Den Bibel, Inhoudende dat Oude ende Nieuwe Testament (Biestkensbijbel)

¶ Dat .xiij. Capittel.

¶ Vande destructie des Tempels, ende vande Teeckenen die voor de daghen des oordeels gheschien sullen, Ende van dat lijden zijnder wtuercoren, ende hoe hy de daghen om haren twille vercort, Ende vande valsche Propheten, ende vander toecoemst Christi, by ghelijckenisse vanden Vijchboom, ende dat wy waken sullen.

1

⁺⁺ ENde doen hy wt den Tempel ginc, sprac tot hem een van sine Iongheren: Meester, siet, welcke steenen, ende welcke timmeragie is dat.

+ A vers 1

+ Mat. 24.a.1. Luce. 21.a.5.

2

Ende Iesus antwoorde ende sprack tot hem:^* Siet ghy wel alle dese groote timmeragie?^† Niet eenen steen en sal op den anderen blijuen, die niet ghebroken en worde.

* 3.Regum. 6.b.7

† Miche. 3.c.12 Luce. 19.g.44.

3

^‡ Ende doen hy op den Olijfberch sat, tegen den Tempel ouer, vraechden hem, bysonder Petrus ende Iacobus, ende Iohannes, ende Andreas:

‡ Mat. 24.a.3 Luce. 21.b.6.

4

^* Segt ons, wanneer sal dit altemael geschien? Ende wat sal dat Teecken zijn, als dat altemael volbracht sal worden?

* Acto. 1.a.6.

5

Iesus antwoorde haer, ende begost te segghen:^† Siet toe, dat v niemandt en verleyde,

† Iere. 29.b.8. 1.Ioan. 3.a.7. 4.a.1. Ephesi. 5.a.6. Collos. 2.c.18 2.Tessa. 2.a.2.

6

Want daer sullender veel comen onder mijnen Naem, ende seggen: Ick ben Christus, ende sullender veel verleyden.

7

Maer als ghy hooren sult van oorloghen, ende oorlochs gheruchte, soo en vreest v niet. Want het moet alsoo gheschien, maer dat eynde en is noch niet daer.

8

^* Dat een volck sal hem verheffen teghent ander, ende dat een Conincrijck teghent ander, ende daer sullen gheschien Aertbeuinghen hier ende daer, ende sal zijn dieren tijt, ende verschrickinghen, dat is der noot beghin.

* Esaie. 19.a.2. 4.Esd. 13.c.31 15.a.15.

9

^+† Maer siet ghy voor v, want sy sullen v ouer leueren voor de Raetshuysen ende Scholen, ende ghy moet ghegheesselt worden, ende voor Vorsten ende Coninghen moet ghy gheleyt worden, om mijnen twille, tot een ghetuychenisse ouer haer.

+ B vers 9

† Mat. 10.b.17 24.a.9. Luce. 12.b.11. 21.b.11. Ioan. 16.a.2.

10

^‡ Ende dat Euangelium moet te voren ghepredict worden onder alle volcken.

‡ mat. 24.a.14

11

^* Wanneer sy v nv henen leyen ende ouerleueren sullen, soo en sorcht niet, wat ghy spreken sult, ende en bedenct v niet te voren, maer wat v ter seluer vre ghegheuen wort, dat spreeckt, want ghy en zijtet niet die daer spreeckt, maer de heylighe Gheest.

* Matt. 10.c.19 Luce. 12.b.12. 21.b.13.

12

^† Maer daer sal de een broeder den anderen ouerleueren totter doot, ende de Vader den sone, ende de kinderen sullen haer verheffen teghen de Ouders, ende sullense helpen dooden.

† Mich. 7.a.6. 4.Esd. 5.a.9.

13

Ende ghy sult ghehaet zijn van alleman om mijns Naems wille.^* Mer wie volstandich blijft tot aent eynde, die wordt salich.

* Matt. 10.c.22. Apoca. 2.b.10.

14

^† Maer wanneer ghy sien sult den grouwel der verwoestinge, daer de Propheet Daniel van seyt, dat hy staet, daer hi niet en behoort, (wie dat leest, die verstae het) als dan, wie in Iudea is, die vliede op de Berghen,

† Dani. 9.c.27 Mat. 24.b.15 Luce. 21.c.18.

