Den Bibel, Inhoudende dat Oude ende Nieuwe Testament (Biestkensbijbel)

¶ Dat .viij. Capittel.

¶ Van den seuen brooden, ende weynich Visschen, daer hy vier duysent menschen mede spijsde, Ende van dat Teecken, van dat hy geboot te wachten vanden deesem der Phariseen, ende van Herodes, ende vanden blinden die hy zijn ooghen opende.

1

⁺ TOt dier tijt, doen daer veel volcx was, ende en hadden niet te eten,^† riep Iesus zijne Iongheren tot hem, ende sprack tot haer:

+ A vers 1

† Matt. 15.c.23.

2

My iammert des volcx, want sy zijn nv drie daghen by my ghebleuen, ende en hebben niet te eten.

3

Ende waert dat ickse hongherich van my liete thuys gaen, so souden sy opten wech versmachten.^† Want sommighe waren van verre ghecomen.

† Esa. 60.a.4. Tob. 13.b.14.

4

Sijne Iongheren antwoorden hem: Van waer crijghen wy hier broot inder Woestijnen, dat wyse versaden?

5

^‡ Ende hy vraechde haer: Hoe veel brooden hebt ghy? Sy spraken: Seuen.

‡ matt. 14.b.17 Mar. 6.e.38. Luce. 9.b.13. Ioan. 6.a.9.

6

Ende hy geboot den volcke, dat sy haer neder setten opter Aerden. Ende hy nam de seuen brooden, ende dancte, ende bracse, ende gafse zijnen Iongheren dat syse deselue voor leyden. Ende sy leydense den volcke voor,

7

Ende hadden een weynich Viskens, ende hy dancte, ende hiet deselue oock voordragen.

8

Ende sy aten ende werden versaet, ende namen de ouergeschoten brocken op, seuen coruen.

9

Ende haerder was by vier duysent, die daer gegheten hadden. Ende hy lietse van hem.

10

⁺ Ende terstont tradt hy in een Schip met zijne Iongeren, ende quam inde Contreye Dalmanutha.

+ B vers 10

11

^† Ende de Phariseen ghingen wt, ende begosten haer met hem te beuraghen, tempteerden hem, ende begeerden van hem een teecken vanden Hemel.

† Matt. 16.a.1. Ioan. 6.d.30.

[p. 19r]

den van hem een Teecken vanden Hemel.

12

Ende hy wert suchtende in zijnen geest, ende sprac:^† Wat soect doch dit geslacht een Teeken? Voorwaer ick seg v, Desen geslachte en wort gheen Teecken ghegeuen.

† Mat. 12.d.39. Luc. 11.c.29. 1.Cor. 1.d.20.

13

Ende hy verlietse, ende tradt wederom in dat Schip, ende voer ouer.

14

^† Ende sy hadden vergheten broot met haer te nemen, ende en hadden niet meer dan een broot met haer int Schip.

† Mat. 16.a.5.

15

^‡ Ende hy geboot haer ende sprack: Siet toe, ende siet voor v voor den suerdeech der Phariseen, ende voor den suerdeech Herodis.

‡ Luce. 12.a.1.

16

Ende sy dachten ghins ende weder, ende spraken onder malcanderen: Dat ist dat wy gheen broot en hebben,

17

Ende Iesus vernam dat, ende sprak tot haer: Wat becommert ghy v doch, dat ghy geen broot en hebt? En verstaet ghy dan noch niet? Ende en sijt ghy noch niet verstandich? Hebt ghi noch een^† blint herte in v?

† Ezech. 2.a.4.

18

⁺ Hebt ghy oogen, ende en siet niet: Ende hebt ooren, ende en hoort niet?

+ C vers 18

19

^† Ende en gedenct ghy daer niet aen, doen ick vijf brooden brack onder vijf duisent, hoe veel coruen vol brocken, naemt ghy doen op? Sy spraken: Twelf.

† Mar. 6.e.39. Ioan. 6.a.9.

20

^‡ Ende doen ick de seuen brack onder vier duisent, hoe veel coruen vol brocken, naemt ghy doen op? Sy spraken: Seuen.

