Den Bibel, Inhoudende dat Oude ende Nieuwe Testament (Biestkensbijbel)

Euangelium S. Marci.

¶ Dat .I. Capittel.

¶ Van Ioannes de Dooper, ende zijn getuychenisse van Christo, ende wat hy at, ende van zijn cleedinghe, Ende hoe Iesus van Ioanne gedoopt was, ende hoe hem de duyuel temteerde, Ende hoe hy leerde, dat de mensche hem beteren moet ende den Euangelium gheloouen, Ende hoe hy den Melaetschen suyuerde.

1

⁺ DIt is dat beghin des Euangelij van Iesu Christo den Sone Gods,

+ A vers 1

2

Als geschreuen staet in de Propheten:^* Siet, ic seynde mijnen Engel voor v, die daer bereide uwen wech voor v.

* Mala. 3.a.1. Mat. 11.b.10. Luc. 7.c.27.

3

^† Daer is een stemme eens Predikers inder woestijnen: Bereyt den wech des Heeren, maket zijne voetpaden recht.

† Esa. 40.a.3. Mat. 3.a.3. Luc. 3.a.4.

4

^* Iohannes die was inder woestijnen doopte, ende predickte van dat doopsel der boete, tot vergeuinge der sonden.

* Ioan. 3.d.23

5

Ende dat geheel Iootsche Lant ginck tot hem wt, ende die van Ierusalem, ende lieten

[p. 15v]

haer alle van hem doopen in de Iordane, ende bekenden hare sonden

6

^† Ende Iohannes was gecleet met Kemels hayren, ende met eenen leren gordel om zijn lendenen, ende at sprinchanen ende wilden honich,

† 4.Reg. 1.b.8. Mat. 3.a.4.

7

Ende predicte, ende sprack:^† Daer coemt een na my, die is stercker dan ick: Dien ick niet genoechsaem en ben, dat ick my voor hem buyghe, ende de riemen zijnder schoenen ontbinde.

† Mat. 3.b.11. Luc. 3.c.16. Ioan. 1.c.26.

8

^† Ick doope v met water^* maer hi sal v met den heylighen Gheest doopen.

† Act. 1.a.5. 11.b 16. 19.a.4.

* Ioel. 2.g.28. Act. 2.a.4. 11.b.16.

9

^‡ Ende het geschiede ter seluer tijt, dat Iesus wt Galilea van Nazareth quam, ende liet hem doopen van Iohanne in de Iordaen.

‡ Mat. 3.b.13. Luce. 3.c.21. Ioan. 1.d.22.

10

Ende ter stont clam hy wt den water, ende sach dat hem den Hemel op dede, Ende den Geest ghelijck als een duyue daer af come^† op hem.

† Esa. 42.a.1.

11

Ende daer gheschiede een stemme vanden Hemel:^† Ghy zijt mijn lieue Sone, aen dien ick een wel behaghen hebbe.

† Mat. 3.b.17. 17.a.5. Luce. 9.d.35. 2.Pet. 1.d.17.

12

^+† Ende terstont dreef hem den geest in der woestijnen, ende hy was daer inder woestijnen veertich daghen.

+ B vers 12

† Mat. 4.a.1. Luc. 4.a.1.

13

Ende wert ghetemteert van den Satan, ende was by de dieren, ende de Enghelen dienden hem.

14

^† Maer daer na als Iohannes ouer geleuert wert, quam Iesus in Galilea, ende predicte dat Euangelium vanden Rijcke Gods,

† Mat. 4.b.12. Luc. 4.b.14.

15

Ende sprac: Den tijt is veruult, ende dat Rijck Gods is na by ghecomen, doet boete, ende ghelooft aen dat Euangelium.

16

^* Ende doen hy aen de Galileesche See ginc, sach hy Simon ende Andreas zijnen broeder, dat sy hare netten inde See wierpen, want sy waren visschers.

* Mat. 4.c.18. Luce. 5.a.1.

17

Ende Iesus sprack tot haer: Volcht my na,^* Ick wil v tot menschen Visschers maken.

* Iere. 16.c.16. Eze. 47.b.10.

18

Ter stont verlieten sy haer Netten, ende volchden hem na.

19

Ende doen hy van daer een weynich voorder ginck, sach hy Iacobum den sone Sebedei, ende Iohannem zijnen broeder, dat sy de Netten int schip lapten,

20

Ende terstont riep hy haer.^† Ende sy lieten haren vader Sebedeum int Schip met den huerlingen, ende volchden hem na.

