Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxj. Capittel.

¶ Hoe Iesus te Ierusalem op den Ezel gereden quam, Hoe hy de coopers ende vercoopers wt den Tempel sloech, Hoe den vijchboom dorre wert, Hoe Christus gheuraecht wert in wiens macht hy sine Teekenen dede, Stellende een parabole vanden vader die sinen sone inden wijngaert sant, Bewijsende dat openbaer sondaers voor de Phariseen inden Hemel comen sullen, Ende vanden wijngaerdeniers die dooden, die tot haer ghesonden werden.

1

⁺ DOen si nv nae by Ierusalem quamen^* tot Bethphage aenden Olijfberch, seynde Iesus zijnder Iongeren twee henen,

+ A vers 1

* Marc. 11.a.1. Luce. 19.c.29.

2

Ende sprack tot haer: Gaet henen in de vlecke, die voor v leyt. Ende terstont sult ghy vinden een Eselin aenghebonden, ende een vuelen by haer, ontbintse, ende brengtse tot my.

3

Ende ist dat v yemandt yet seyt, soo spreect: De HEERE behoeft haerder, ende terstont sal hyse v laten.

4

Ende dat gheschiede altemael, op dat veruult werde, datter gheseyt is door den Propheet die daer spreect:

5

^† Segt der dochter Sion: Siet, dijn Coninc coemt tot v saechtmoedich, ende rijdt op eenen Esel, ende op een vuelen der lastdraghender Ezelinne.

† Sacha. 9.b.9 Esaie. 62.c.11. Ioan. 12.b.15.

6

De Ionghers ghinghen henen, ende deden ghelijc haer Iesus beuolen hadde,

7

Ende brachten de Ezelin ende dat vuelen, ende leyden haer cleederen daer op, ende setten hem daer op.

8

Ende veel volcks spreyde de cleederen op den wech. De andere hieuwen tacken vanden boomen, ende stroydense op den wech.

9

Ende dat volck, dat voor ghinc ende na volchde, riep ende sprack: Hosianna den sone Dauid.^† Ghelouet sy, die daer coemt inden Naem des HEEREN, Hosianna inder hoochte.

† Psal. 118.c.26

10

^+* Ende als hi tot Ierusalem in trock, werdt de gheheele Stadt beroert, ende sprack: Wie is die?

+ B vers 10

* Marc. 11.b.15

11

Ende het volck seyde: Dat is Iesus, de Propheet van Nazareth wt Galilea.

12

^† Ende Iesus ghinc tot den Tempel Godts in, ende dreef daer wt alle Vercoopers ende Coopers inden Tempel, ende stiet der Wisselaers Tafelen om, ende de stoelen der duyuen cramers,

† Luce. 19.d.45 Ioan. 2.b.14.

13

Ende sprac tot haer: Daer staet gheschreuen:^† Mijn huys sal een bedehuys heeten, maer ghy hebt eenen moorders cuyl daer wt ghemaect.

† 3.Reg. 8.d.29. Esai. 56.b.7. Ierem. 7.a.11.

14

Ende blinden ende lamme ghingen tot hem inden Tempel, ende hy heeldese.

15

Maer doen de hooge Priesters ende Schriftgheleerden sagen de wonderen, die hy dede, ende de kinderen inden Tempel roepende ende seggende: Hosianna den sone Dauid, werden si toornich,

16

Ende spraken tot hem: Hoort ghy ooc wat dese segghen? Iesus sprack tot haer: Ia. En hebt ghy noyt ghelesen:^* Wt den mont der onmondighen ende soochkinderen hebt ghy lof bereyt?

* Psalm. 8.a.2.

17

Ende hy lietse daer, ende ghinck ter Stadt wt nae Bethanien, ende bleef aldaer.

18

^† Maer doen hy des morgens weder inde stadt ghinck, hongerde hem.

† Marc. 11.b.12

19

Ende hy sach eenen^* vygeboom aenden wech, ende hy ghinck daer na toe, ende en vanter niet op, dan alleen bladeren, ende hy sprack tot hem: Nv en wasse op v voortaen nemmermeer gheen vrucht. Ende de vijgheboom verdorrede terstont.

* Luce. 13.a.6.

20

⁺ Ende doen dat de Ionghers sagen, verwonderden si haer ende spraken: Hoe is de vijgheboom so haest verdorret?

+ C vers 20

21

Maer Iesus antwoorde ende sprack tot haer: Voorwaer ick segge v,^† Ist dat ghy een ghelooue hebt, ende niet en twijfelt, soo en sult ghy niet alleen sulcx met den vijgheboom doen, maer ist dat ghy sult segghen tot desen Berch: Maect v op, ende

† Mat. 17.c.20 Luce. 17.a.6.

[p. 11r]

werpt v in de See, soo salt gheschieden.

22

^* Ende al wat ghy bidt int ghebet, ist dat ghy ghelooft, so sult ghijt ontfangen.

* Marc. 11.c.24 Ioan. 14.b.13 15.a.7. 16.c.23

23

^† Ende als hy inden Tempel quam, traden tot hem, doen hy leerde, de hooge Priesters, ende Outsten int volck, ende spraken:^‡ Wt wat macht doet ghy dat? Ende wie heeft v de macht ghegheuen?

