Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxvij. Capittel.

1

⁺ MAer des^* morghens hielden alle de hooghe Priesters, ende Outsten des volcx eenen Raet ouer Iesum, op dat sy hem dooden.

+ A vers 1

* Psal. 2.a.1. Mar. 15.a.1. Luc. 23.a.1. Ioan. 18.d.28

2

Ende bonden hem, leyden hem henen, ende leuerden hem ouer den Lantvoocht Poncio Pilato.

3

Doen dat Iudas die hem verraden had, sach, dat hy verdoemt was ter doot, beroudet hem, ende bracht de dertich siluerlinghen den hooghen Priesteren, ende den Outsten weder,

4

Ende sprack: Ick heb qualijck ghedaen, dat ick onschuldich bloet verraden hebbe. Sy spraken: Wat gaet ons dat aen? Daer siet ghi toe.

5

Ende hy wierp de siluerlinghen inden Tempel, scheyde van daer,^† ghinck henen, ende verhinck hemseluen.

† 2.Re. 17.d.23. Actu. 1.c.18.

6

Maer de hooghe Priesters namen de siluerlinghen, ende spraken: Het en dooch niet, dat wyse inde Gods kiste legghen, want het is bloetghelt.

7

Maer sy hielden eenen Raet, ende cochten daer eenen Potbackers Acker voor, tot begraeffenisse der Pelgrims.

8

Daer af is den seluen Acker ghenaemt, den Bloetacker, tot heden op den dach.

9

Doen is veruult, datter gheseyt is, door den Propheet Ieremias, daer hy spreeckt:^‡ Sy hebben ghenomen dertich siluerlinghen, daer de vercochte mede betaelt wert, welcken sy cochten vanden kinderen Israels,

‡ Iere. 32.b.9. Sac. 11.c.12.

10

Ende hebbense ghegheuen om eenen Potbackers Acker, als my de Heere beuolen heeft.

11

^+† Maer Iesus stont voor den Landtvoocht, ende de Lantvoocht vraechde hem, ende sprack: Sijt ghy der Ioden Coninck? Maer Iesus sprack tot hem: Ghy segghet.

+ B vers 11

† Mar. 15.a.2. Luc. 23.a.3. Ioan. 18.d.33.

12

Ende doen hy beschuldicht wert vanden hooghen Priesters ende Outsten, en antwoorde hy niet.

13

Doen sprack Pilatus tot hem: En hoort ghy niet, hoe hert dat sy v beschuldighen?

14

^† Ende hy en antwoorde hem niet op een woordt, alsoo dat hem oock de Lantvoocht seer verwonderde.

† Esa. 53.b.13.

[p. 14v]

15

^† Maer op dat Feest was de Lantvoocht gewoon, den volcke eenen geuanghen los te gheuen, welcken sy wilden.

† Mar. 15.a.6. Luc. 23.b.17. Ioan. 18.e.39.

16

Ende hy hadde doen ter tijt eenen sonderlijcken voor allen anderen geuangen, die hiet Barrabas.

17

Ende doen sy vergadert waren, sprack Pylatus tot haer: Welcken wilt ghy dat ick v los gheue, Barrabam oft Iesum, van dien gheseyt wort: Hy sy Christus?

18

Want hy wist wel, dat sy hem wt nijdicheyt ouer gheleuert hadden.

19

Ende doen hy op den Richtstoel sat, seynde zijn Wijf tot hem, ende liet hem segghen: En hebt niet te doen met desen Rechtuaerdighen, Ick heb heden veel gheleden inden droom van zijnen tweghen.

20

^* Maer de hooghe Priesters, ende de Outsten becouten dat volck, dat sy om Barrabas bidden souden, ende Iesum verdeden.

* Mar. 15.a.11.

21

⁺ Doen antwoorde nv de Lantvoocht ende sprack tot haer: Welcken wilt ghy van dese tween, dien ic v los geuen sal?^† Sy spraken: Barrabam.

+ C vers 21

† Mar. 15.b.15. Luc. 23.b.18. Actu. 3.b.14.