‡ Mat. 15.d.34 Mar. 8.a.5.

21

Ende hy sprack tot haer: Hoe en verstaet ghy dan niet?

22

Ende hy quam tot Bethsaida, ende sy brachten eenen blinden tot hem, ende baden hem, dat hy hem aenroerde.

23

Ende hy nam den blinden byder hant, ende leyde hem wt voor de Vlecke, ende spooch in zijn oogen, ende leyde zijn hant op hem, ende vraechde hem: Oft hy yet sage?

24

Ende hy sach op, ende sprack: Ick sie de menschen daer henen gaen, als of ick boomen sage.

25

Daer na leyde hy noch eenmael de handen op zijne ooghen, ende hiet hem wederom sien. Ende hy werdt weder te rechte ghebracht, dat hy alderley scherp sien conde.

26

Ende hy seynde hem thuys, ende sprack: En gaet niet henen inde Vlecke, ende en segghet oock niemanden daer binnen.

27

^+* Ende Iesus ghinck wt ende zijne Iongeren, inde Vlecken der stadt Cesaree Philippi. Ende op den weghe vraechde hy zijne Iongheren, ende sprack tot haer: Wat segghen de Lieden, wie ick sy?

+ D vers 27

* Mat. 16.b.13. Luc. 9.c.18.

28

Sy antwoorden: Sy segghen:^† Ghy zijt Iohannes de Dooper. Sommighe segghen: Ghy zijt Helias. Sommige: Ghy zijt een vanden Propheten.

† Mat. 14.a.2.

29

Ende hy sprack tot haer: Maer ghy, wat segt ghy, wie ick sy? Doen antwoorde Petrus ende sprack tot hem:^† Ghy zijt Christus .

† Ioan. 6.g.69.

30

Ende hy verboot haer, dat sy niemant van hem segghen en souden.

31

^* Ende begost haer te leeren: Des menschen Sone moet veel lijden, ende verworpen worden vanden Outsten, ende hooghe Priesters, ende Schriftgheleerden, ende ghedoot worden, ende na drie daghen weder opstaen.

* Mat. 16.c.21. 17.d.22. 20.b.18.

32

Ende hy sprack dat woort vrij openbaer. Ende Petrus nam hem tot hem, begost hem te berispen.

33

⁺ Maer hy weynde hem om, ende sach zijne Iongheren aen, ende strafte Pe-trum, ende sprack: Gaet van my ghy Satan, want ghy en meynt niet dat Godlijck maer dat menschelijck is.

+ E vers 33

34

^* Ende hy riep tot hem dat volck, tsamen met zijnen Iongheren, ende sprack tot haer: Wie my wil na volghen, die versaecke hemseluen, ende neme zijn Cruyce op hem, ende volge my na.

* Mat. 16.d.24 Luc. 9.c.23.

35

^† Want wie zijn leuen wil behouden, die salt verliesen: Ende wie zijn leuen verliest, om mijns ende des Euangeliums wille, die salt behouden.

† Matt. 10.e.39 Luc. 17.d.33. Ioan. 12.c.25.

36

Wat helpet den mensche, dat hy de gheheele werelt wonne, ende aen zijnder sielen schade lede?

37

^‡ Oft wat can de mensche geuen, daer hy zijn siele mede losse?

‡ Psa. 49.a.9

38

^* Want soo wie hem mijns ende mijnder woorden schaemt, onder desen Ouerspeligen ende sondighen gheslachte, diens sal hem ooc des menschen Sone schamen, wanneer hy comen sal inde heerlijcheyt zijns Vaders, metten heylighen Enghelen.

* matt. 10.d.32 Luce. 9.c.26. 12.a.8. 2.Tim. 2.b.12.

39

Ende hy sprack tot haer: Voorwaer ick segge v,^† Hier staender sommige, die en sullen den doot niet smaken, tot dat sy sien dat Rijcke Gods met cracht comen.

† Mat. 16.d.28 Luc. 9.c.27.