Den Bibel, Inhoudende dat Oude ende Nieuwe Testament (Biestkensbijbel)

¶ Dat .xj. Capittel.

¶ Van den Ezels Vuelen daer onse Heere op reet, Ende vanden Vijchboom die hy vermaledijde, ende vanden raet der Phariseen, hoe sy hem mochten ombrenghen.

1

⁺ ENde doen sy naby Ierusalem quamen tot^† Bethphage ende Bethanien, aenden Olijfberch, seynde hy zijnder Iongheren twee henen,

+ A vers 1

† Mat. 21.a.1. Luc. 19.c.29.

2

Ende sprack tot haer: Gaet henen inde Vlecke, die voor v leyt, ende alsoo haest als ghy daer in coemt, sult ghy vinden een Vuelen aenghebonden, op welcke noch noyt gheen mensche gheseten en heeft, ombint dat, ende brenget hier.

3

Ende ist dat yemant tot v seyt: Waerom doet ghy dat? Soo spreeckt: De Heere behoeft zijnder, soo sal hy hem terstont hier seynden.

4

Sy ginghen henen, ende vonden dat Vuelen ghebonden by de duere, daer buyten op des weechs scheydinge, ende ontbondent.

5

Ende sommige die daer stonden, spraken tot haer: Wat maeckt ghy, dat ghy dat Vuelen ontbint?

6

Ende sy seyden tot haer, als hen Iesus gheboden hadde. Ende sy lietent toe.

7

Ende sy brachten dat Vuelen tot Iesu, ende leyden haer cleederen daer op, ende hy sat daer op.

8

^† Ende veel spreyden haer cleederen op den wech. Sommighe hieuwen Meyen vande Boomen, ende stroydense op den wech.

† 4.Re. 9.c.13. Ioan. 12.b.18.

9

Ende die voor ghinghen, ende die na volchden, riepen, ende spraken:^† Hosianna, Ghelouet sy, die daer coemt inden Naem des Heeren,

† Psal. 118.c.26.

10

Ghelouet sy dat Rijck onses Vaders Dauids, dat daer coemt inden Naem des Heeren, Hosianna inder Hoochte.

11

^+† Ende de Heere tooch in tot Ierusalem, ende ghinck inden Tempel, ende be-sach alle dinck. Ende aenden Auondt ghinck hy wt nae Bethanien met den tweluen.

+ B vers 11

† mat. 21.b.10. Luce. 19.d.45 Ioan. 2.c.14.

12

^* Ende des anderen daechs, doen sy van Bethanien ginghen, hongerde hem.

* Mat. 21.b.18.

13

Ende sach eenen^† Vijgeboom van verre, die bladeren hadde. Doen ginc hy daer toe, oft hy daer wat op vonde. Ende doen hy daer toe quam, en vant hy niet dan alleen bladeren, want het en was noch gheenen tijt, datter Vijghen zijn souden.

† Luc. 13.a.6.

14

Ende Iesus antwoorde, ende sprack tot hem: Nv en ete van v niemandt geen vrucht inder eewicheyt. Ende zijne Iongheren hoorden dat.

15

Ende^† sy quamen tot Ierusalem, ende Iesus ghinck inden Tempel, hief aen, ende dreef wt de Vercoopers ende Coopers inden Tempel, ende de Tafelen der Wisselaers, ende de stoelen der Duyuencramers, stiet hy om,

† Mat. 21.b.12. Luc. 19.d.45. Ioan. 2.a.4.

16

Ende en liet niet toe dat yemant yet door den Tempel droege.

17

Ende hy leerde, ende sprack tot haer: En stater niet gheschreuen:^* Mijn huys sal een bede huys heeten allen volcken?^† Maer ghy hebt eenen Moordenaers Cuyl daer wt ghemaeckt.

* 3.Re. 8.d.29. Esa. 56.b.7.

† Iere. 7.a.11.

18

^+‡ Ende het quam voor de Schriftgeleerden ende hooghe Priesters. Ende sy leydent daer op toe, hoe sy hem verdeden: Maer sy ontsagen haer voor hem, want alle dat volck verwonderde hem zijnder leere.

+ C vers 18

‡ Mat. 21.b.15. Ioan. 7.d.19.

19

Ende des Auonts, ginck hy wt voor de Stadt.

20

^‡ Ende des Morgens gingen sy voorby, ende saghen den Vijgheboom, dat hy verdorret was, tot op de wortel.

‡ Mat. 21.b.18.

21

Ende Petrus dacht daer op, ende sprack tot hem: Rabbi, siet, den Vijgheboom dien ghy veruloeckt hebt, is verdorret.

22

Iesus antwoorde, ende sprac tot haer:

23

^† Hebt een ghelooue aen Godt, Voorwaer ick seg v: Wie tot desen Berch sprake: Maect v op, ende werpt v inde See,^† ende en twijfelde niet in zijn herte, maer geloofde, dattet geschien soude wat hy seyt, so salt hem geschien wat hy seyt.

† Mat. 17.c.20. Luc. 17.a.6.

† Iaco. 1.a.6.

24

Daerom segghe ick v:^‡ Alle wat ghy bidt in uwen ghebeden, gelooft slechs, dat ghijt ontfanghen sult, soo salt v gheworden.

‡ Iere. 29.b.7. Ioan. 14.b.13 15.a.7. 16.c.23.

25

Ende wanneer ghy staet ende bidt,^* soo vergheeft, ist dat ghy yet teghen yemandt hebt, op dat v oock uwe Vader inden Hemel vergheue uwe misdaet.

* mat. 6.b.14 18.d.35. Luce. 17.a.3.

26

^+† Ende sy quamen weder tot Ierusalem, ende doen hy inden Tempel ghinck, quamen tot hem de hooge Priesters, ende Schriftgheleerden ende de Outste,

+ D vers 26

† Mat. 21.c.23. Luce. 20.a.2.

27

Ende spraken tot hem:^‡ Wt wat macht doet ghy dat? Ende wie heeft v de macht ghegheuen dat ghy sulcx doet?

‡ Acto. 4.b.7. 7.d.27.

28

Maer Iesus antwoorde, ende sprack tot haer: Ick wil v oock een woort vraghen, antwoort my, so wil ick v seggen, wt wat macht dat ick dat doe.

29

Dat Doopsel Iohannis, wast vanden Hemel, oft vanden menschen? Antwoordt my.

30

Ende sy dachten by haerseluen, ende spraken: Seggen wy, het was vanden Hemel, soo sal hy segghen: Waerom

[p. 21r]

en hebt ghy hem dan niet gelooft?

31

Maer segghen wy, het was vanden menschen, soo vreesen wy ons voor tvolc.^* Want si hielden alle, dat Iohannes een recht Propheet ware.

* Math. 14.a.5 Marc. 6.b.21.

32

Ende si antwoorden, ende spraken tot Iesu: Wy en wetens niet. Ende Iesus antwoorde ende sprack tot haer: Soo en segghe ick v oock niet, wt wat macht ick sulcx doe.