22

Pilatus sprac tot haer: Wat sal ick dan maken met Iesu, van dien gheseyt wordt: Hy sy Christus? Sy spraken alle: Laet hem cruycen.

23

De Lantvoocht sprac: Wat heeft hy dan quaets gedaen? Maer sy riepen noch meer, ende seyden: Laet hem cruycen.

24

Maer doen Pilatus sach dat hy niet en vorderde, maer datter slechs eenen veel grooteren oploop wert, nam hy water, ende wiesch de handen voor den volcke, ende sprack: Ick ben onschuldich vanden bloede deses Rechtuaerdigen, siet ghi toe.

25

Doen antwoorde dat gansche volck ende sprack:^† Sijn bloet come ouer ons, ende ouer onse kinder.

† Actu. 5.d.29.

26

^* Doen gaf hy haer Barrabam los, Maer Iesum liet hy geesselen, ende leuerde hem ouer, dat hy ghecruyst werde.

* Mar. 15.b.15 Luc. 23.c.24.

27

^+* Doen namen de Crijchsknechten des Lantvoochts Iesum tot haer in dat Richthuys, ende vergaderden ouer hem de gantsche Schare.

+ D vers 27

* Mar. 15.b.16 Ioan. 19.a.2.

28

Ende ontcleeden hem, ende deden hem eenen Purpuren Mantel aen, ende vlochten een doorne Croone, ende settense op zijn hooft, ende een Riet in zijn rechter handt.

29

Ende buychden de knien voor hem, ende bespotteden hem, ende spraken: Gegroet zijt ghy Coninck der Ioden.

30

Ende spoghen hem aen, ende namen dat Riet, ende sloeghen zijn hooft daer mede.

31

Ende doen sy hem bespot hadden, toghen sy hem den Mantel wt, ende togen hem zijn cleederen aen, ende leyden hem henen, dat sy hem Cruysten.

32

^† Ende als sy wt ghingen, vonden sy eenen mensche van Cyrenen, met namen Symon, dien dwongen sy, dat hy hem zijn Cruys droege.

† Mar. 15.c.21. Luc. 23.c.25.

33

^† Ende doen sy aen de plaetse quamen, met namen Golgatha, dat is verduyscht, Galgenberch, gauen sy hem Azijn te drincken, met Galle ghemengt. Ende doen hijt smaeckte, en woude hijt niet drincken.

† Ioan. 19.b.18

34

^‡ Doen sy hem nv gecruyst hadden, deylden sy zijne cleederen, ende worpen dat Lot daerom, op dat veruult werde, datter gheseyt is door den Propheet:^† Sy hebben mijn cleederen onder haer ghedeylt, ende ouer mijn gewaet hebben sy dat Lot geworpen.

‡ Mar. 15.c.24 Ioan. 19.c.23.

† Psal. 22.b.19.

35

Ende sy saten daer, ende bewaerden hem.

36

^‡ Ende bouen tot zijnen hoofde hechteden sy de oorsake zijns doots, beschreuen, namelijck: Dit is Iesus der Ioden Coninc.

‡ Luce. 23.d.37. Ioan. 19.b.19

37

^+* Ende doen werdender twee Moordenaers met hem ghecruyst, een ter rechter, ende een ter slincker hant.

+ E vers 37

* Esa. 53.b.15.

38

^* Maer die daer voorby gingen lasterden hem, ende schudden haer hoofden, ende spraken:

* Mat. 15.c.29. Luc. 23.d.34.

39

Ghy die den Tempel Gods in stucken breeckt, ende timmert hem in drie daghen, helpt v seluen. Sijt ghy Gods Sone, soo climt af vanden Cruyce.

40

Desgelijcken bespotteden hem oock de hooge Priesters, met den Scriftgheleerden ende Outsten, ende praken:

41

Ander Lieden heeft hy geholpen, ende en can hemseluen niet helpen.^* Is hy de Coninck Israels, soo climme hy nv af vanden Cruyce, soo willen wy hem gheloouen.

* Sap. 2.d.18.

