Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxiiij. Capittel.

¶ Van de destructie des Tempels, Vande Teekenen der laetster dagen, Vande valsche Christenen ende valsche Propheten, Vander toecoemst Christi ons Salichmakers, Ende vander verganckenissen der Elementen.

1

⁺ ENde Iesus ghinck wech vanden Tempel,^† ende sine Ionghers traden tot hem, dat si hem toonden des Tempels timmeragie.

+ A vers 1

† Matt. 13.a.1. Luce. 21.a.5.

2

Maer Iesus sprack tot haer: En siet ghy dat altemael niet? Voorwaer ick segghe v:^* Hier en sal niet eenen steen op den anderen blijuen, die niet [in stucken] ghebroken en worde.

* Luc. 19.d.44

3

^† Ende als hy op den Olijfberch sat, traden sine Iongeren tot hem alleen, ende spraken:^* Segt ons, wanneer sal dat geschieden? Ende welck sal dat Teecken zijn uwer toecoemst, ende der werelt eynde?

† Marc. 13.a.3.

* Acto. 1.a.6.

4

^† Maer Iesus antwoorde ende sprack tot haer: Siet toe, dat v niemandt en verleyde,

† Iere. 29.b.8. Collos. 2.c.18. 2.Tessa. 2.a.2.

5

Want daer sullender veel comen onder mijnen Naem, ende segghen: Ick ben Christus, ende sullender veel verleyden.

6

Ghy sult oorloghen hooren, ende gheruchte van oorloghen, Siet toe, ende en verschrict niet, dat moet ten eersten altemael gheschieden, maer dat eynde en is noch niet daer.

7

^* Wandt deen volck sal hem verheffen teghent ander, ende deen Conincrijck teghent ander.

* 4.Esd. 13.c.31

8

Ende daer sullen zijn Pestilencien, ende dieren tijt, ende Aertbeuinghen hier ende daer, soo sal alder eerst den noot beghinnen.

9

^† Dan sullen si v ouer leueren in droeffenis, ende sullen v dooden. Ende ghy moet gehaet worden, om mijns Naems wille, van alle volcken.

† Mat. 10.b.17. Marc. 13.b.9. Luce. 21.b.11. Ioan. 15.b.20. 16.a.2. Apoc. 2.b.10.

10

Dan sullender haer veel argheren, ende sullen haer onder malcanderen verraden, ende sullen haer onder malcanderen haten.

11

Ende veel valsche Propheten sullen haer verheffen, ende sullender veel verleyden.

12

^* Ende dewijle dat de ongherechticheyt de ouerhant nemen sal, so sal de liefde in velen vercouden.

* 4.Esdre. 14.b.15. 15.a.6.

13

Maer^† wie volstandich blijft tot aent eynde, die wordt salich.

† Matt. 10.c.22 Marc. 13.b.13

14

Ende dat Euangelium vanden Rijcke, sal ghepredict worden inde gantsche werelt, tot een ghetuychenisse ouer alle volcken, ende dan sal dat eynde comen.

15

^+* Als ghy nv sien sult den grouwel der verwoestinge, daer af geseyt is door den^† Propheet Daniel, dat hy staet inde heylighe plaetse (wie dat leest, die mercke daer op)

+ B vers 15

* Mar. 13.b.14 Luce. 21.c.18.

† Dan. 9.e.27.

16

Dan vliede op de Berghen, wie int Iootsche Landt is:

17

Ende wie op dat Dac is, die en dale niet neder om wat wt sinen huyse te halen.

18

Ende wie op den velde is, die en keere niet wederom, om zijn cleederen te halen.

19

Maer wee den beuruchten ende sooghenden in die tijt.

20

Maer bidt dat uwe vlucht

[p. 12v]

niet en gheschie inden winter, oft op den Sabbath.

21

^* Want daer sal dan een groote droeffenis zijn, als niet gheweest en is van aenbeghin der werelt, tot nv toe, ende als oock niet worden en sal.

* Danie. 12.b.11

22

Ende indien dese daghen niet en werden vercort, so en werder gheen mensche salich. Maer om der wtuercoren wille, soo worden de daghen vercort.

23

^† Ist datter dan yemant tot v sal segghen: Siet, hier is Christus, oft daer, so en sult ghijt niet gheloouen.

† Marc. 13.c.21. Luce. 17.c.23.

24

Want daer sullen valsche Christenen, ende valsche Propheten opstaen,^‡ ende groote Teeckenen ende wonderen doen, dat oock de wtuercoren (waert moghelijck) in dwalinghe verleyt worden.

‡ Deut. 13.a.1. 2.Tessa. 2.b.9

25

⁺ Siet, ick hebt v te voren gheseyt.