15

Ende wie op dat dack is, die en dale niet neder int huys, ende en come daer niet in, om wat te halen wt sinen huyse.

16

⁺ Ende wie opten velde is, die en weynde hem niet om sine cleederen te halen.

+ C vers 16

17

Maer wee den beuruchten ende sooghenden in dier tijt.

18

Maer bidt dat uwe vlucht niet en geschie inden winter.

19

Wandt in dese daghen sullen sulcke droeffenissen zijn als si noyt gheweest en zijn van aenbeghin der Creatueren die Godt gheschapen heeft, tot nv toe, ende als oock niet worden en sal.

20

Ende indien de Heere dese dagen niet vercort en hadde, soo en werder gheen mensche salich: Maer om der wtuercoren wille, die hy wtuercoren heeft, heeft hy dese dagen vercort.

21

^* Wanneer nv yemandt tot dier tijt, tot v sal segghen: Siet, hier is Christus, siet, daer is hy, soo en gheloouet niet.

* Mat. 24.c.23. Luce. 17.c.23.

22

^† Want daer sullen haer valsche Christi ende valsche Propheten verheffen,^* die Teeckenen ende wonderen doen, dat sy oock de wtuercoren verleyen, indient moghelijck ware.

† Deut. 13.a.1.

* 2.Tess. 2.b.9.

23

Maer siet ghy voor v, siet, ick hebt v altemael te voren gheseyt.

24

^† Maer tot dier tijt, nae deser droeffenisse, sullen de Sonne ende Mane haren schijn verliesen,

† Ioel. 2.b.15. 3.c.10. Mat. 24.c.29 Luce. 21.c.23.

25

Ende de Sterren sullen vanden Hemel vallen, ende de crachten der Hemelen sullen haer beweghen.

[p. 22r]

26

^* Ende dan sullen si sien des menschen Sone comen inde Wolcken met grooter cracht ende heerlijcheyt.

* Danie. 7.b.13 Mat. 16.d.27 24.c.30. 25.c.31 Acto. 1.b.11. Apoca. 1.b.7.

27

Ende dan sal hy zijn Enghelen wt seynden, ende sal vergaderen zijne wtuercoren, vanden vier winden, vant eynde der Aerden, tot het eynde des Hemels.

28

^+† Aenden Vijgheboom leert een ghelijckenisse: So vroech als sine tacken sappich worden, ende bladeren crijghen, soo weet ghy, dat den Somer naby is.

+ D vers 28

† Mat. 24.c.32. Luce. 21.d.27.

29

Alsoo ooc, wanneer ghy siet, dat sulcx gheschiet, soo weet, dattet nae voor de duere is.

30

Voorwaer ick seg v: Dit geslacht en sal niet vergaen, tot dat dit alle gheschie.

31

^* Hemel ende Aerde sullen vergaen, maer mijne woorden en sullen niet vergaen.

* Psal. 102.d.27 Esai. 40.b.8.

32

^† Maer van dien dach, ende van dier vre, en weet niemant oock de Enghelen niet inden Hemel, ooc de Sone niet, maer alleen de Vader.

† Acto. 1.a.7.

33

^* Siet toe, waeckt ende bidt, wandt ghy en wetet niet, wanneert tijt is.

* mat. 24.d.42 25.a.13. Luce. 21.d.33.

34

^† Ghelijck als een mensche, die ouer velt tooch, ende verliet zijn huys, ende gaf sinen knechten macht, eenen yeghelijcken zijn werck, ende gheboot den duerwachter, hy soude waken.

† Luc. 19.a.12. 1.Tess. 5.a.6.

35

Soo waket nv, want ghy en weet niet, wanneer de heere des huys coemt: Oft hy coemt aenden Auont, oft ter middernacht, oft ontrent dat Hanen ghecraey, oft des Morgens,

36

Op dat hy niet snellijcken en come, ende vinde v slapende.

37

Maer wat ick v segghe, dat segghe ick allen: Waket.