42

^† Hy heeft Godt betrout, dye verlosse hem nv, lustet hem, want hy heeft gheseyt: Ick ben Gods Sone?

† Psal. 22.a.9. 69.a.8. 109.d.25.

43

Dat selue verweten hem oock de Moordenaers, die met hem ghecruyst waren.

44

^* Ende vander sester vren aen, wert een duysternisse ouer dat gansche Lant, tot der negenster vren toe.

* Mar. 15.d.33. Luc. 23.d.43.

45

Ende ontrent der negenster vren, riep Iesus luyde, ende sprack: Eli, Eli, lamma asabthani?^† Dat is, mijn Godt, mijn Godt, waerom hebt ghy my verlaten?

† Psal. 22.a.1.

46

Maer sommighe die daer stonden, doen sy dat hoorden, spraken sy: Die roept Eliam.

47

^† Ende terstont lieper een van haer henen, nam een Spongie, ende vuldese met Azijn, ende stacse op een Riet, ende gaf hem te drincken.

† Mar. 15.d.36. Ioan. 19.c.29.

48

Maer de andere spraken: Hout op, Laet sien, oft Elias come ende hem helpe.

49

Maer Iesus riep noch eens luyde, ende verscheyde.

50

^+* Ende siet daer, dat voorhancsel inden Tempel scuerde in twee stucken, van bouen aen, tot beneden wt.

+ F vers 50

* Mar. 15.d.38.

51

Ende de Aerde beefde, ende de steenen scuerden, ende de grauen deden haer open, ende veel lichamen der Heylighen, die daer sliepen stonden op,

52

Ende gingen wt den grauen, na zijn verrijsenis, ende quamen inde heylighe Stadt, ende verschenen velen.

53

^† Maer de Hooftman, ende die by hem waren, ende Iesum bewaerden, doen sy de Aertbeuinghe saghen, ende wat daer gheschiede, verschricten sy seer, ende spraken: Voorwaer, dese is Gods Sone gheweest.

† Mar. 15.d.39. Luc. 23.e.46.

54

^† Ende daer waren veel Wijuen, die daer van verre toesaghen, die daer Iesum nagheuolcht waren wt Galilea, ende hadden hem ghedient,

† Mar. 15.e.40

55

Onder welcke was Maria Magdalena, ende Maria de Moeder Iacobi ende Ioses, en de Moeder der kinderen Sebedei.

56

^* Ende des Auonts quam een rijc Man

* Mar. 15.e.42 Luc. 23.e.49. Ioan. 19.c.38.

[p. 15r]

van Arimathia, die Ioseph hiet, die ooc een Iongher Iesu was,

57

Die ginck tot Pilatum, ende badt hem om dat Lichaem Iesu. Doen hiet Pilatus, men soude hem dat gheuen.

58

Ende Ioseph nam dat Lichaem ende want dat in een reyn Lijwaet,

59

Ende leydet in zijn eyghen nieu graf, welck hy hadde laten wthouwen in eenen steen, ende wentelde eenen grooten steen voor de duere des grafs, ende ginck van daer.

60

^† Ende daer was Maria Magdalena, ende de ander Maria, die saten tegen ouer den graue.

† Mar. 15.e.40

61

Des tweeden daechs, die daer volcht na den rustdach, quamen de hooge Priesters ende de Phariseen te samen tot Pilato, ende spraken:

62

Heere wy hebben gedacht dat dese Verleyder sprack, doen hy noch leefde:^† Ick wil na drie daghen weder opstaen.

† Mat. 16.c.21. 17.d.23. Mar. 9.d.30. Luc. 18.d.33.

63

Daerom beueelt, datmen dat graf beware tot aenden derden dach, op dat zijne Iongers niet en comen ende stelen hem, ende seggen tot den volcke. Hy is weder opgestaen vanden dooden, ende de laetste bedriegherie ergher worde, dan de eerste.

64

Pilatus sprack tot haer: Daer hebt ghy de Wachters, gaet henen, ende verwaret als ghi weet.

65

Sy ghinghen henen, ende verwaerden dat graf met Wachters, ende besegelden den steen.