Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxv. Capittel.

¶ Vanden thien maechden, Vanden ponden, die hy zijn knechten gaf om winninghe te doen. Hoe dat hi inden laetsten dach, de goede wt de quade scheyden sal.

1

⁺ DAn sal dat Hemelrijck ghelijc zijn, thien Maechden, die haer Lampen namen, ende ghingen wt den Bruydegom te ghemoet.

+ A vers 1

2

Maer vijf van haer waren dul, ende vijf waren cloeck.

3

De dulle namen haer Lampen, maer si en namen gheen Olie met haer:

4

Maer de cloecke namen Olie in haer Vaten, met hare Lampen.

5

Doent nv de Bruydegom vertrock, werden si alle slaperich ende ontsliepen.

6

Maer ter middernacht werter een geroep: Siet, de Bruydegom coemt, gaet wt hem te gemoet.

7

Doen stonden dese Maechden alle op, ende vercierden haer Lampen.

8

Maer de dullen spraken tot den cloecken: Gheeft ons van uwen Olie, want onse Lampen gaen wt.

9

Doen antwoorden de cloecken, ende spraken: Niet also, op dat hy ons ende v niet en ontbreke. Maer gaet henen tot den Cramers, ende coopter wat voor v seluen.

10

Ende doen si henen ghinghen om wat te coopen, quam de Bruydegom, ende die daer bereydt waren, ghinghen met hem in ter bruyloft. Ende de duere wert toeghesloten.

11

Ten laetsten quamen oock de andere Maechden, ende spraken:^* Heere, Heere, doet ons op.

* Math. 7.b.21 Luce. 6.e.46.

12

Maer hy antwoorde, ende sprac: Voorwaer ick seg v, Ic en ken v niet.

13

Daerom^† waect, want ghy en weet noch dach, noch vre, in welcke des menschen Soon comen sal.

† mat. 24.d.42 Marc. 13.d.33. Luce. 12.d.40 21.d.33.

14

^+* Ghelijc als een mensch die ouer velt trock, zijn knechten riep, ende dede haer zijn goeden.

+ B vers 14

* mar. 13.d.34 Luce. 19.a.12.

15

Ende den eenen gaf hy vijf Centner, den anderen twee, den derden

[p. 13r]

eenen, eenen yegelijcken na zijnen vermoghen, ende tooch terstont wech.

16

Doen ghinck die henen, die vijf Centner ontfanghen hadde, ende handelde met den seluen, ende wan vijf ander Centner.

17

Desghelijcken oock, die twee Centner ontfanghen hadde, wan ooc twee ander.

18

Maer die eenen ontfanghen had, ginc henen, ende maecte eenen Cuyl inder Aerden, ende verborch zijns Heeren gelt.

19

Ouer eenen langen tijt, quam de Heere deser knechten, en hielt rekenschap met haer.

20

Doen tradt voort, die vijf Centner ontfangen hadde ende leyde daer vijf ander Centner op, ende sprack: Heere, ghy hebt my vijf Centner ghedaen, siet daer, ick heb daer vijf ander Centner mede ghewonnen.

21

Doen sprac zijn Heere tot hem:^† Ey ghy vroome ende ghetrouwe knecht, ghi zijt ouer weynich ghetrou gheweest, ick wil v ouer vele setten, gaet in tot ws Heeren vruechde.

† mat. 24.d.45

22

Doen tradt oock toe, die twee Centner ontfanghen hadde, ende sprack: Heere ghy hebt my twee Centner ghedaen, Siet daer, Ick heb met den seluen twee ander ghewonnen.

23

Sijn Heere sprack tot hem: Ey ghy vroome ende getrouwe knecht, ghy zijt ouer weynich ghetrou gheweest, ick wil v ouer vele setten, gaet in tot ws Heeren vruechde.

24

⁺ Doen tradt oock toe, die eenen Centner ontfanghen hadde, ende sprack: Heere, ick wiste, dat ghy een hart man zijt. Ghy maeyt daer ghy niet ghesaeyt en hebt, ende vergadert daer ghy niet ghestroyt en hebt,

+ C vers 24

25

Ende vreesde my, ghinc henen, ende verborch uwen Centner inder Aerden: Siet, daer hebt ghy dat uwe.

26

Maer zijn heere antwoorde, ende sprac tot hem: Ghy schalcke ende luye knecht, wist ghy dat ick maeye, daer ick niet ghesaeyt en hebbe, ende vergadere daer ick niet gestroeyt en hebbe,

27

So sout ghy mijn gelt den Wisselaers gedaen hebben, ende als ick gecomen ware, hadde ic dat mijne tot my ghenomen met woecker.

