Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxviij. Capittel.

1

⁺⁺ MAer aenden Auont des Sabbaths, welcke aenbreeckt aenden morgen des eersten vyerdaechs der Sabbathen, quam Maria Magdalena, ende de ander Maria om dat graf te besien.

+ A vers 1

+ Mar. 16.a.1. Luc. 24.a.1. Ioan. 20.a.1.

2

Ende siet, daer gheschiede een groote Aertbeuinge, want de Engel des HEEREN quam af vanden Hemel, tradt henen toe, ende wentelde den steen vande duere, ende sat daer op:

3

Ende zijn gedaente was ghelijck den blicxem, ende zijn Cleet wit als de sneeu.

4

Ende de Wachters verschricten van vreese, ende werden, als waren sy doot.

5

^† Maer de Engel antwoorde ende sprac tot den Wijuen: En vreest v niet, Ic wetet dat ghy Iesum den gecruysten soeckt.

† Mar. 16.a.6. Luc. 24.a.4.

6

Hy en is hier niet, hi is verresen,^* als hy gheseyt heeft: Coemt ende siet de plaetse, daer de HEERE gheleghen heeft.

* Mat. 16.c.21.

7

⁺ Ende gaet haestelijck henen, ende segghet zijnen Iongheren, dat hy vanden dooden verresen is. Ende siet, hi sal voor v henen gaen in Galilea, daer sult ghy hem sien. Siet, ick hebt v gheseyt.

+ B vers 7

8

^† Ende si ginghen snellijck wt den graue met vreese, ende grooter vruechden, ende liepen, dat zijt zijnen Iongeren vercondichden.

† Mar. 16.b.8. Luc. 24.a.8. 1.Cor. 15.a.4.

9

Ende doen sy henen gingen om zijnen Iongheren dat te vercondigen, Siet, doen ghemoete haer Iesus, ende sprack: Sijt ghegroet. Ende sy traden tot hem, ende grepen aen zijne voeten, ende vielen voor hem neder.

10

Doen sprack Iesus tot haer: En vreest v niet, gaet henen, ende vercondighet mijnen Broederen, dat si gaen in Galilea, aldaer sullen sy my sien.

11

Maer doen sy henen ginghen, Siet, doen quamen sommighe vanden Wachters inder Stadt, ende vercondichden den hooghen Priesters, alle wat daer gheschiet was.

12

Ende sy quamen te samen met den Outsten, ende hielden eenen raet, ende gauen den Crijchsknechten ghelts ghenoech,

13

Ende spraken: Segt, Sijn Iongeren quamen des nachts, ende stalen hem, dewijle dat wy sliepen.

14

⁺ Ende of dit wt quaem voor den Lantvoocht, soo willen wy hem stillen, ende maken dat ghy seker zijt.

+ C vers 14

15

Ende sy namen dat gelt ende deden als haer geleert was. Ende sulcke Reden is ruchtbaer geworden by den Ioden, tot heden ten daghe.

16

Maer de elf Iongeren gingen in Galilea op eenen berch,^* daerse Iesus besceyden had.

* Mat. 26.c.31. Mar. 14.d.28

17

Ende doen sy hem sagen, vielen sy voor hem neder. Maer de sommige twijfelden.

18

Ende Iesus tradt tot haer, sprack met haer ende seyde:^† My is gegeuen alle gewelt in Hemel, ende Aerde.

† Mat. 11.c.27. Ioan. 3.e.35. Phili. 2.a.9. Ephe. 1.c.22.

19

Daerom^* gaet henen, ende leert alle volcken, ende dooptse inden Name des Vaders, ende des Soons, ende des heylighen Geests:

* mar. 16.b.15

20

Ende leertse houden, al wat ic v beuolen heb.^† Ende siet, ic ben by v alle daghe, tot aen de Werelt eynde.

† Ioan. 14.b.18

¶ Dat eynde des Euangelij S. Mattheus.