Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxiij. Capittel.

¶ Hoe Iesus den Phariseen berispt, vanden wtwendigen schijn te maken.

1

⁺ DOen sprac Iesus tot den volcke, ende tot sine Iongheren, ende seyde: Op Moses stoel sitten de Schriftgheleerden ende Phariseen:

+ A vers 1

2

^* Al wat si v nv seggen, dat ghy houden sult, dat hout, ende doetet. Maer nae haer wercken en sult ghy niet doen.^† Sy segghent wel, ende en doens niet.

* Deut. 17.c.17

† Roma. 2.b.21

3

Maer^‡ si binden sware ende ondraechlijcke packen, ende legghense de menschen op den hals, maer si en willen de selue niet met eenen vinger aenroeren.

‡ Esaie. 10.a.1 28.b.10. Luce. 11.d.46

4

Maer alle haer wercken doen si, dat si vanden lieden gesien worden. Sy maken hare dencbrieuen breet, ende de soomen aen haer cleederen groot.

5

Sy^* sitten gheern bouen aen ter Tafelen, ende inde Scholen.

* Marc. 12.d.38 Luce. 20.e.45

6

Ende hebbent geern, dat si gegroet worden op de Merct, ende vanden menschen Rabbi ghenoemt worden.

7

Maer ghy en sult v niet Rabbi laten noemen. Want een is v Meester, Christus, maer ghy zijt alle broeders.

8

Ende en sult niemanden Vader heeten op Aerden, want een is v Vader, die inden Hemel is.

9

⁺ Ende ghy en sult v niet laten meester heeten, want een is uwe meester, Christus.

+ B vers 9

10

De grootste onder v, sal uwe dienaer zijn.

11

^† Wandt wie hemseluen verhoocht, die wordt vernedert: Ende wie hemseluen vernedert, die wort verhoocht.

† Luce. 14.b.11. 18.b.14. Iaco. 4.b.10.

12

^* Wee v Scriftgheleerde ende Phariseen, ghy^‡ huychelaers, ghy die dat Hemelrijc toe sluyt voor de menschen: Ghy en coemt daer niet in: Ende die daer in willen, die en laet ghy niet ingaen.

* Luce. 11.e.52

‡ Geueynsde.

13

^† Wee v Schriftgheleerde ende Phariseen, ghy huychelaers, ghy die der Weduwen huysen op eet, ende dat onder eenen schijn van langhe gebeden: Daerom sult ghy des te meerder verdoemenisse ontfanghen.

† Mar. 12.d.40 Luce. 20.e.46

14

Wee v Schriftgheleerde ende Phariseen, ghy huychelaers, ghy die Landt ende water om trect, dat ghy eenen Iodeghenoot maect. Ende als hijt geworden is, so maect ghy wt hem, een kint der Hellen, tweeuoudich meer dan ghy zijt.

15

⁺ Wee v verblinde leyders, ghy die segt: Wie daer sweert byden Tempel, dat en is niet: Maer wie daer sweert byden goude aenden Tempel, die is schuldich.

+ C vers 15

16

Ghy Sotten ende blinden, wat is grooter? Dat gout, oft den Tempel, die dat

[p. 12r]

gout heylicht?

17

Wie daer sweert byden Altaer, dat en is niet: Maer wie sweert byden offer dat daer op is, die is schuldich.

18

Ghy Sotten ende blinden, wat is grooter? Den offer, oft den Altaer, dat den offer heylicht?

19

Daerom, wie daer sweert byden Altaer, die sweert byden seluen, ende by allen dat daer op is.

20

Ende wie daer sweert byden Tempel, die sweert byden seluen, ende by dien, die daer in woont.

21

^* Ende wie daer sweert byden Hemel, die sweert byden stoel Godts, ende by dien die daer op sidt.