28

Daerom neemt van hem den Centner, ende gheeften dien, die tien Centners heeft:

29

^* Want wie daer heeft, dien sal gegeuen worden, en sal oueruloedich hebben. Maer wie niet en heeft, dien sal oock ghenomen worden dat hy heeft.

* Mat. 13.b.12. Mar. 4.c.24 Luc. 8.b.18. 19 c.26.

30

^† Ende den onnutten knecht werpt inde duysternisse, daer sal zijn huylen ende knersinghe der tanden.

† mat. 13.e.42 24.d.51. Luc. 13.c.26.

31

^‡ Maer als des menschen Soon comen sal, in zijnder heerlijcheyt, ende alle Engelen met hem, dan sal hy sitten opten Stoel zijnder heerlijcheyt,

‡ 2.Tess. 1.b.7 Mat. 16.d.27 26.f.63. Act. 1.b.11.

32

Ende alle volcken sullen voor hem vergadert worden,^* ende hy salse vanden anderen scheyden, ghelijck als een Herder de Schapen van den Bocken scheydet,

* Eze. 34.c.17

33

Ende sal de Schapen tot zijnder rechter hant setten, ende de Bocken ter slincker.

34

So sal dan de Coninc seggen tot dien tot zijnder rechter hant: Coemt ghy ghebenedijde mijns Vaders, beeruet dat Rijck^† dat v bereit is vant beginsel der werelt.

† Mat. 20.c.23

35

^‡ Want ick ben hongherich gheweest, ende ghy hebt my gespijst. Ick ben dorstich gheweest, ende ghy hebt my te drincken gegheuen.

‡ Esa. 58.b.7. Ezech. 18.a.7

36

Ick^* ben een gast geweest, ende ghy hebt my gheherbercht. Ick ben naect geweest, ende ghy hebt my gecleet.

* Heb. 13.a.2.

37

^† Ick ben cranck gheweest, ende ghy hebt my besocht: Ick ben gheuanghen gheweest, ende ghy zijt tot my ghecomen.

† Eccli. 7.d.38. 2.Tim. 1.c.17.

38

⁺ Dan sullen hem de Rechtuaerdigen antwoorden, ende segghen: Heere, wanneer hebben wy v hongherich ghesien, ende hebben v ghespijst? Oft dorstich, ende hebben v te drincken gegeuen?

+ D vers 38

39

Wanneer hebben wy v een gast gesien, ende geherbercht? Oft naect, ende hebben v ghecleet?

40

Wanneer hebben wy v cranc oft geuangen ghesien, ende zijn tot v ghecomen?

41

Ende de Coninc sal antwoorden, ende tot haer segghen:^‡ Voorwaer ick segghe v, Wat ghy gedaen hebt eenen van desen mijnen minsten broederen, dat hebt ghy my gedaen.

‡ Pro. 17.a.5. 24.d.31. Mat. 10.e.42 Ioan. 13.c.20.

42

Dan sal hy ooc seggen tot dien ter slincker hant:^* Gaet wech van my ghi veruloeckte, in dat eewige^† vier, dat daer bereyt is den Duyuel ende zijnen Enghelen.

* Psal. 6.b.9. Matt. 7.b.23. Luce. 13.c.25.

† Esa. 30.f.33. Dan. 7.b.11. Apo. 19.d.20. 20.c.10.

43

Ic ben hongerich geweest, ende ghi en hebt my niet gespijst. Ic ben dorstich geweest, ende ghy en hebt my niet te drincken gegeuen.

44

Ick ben een gast gheweest, ende ghy en hebt my niet gheherbercht. Ick ben naeckt gheweest, ende ghy en hebt my niet ghecleedt. Ick ben cranck ende gheuanghen gheweest, ende ghy en hebt my niet besocht.

45

Dan sullen sy hem ooc antwoorden, ende segghen: Heere, wanneer hebben wy v ghesien hongerich, oft dorstich, oft eenen gast, oft naeckt, oft cranck, oft geuangen, ende en hebben v niet ghedient?

46

Dan sal hy haer antwoorden ende segghen:^† Voorwaer seg ic v, wat ghy niet gedaen en hebt eenen van desen minsten, dat en hebt ghy my oock niet ghedaen.

† Sach. 2.b.8. Pro. 14.d.31. 17.a.5.

47

^‡ Ende sy sullen inde eewige pijne gaen: Maer de rechtuaerdige int eewich leuen.

‡ Ioan. 5.c.29.