† Mat. 19.d.27 Mar. 10.d.28 Luc. 5.b.11. 18 e.28.

21

^* Ende sy gingen na Capernaum, ende terstont op de Sabbathen, ginc hy in de schole, ende leerde.

* Mat. 4.b.13 Luc. 4.d.31.

22

^† Ende sy ontsetteden haer ouer zijne leere, Want hy leerde gheweldelijck, ende niet als de Scriftgheleerden.

† Mat. 7.c.28

23

^+‡ Ende daer was een mensche in haer schole, beseten met eenen onreynen geest, die riep,

+ C vers 23

‡ Luc. 4.d.33.

24

Ende sprac: Ey hout op, wat hebben wy met v te doen, Iesu van Nazareth? Ghy zijt gecomen om ons te verderuen, ick wetet wie ghy zijt, te weten, de heylige Gods.

25

Ende Iesus dreychde hem, ende sprack: Wort stom, ende vaert van hem wt.

26

Ende de onreyne gheest scuerde hem, ende riep luyde, ende voer van hem wt:

27

Ende sy ontsetteden haer alle, also, dat sy haer onder malcanderen beuraechden, ende spraken: Wat is dat? Wat is dat voor een nieuwe leere? Hy gebiet met ghewelt den onreynen geesten, ende sy gheuen hem ghehoor.

28

Ende zijn gheruchte wert haestelijck verbreyt, rontom in de Lantpalen Galilee.

29

^* Ende sy ginghen van stonden aen wter scholen, ende quamen in dat huys Simonis ende Andree, met Iacobo ende Iohanne.

* Mat. 8.b.14. Luc. 4.d.38.

30

Ende Simons huysvrouwen moeder lach, ende hadde de cortse, ende ter stont seyden sy hem van haer.

31

Ende hy tradt tot haer, ende richtese op, ende hieltse by der hant, ende de cortse verlietse terstont, ende sy diende hen.

32

^† Ende des auonts, doen de Sonne onder gheghaen was, brachten sy alderley crancken ende besetenen tot hem,

† Mat. 8.b.16. Luc. 4.e.40.

33

Ende de gheheele stadt vergaderde haer voor de duere.

34

Ende hy holp veel crancken die met menigerley siecten beladen waren, ende dreef veel duyuelen wt, ende en liet de duyuelen niet spreken, want sy kenden hem.

35

^+* Ende des morghens stont hy op voor den dage, ende ginck wt. Ende Iesus ghinc in een woeste plaetse, ende badt aldaer.

+ D vers 35

* Luc. 4.e.42.

36

Ende Petrus, met dien die bi hem waren, volchden hem haestelijc na.

37

Ende doen sy hem vonden, spraken sy tot hem: Alle man soeckt v.

38

Ende hy sprac tot haer: Laet ons in de naeste Steden gaen, op dat ick aldaer oock predike,^* want daer toe ben ick gecomen.

* Esa. 61.a.1.

39

Ende hy predickte in hare scholen in dat gheheele Galilea, ende dreef de duyuelen wt.

40

^† Ende daer quam een melaetsch Man tot hem, die badt hem, knielde voor hem, ende sprack tot hem: Wilt ghy, soo muecht ghy my wel reynighen.

† Mat. 8.a.2. Luc. 5.b.12.

41

Ende het iammerde Iesum, ende hy reyckte de handt wt, roerde hem aen, ende sprack: Ic wilt doen, zijt gereynicht.

42

Ende als hy soo sprack, ghinc de melaetsheyt van stonden aen van hem, ende hy wert reyn.

43

Ende Iesus dreychde hem, ende dreef hem terstont van hem,

44

Ende sprac tot hem: Siet toe, dat ghi niemanden niet en segt, maer^† gaet henen ende toont v den Priester, ende offert voor uwe reyninge, wat Moses geboden heeft, tot een ghetuychenisse ouer haer.

† Leui. 14.a.2.

45

Maer doen hy wt quam begost hy, ende seyde vele daer af, ende maecte de gheschiedenisse ruchtbaer, alsoo, dat hy voortaen niet meer en conde openbaerlijck in de Stadt gaen, maer hy was daer buyten, in de woeste plaetsen, ende sy quamen tot hem, van allen eynden.