* Math. 5.d.34

22

^† Wee v Schriftgheleerden ende Phariseen, ghi huychelaers, ghi die daer vertient de Munte, Dille, ende Comijn, ende laet achter dat swaerste inder Wet, te weten,^* dat oordeel, de barmherticheyt, ende dat ghelooue: Dit soudemen doen, ende tghene niet achter laten.

† Luce. 11.d.42

* Hosee. 6.b.11. Mich. 6.b.8.

23

Ghy verblinde leyders, ghy die muggen sijghet, ende Kemelen opsloct.

24

^† Wee v Schriftgheleerden ende Phariseen, ghy huychelaers, ghy die den Beker ende Schotel buyten reyn hout, maer binnen ist vol roofs ende gulsicheyts.

† Luce. 11.d.39.

25

Ghy blinde Phariseen,^* reynicht eerst dat binnenste aenden beker ende schotele, op dat ooc dat buytenste reyn worde.

* Titum. 1.c.15.

26

^+† Wee v Schriftgheleerden ende Phariseen, ghy huychelaers, ghy die ghelijck zijt, als de bewitte grauen, die buyten fijn schijnen, mer binnen zijn si vol dooder beenen, ende aller onreynicheyt.

+ D vers 26

† Luc. 11.d.44.

27

Also ghy ooc, van buyten schijnt ghy voor den menschen vroom, maer binnen zijt ghi vol geueynstheyts ende onduechts.

28

^* Wee v Schriftgheleerden ende Phariseen, ghi huychelaers, ghy die der Propheten grauen timmert, ende verchiert der Rechtueerdighen grauen,

* Luce. 11.e.47

29

Ende spreect: Waren wy in onser Vaderen tijden geweest, so en wouden wy niet deelachtich zijn met haer, aender Propheten bloet.

30

^* Soo gheeft ghy ymmers ouer v seluen ghetuychenis, dat ghy kinderen zijt, der gheender die de Propheten ghedoot hebben.

* Acto. 7.f.52. 1.Tessa. 2.c.15

31

Welaen, veruult ghy oock de mate uwer Vaderen.

32

Ghy^† Slangen, ghi Aderen geslachte, hoe wilt ghy der helscher verdoemenisse ontloopen?

† Matth. 3.a.7 Luce. 3.b.7.

33

⁺ Daerom, siet,^* Ick seynde tot v Propheten, ende Wijsen, ende Scriftgeleerden, ende der seluer sult ghy sommige dooden ende Cruycen, ende sommighe sult ghy^† gheesselen in uwe Scholen, ende sultse veruolgen, van de een Stadt tot de ander,

+ E vers 33

* mat. 10.b.16 Luce. 11.e.49 Ioan. 16.a.2.

† Acto. 5.e.41. 7.g.52.

34

Op dat ouer v come, alle dat rechtueerdige bloet, dat opter Aerden gestort is, vanden bloede des Rechtueerdighen^* Abels aen,^† tot op dat bloet Sacharias des soons Barachie, welcken ghy gedoot hebt, tusschen den Tempel ende Altaer.

* Genes. 4.b.8.

† 2.Para. 24.d.20.

35

Voorwaer ick seg v, dat sulcx altemael ouer dit gheslachte comen sal.

36

^* Ierusalem, Ierusalem, ghy die doot de Propheten, ende steenicht die tot v ghesonden zijn: Hoe^† dickwils heb ick uwe kinderen willen vergaderen, ghelijc als een Henne haer kiecxkens vergadert onder hare vlueghelen, ende ghy en hebt niet ghewilt?

* Luce. 13.d.32.

† 4.Esd. 1.c.30

37

Siet,^* v huys sal woest ghelaten worden.

* Psal. 69.d.26 Ierem. 7.d.33. Acto. 1.d.20.

38

Want ic seg v: Ghy en sult my van nv aen niet sien, tot dat ghy spreect:^† Ghelouet sy, die daer coemt inden Naem des Heeren.

† Luce. 19.d.38