+ C vers 25

26

Daerom, als si tot v sullen segghen: Siet, hy is inder woestijnen, so en gaet niet wt: Siet, hy is in de Camer, so en geloouet niet.

27

Want ghelijck als den blicxem opgaet vanden opganck, ende schijnt tot den onderganc toe, alsoo sal oock zijn de toecoemst des menschen Soons.

28

^* Maer waer een Aes is, daer vergaderen haer de Aernen.

* Iob. 39.d.33. Luce. 17.d.37

29

^† Maer terstont na de droeffenis der seluer tijt, sullen de Sonne ende Mane den schijn verliesen,^‡ ende de Sterren sullen vanden Hemel vallen, Ende de crachten der Hemelen sullen haer beweghen.

† Esai. 13.b.10 Ioel. 2.g.31. Mar. 13.c.24 Luce. 21.c.23.

‡ Apoc. 6.c.13.

30

^* Ende dan sal verschijnen dat Teeken des menschen Soons inden Hemel. Ende dan sullen huylen alle gheslachten op Aerden,^† ende sullen sien comen des menschen Soon, inde Wolcken des Hemels, met grooter cracht ende heerlijcheyt.

* mat. 16.d.27 25.c.31.

† Actu. 1.b.11. 2.Tessa. 1.b.7

31

^‡ Ende hy sal wtseynden sine Enghelen met helle Basuynen, ende si sullen vergaderen zijn wtuercoren, vanden vier winden, vanden eenen eynde des Hemels, tot den anderen.

‡ 1.Tess. 4.b.16

32

^* Aenden Vijchboom leert een ghelijckenis. So vroech als sinen tack sappich wort, ende bladeren crijcht, so weet ghy, dat de Somer na by is.

* Marc. 13.d.28 Luce. 21.d.27.

33

Also ooc, als ghy dat alle siet, so weet ghy, dat het na voor de duere is.

34

Voorwaer ick segghe v: Dit gheslachte en sal niet vergaen, tot dat dit alle gheschie.

35

^† Hemel ende Aerde sullen vergaen, maer mijne woorden en sullen niet vergaen.

† Esaie. 40.a.8 51.b.6.

36

^* Maer van dien dach, ende van die vre en weet niemant, oock de Enghelen niet inden Hemel, dan alleen mijn Vader.

* Acto. 1.a.7.

37

^+† Maer ghelijck alst was inde tijt van Noe, also sal oock zijn de toecoemst des menschen Soons.

+ D vers 37

† Genesis. 6. 7. Luce. 17.c.26.

38

Want ghelijck als si waren inden daghen voor de Diluuie, si aten, si droncken, si trouden, ende lieten haer trouwen, tot den dach toe, dat Noe inder Arcken ghinck,

39

Ende si en achtedens niet, tot dat de Diluuie quam, ende namse alle wech. Also sal oock zijn de toecoemst des menschen Soons.

40

^* Dan sullender twee opten Velde zijn, de een sal aenghenomen, ende de ander sal verlaten worden.

* Luce. 17.d.34

41

Twee sullender malen in de Muelen, de eene sal aenghenomen, ende de andere sal verlaten worden.

42

^* Daerom waket, want ghy en weet niet, op wat vre dat v Heere comen sal.

* Matt. 25.a.13 Marc. 13.d.33. Luce. 21.d.33.

43

^† Maer dat sult ghy weten: Wanneer een Huysuader wiste, in wat vre dat de dief comen woude, soo soude hy ymmer waken, ende in zijn huys niet laten breken.

† Luce. 12.d.39 1.Tessa. 5.a.2. 2.Petri. 3.b.10 Apoca. 16.c.15

44

Daerom weest ghy ooc bereyt, want des menschen Soon sal comen tot eender vren, wanneer ghijt niet en meynt.

45

^* Maer wie is nv een ghetrou ende cloeck knecht, dien zijn Heer gheset heeft ouer zijn ghesinne, op dat hy haer ter rechter tijt spijse gheue?

* Mat. 25.b.21. Luce. 13.d.42

46

^† Salich is de knecht, als zijn Heer coemt, ende vint hem alsoo doende:

† Apoca. 16.c.15

47

Voorwaer ick segghe v, hy sal hem ouer all zijn goeden setten.

48

^* Maer ist dat de boose knecht sal in zijn herte seggen: Mijn Heere en coemt noch langhe niet.

* Prou. 13.b.13.

49

Ende begint zijn medeknechten te slaen, eet ende drinct met den dronckenen,

50

So sal de Heere des seluen knechts comen, inden dach, des hy hem niet en versiet, ende in de vre, die hy niet en meynt,

51

Ende sal hem in stucken houwen, ende sal hem zijnen loon gheuen, met den Huychelaers,^† daer sal wesen huylinge ende knersinge der tanden.

† Math. 8.b.12. 13.c.26.