† mar. 11.d.26 Luce. 20.a.1.

‡ Exo. 2.b.14. Acto. 4.a.7. 7.d.27.

24

Maer Iesus antwoorde, ende sprac tot haer: Ick wil v ooc een woort vragen, ist dat ghy my dat segt, so wil ick v ooc segghen, wt wat macht ick dat doe.

25

Van waer was dat doopsel Iohannis? Wast vanden Hemel, oft vanden menschen? Doen dachten si by haer seluen ende spraken: Segghen wy, het sy vanden Hemel geweest, so sal hy tot ons seggen: Waerom en gheloofde ghy hem dan niet?

26

Ende seggen wy, het sy vanden menschen gheweest, so moeten wy ons voor den volcke vreesen,^† want si hielden Iohannem altemael voor eenen Propheet.

† Mat. 14.a.5.

27

Ende si antwoorden Iesu, ende spraken: Wy en wetens niet. Doen sprac hy tot haer: Soo en segghe ick v oock niet, wt wat macht ick dat doe.

28

Maer wat dunct v? Een man hadde twee sonen, ende ghinck tot den eersten, ende sprack: Mijn sone, gaet henen, ende arbeyt heden in mijnen wijnberch.

29

Ende hy antwoorde, ende sprack: Ick en wils niet doen, daer nae beroudet hem, ende ghinck henen.

30

⁺ Ende hy ghinck tot den anderen, ende sprac des ghelijcx. Ende hy antwoorde ende sprack: Heere, Ia.^† Ende en ghinck niet henen.

+ D vers 30

† Ezech. 33.f.31.

31

Welcke vanden beyden heeft des vaders wil gedaen? Sy spraken tot hem: De eerste. Iesus sprack tot haer: Voorwaer ick segghe v, De Tollenaers ende Hoeren, moghen wel eer in het Hemelrijc comen dan ghi.

32

^* Iohannes quam tot v, ende leerde v den rechten wech, ende ghy en geloofde hem niet: Maer de Tollenaers ende Hoeren gheloofden hem. Ende al saecht ghijt wel, nochtans en deedt ghy euen wel gheen boete, dat ghy hem daer nae oock ghelooft hadt.

* Math. 3.a.4.

33

Hoort een ander ghelijckenis:^† Daer was een Huysvader, die plantede eenen wijnberch, ende trocker eenen Tuyn rontsom, ende groeffer een wijnpersse in, ende timmerde eenen toren, ende verhuerde hem den Wijngaerdeniers, ende tooch ouer velt.

† Genes. 9.c.20. Esaie. 5.a.1. Ierem. 12.b.10 Mar. 12.a.1. Luce. 20.a.9.

34

Doen nv den tijt der vruchten aen quam, seynde hy zijn knechten tot den Wijngaerdeniers, dat si zijne vruchten ontfingen.

35

Doen namen de Wijngaerdeniers^* sine knechten, den eenen gheesselden si, den anderen dooden si, den derden steenichden si.

* 4.Esd. 2.e.32

36

Wederom seynde hy ander knechten wt, meer dan der eerster waren, Ende si deden haer des ghelijcx.

37

Daer na seynde hy sinen sone tot haer, ende sprack: Sy sullen haer voor mijnen soon ontsien.

38

Maer doen de Wijngaerdeniers den soon saghen, spraken sy onder malcanderen:^* Dat is de Erfgenaem,^† coemt, laet ons hem dooden, ende zijn erfgoet aen ons brenghen.

* Hebre. 1.a.2.

† Genesis. 37.d.19.

39

⁺ Ende sy namen hem, ende stieten hem ten wijnberghe wt, ende dooden hem.

+ E vers 39

40

Als nv de Heere des Wijnberchs comen sal, wat sal hy desen Wijngaerdeniers doen?

41

Sy spraken tot hem: Hy sal de booswichten geheel qualijc verdoen ende zijnen wijnberch anderen Wijngaerdeniers verhueren, die hem de vruchten ter rechter tijt geuen.

42

Iesus sprack tot haer: En hebt ghy noyt ghelesen inder Scrift?^* Den steen, dien de Timmerlieden verworpen hebben, die is tot eenen hoecsteen gheworden. Vanden Heere is dat geschiet, ende het is wonderlijc voor onsen oogen.

* Psal. 118.c.22. Esaie. 8.a.6. 28.d.16. Acto. 4.a.11. Roma. 9.d.33 1.Petri. 2.a.7

43

Daer om segge ick v: Dat Rijcke Gods sal van v ghenomen, ende den Heydenen gegeuen worden, die sine vruchten brengen.

44

^† Ende wie op desen steen valt, die sal in stucken breken.^‡ Maer op wien hy valt, dien sal hy vermorselen.

† Sacha. 12.a.3

‡ Dan. 2.e.34

45

Ende doen de hooghe Priesters ende Phariseen zijn ghelijckenissen hoorden, verstonden sy, dat hy van haer sprack.

46

^* Ende sy stonden daer na, hoe sy hem grepen, mer si vreesden haer voor den volcke,^† want het hielt hem voor eenen Propheet.

* Marc. 11.c.18. Luc. 19.d.47 20.b.19.

† Ioan. 7.d.40 Luce. 7.b.16.