Den Bibel, Inhoudende dat Oude ende Nieuwe Testament (Biestkensbijbel)

¶ Dat .xvij. Capittel.

¶ Hoe Iesus opten berch Tabor, zijnen Iongheren hem vertoonde, Ende dat Helias nv gecomen was. Hoe hi een kint genas, dat metter maensucht ghequelt wert, Ende vanden penninck die in eens visch mont vonden wert.

1

⁺ ENde^* na ses daghen nam Iesus tot hem Petrum ende Iacobum, ende Iohannem zijnen broeder, ende leydese besijden af op eenen hooghen berch,

+ A vers 1

* Marc. 8.a.1. Luce. 9.d.28.

2

Ende wert voor haer verclaert.^† Ende zijn aensicht blincte als de Sonne, ende zijn cleederen werden wit als een licht.

† Apoca. 1.c.14

3

Ende siet, doen verscheen hem Moses ende Elias, die spraken met hem.

4

Ende Petrus antwoorde ende sprack tot Iesum: HEERE, hier ist goet zijn, Wildy, so willen wy hier drie Hutten maken, v eene, Mosi eene, ende Elie eene.

5

Doen hy noch alsoo sprack, Siet, doen ouerschadudese een lichte Wolcke. Ende siet, een stemme wt der Wolcken sprac:^† Dit is mijn lieue Soon, aen welcken ick een welbehaghen hebbe,^‡ Dien sult ghy hooren.

† Esaie. 42.a.1. Matt. 3.b.17. Marc. 1.a.11. 9.a.6. Ioan. 1.b.14.

‡ Deut. 18.c.15

6

Doen dat de Iongeren hoorden, vielen sy op haer aensicht, ende verschricten seer.

7

Maer Iesus tradt tot haer, roerdese aen, ende sprack: Staet op, ende en vreest v niet.

8

Maer doen sy haer oogen op hieuen, en saghen sy niemanden dan Iesum alleen.

9

^+* Ende doen sy vanden Berch neder ghingen, gheboot haer Iesus, ende sprac: Ghy en sult dit gesicht niemanden seggen, tot dat des Menschen Sone vanden dooden weder op ghestaen is.

+ B vers 9

* Marc. 9.a.8. Luce. 9.d.37.

10

Ende^† zijn Iongheren vraechden hem, ende spraken: Wat segghen dan de Scriftgheleerde:^‡ Helias moet eerst comen?

† Marc. 9.b.10

‡ Malac. 4.a.5

11

Iesus antwoorde ende sprac tot haer: Helias sal ymmers eerst comen, ende alle dingen te recht brengen.

12

^† Doch ick segge v: Helias is alreede ghecomen, ende sy en hebben hem niet gekent, maer hebben aen hem ghedaen, wat sy wilden. Also sal oock des menschen Sone van haer moeten lijden.

† Matt. 11.b.11. Luce. 1.b.13.

13

Doen verstonden de Ionghers, dat hy van Iohanne den Dooper tot haer ghesproken hadde.

14

^* Ende doen sy tot den volcke quamen, tradt een mensce tot hem, ende viel hem te voete,

* Marc. 9.b.16. Luce. 9.d.38.

15

⁺ Ende sprack: HEEre, ontfermt v ouer mijnen sone, want hi is maensuchtich, ende heeft een swaer lijden. Hy valt dickwils int vier, ende dicwils int water.

+ C vers 15

16

Ende ick heb hem tot uwen Iongheren ghebracht, ende sy en conden hem niet helpen.

17

Ende Iesus antwoorde, ende sprack: O ghy ongheloouighe ende verkeerde aert, hoe langhe sal ick by v zijn? Hoe langhe sal ick v verdraghen. Brengt hem my herwaerts.

18

Ende Iesus dreychde hem, ende de Duyuel voer van hem wt, ende de Ionghelinck wert ghesont ter seluer vre.

19

^* Doen traden sine Iongers tot hem alleen, ende spraken: Waerom en conden wy hem niet wtdrijuen?

* Marc. 9.c.27.

20

Iesus antwoorde ende sprack tot hen: Om ws ongheloofs wille.^† Want ic segge v voorwaer: In dien ghy een gelooue hebt, als een mostert coorn, so muecht ghy tot desen berch seggen: Maect v van hier derwaerts, so sal hy hem wech maken, ende v en sal niet onmoghelijck zijn.

† Matt. 21.c.21. Luce. 17.a.6.

21

Maer desen aert, en vaert niet wt, dan door bidden ende vasten.

22

⁺ Ende doen si in Galilea verkeerden,^* sprack Iesus tot haer: Het is toecomende, dat des menschen Sone ouergeleuert sal worden, in der menschen handen,

+ D vers 22

* Math. 16.c.21 20.b.18. Marc. 8.d.31. 9.d.30. 10.d.33

23

Ende si sullen hem dooden, ende des derden daechs sal hy weder opstaen. Ende si werden seer bedroeft.

24

Doen si nv tot Capernaum quamen, ghinghen die tot Petrum, die den cijns penninck ontfinghen, ende spraken:^† En plach uwe Meester den cijns penninck niet te gheuen? Hy sprack: Ia.

† Roma. 13.b.7

25

Ende als hi int huys quam, quam hem Iesus voor, ende sprack: Wat dunct v Simon? Van wien nemen de Coninghen op Aerden den Tol oft cijns? Van haren kinderen, oft vanden vreemden?

26

Doen sprack Petrus tot hem: Vanden vreemden. Iesus sprack tot hem: So zijn de kinderen vrij.

27

^* Maer op dat wijse niet en argheren, soo gaet henen aen de See, ende werpt den anghel wt, ende den eersten visch, die hem op gheeft, dien neemt: Ende als ghy sinen mont op doet, sult ghy eenen^* Stater vinden, den seluen neemt ende gheeften hen voor my ende v.

* Math. 22.c.21

* Haluen gulden.