroech op den eersten dach der Sabbathen,^† verscheen hy ten eersten Marie Magdalene,^* van welcken hy seuen Duyuelen wt ghedreuen hadde.

+ B vers 9

† Matt. 28.a.9. Luce. 24.e.35 Ioan. 20.b.14 1.Cor. 15.a.5.

* Luce. 8.a.2.

10

Ende si ghinck henen, ende vercondichdet den ghenen, die met hem gheweest waren, die daer rouwe droeghen ende weenden.

11

Ende die selue, doen si hoorden, dat hy leefde, ende ware haer verschenen, en gheloofden zijt niet.

12

^* Daer na doender twee van haer wandelden, openbaerde hy hem onder een ander ghesteltenis, doen si op het velt ghinghen.

* Luce. 24.b.12

13

Ende die selue ghinghen oock henen, ende vercondichdent den anderen, dien en gheloofden si oock niet.

14

^† Ten laetsten, doen de elue ter tafelen saten, openbaerde hy hem, ende strafte haer onghelooue, ende haerder herten herdicheydt, dat si niet ghelooft en hadden, den ghenen die hem gesien hadden, weder opghestaen.

† Luce. 24.c.34 Ioan. 20.c.19. 1.Cor. 15.a.5.

15

Ende sprac tot haer:^* Gaet henen in de gheheele Werelt, ende predict dat Euangelium aller Creatuere.

* Mat. 28.c.19. Ioan. 15.b.16 20.c.21.

16

Wie daer ghelooft ende gedoopt wort, die sal salich worden:^† Maer wie niet en ghelooft, die sal verdoemt worden.

† Ioan. 3.c.18. 12.f.48.

17

⁺ Maer de Teeckenen, die daer volgen sullen den ghenen die daer gheloouen, zijn die:^* In mijnen Naem sullen sy Duyuelen wt drijuen,^† met nieuwen tongen spreken,

+ C vers 17

* Act. 5.b.16. 8.a.7. 16.c.18. 19.a.12.

† Acto. 2.a.4.

18

^* Slangen verdrijuen, Ende ist dat sy yet dootlijcks drincken, ten sal haer niet schaden.^† Op de crancken sullen sy de handen leggen, so salt beter met haer worden.

* Luce. 10.b.19. Acto. 28.a.5.

† Act. 28.b.9.

19

^‡ Ende de Heere, na dien hy met haer ghesproken hadde, werdt hy op genomen ten Hemel,^† ende sit ter rechter handt Godts.

‡ Luc. 24.d.50. Acto. 1.b.9.

† Acto. 7.g.56

20

Ende sy ghinghen wt, ende predicten aen allen eynden.^* Ende de Heere werckte met haer, ende becrachtichde dat woort, door nauolgende teeckenen.

* Acto. 14.a.3. Hebre. 2.a.4.

¶ Dat eynde des Euangelij S. Marcus.