Den Bibel, Inhoudende dat Oude ende Nieuwe Testament (Biestkensbijbel)

¶ Dat .xvj. Capittel.

¶ Van de leeringhe der Phariseen. Hoe Iesus sprack, dat hy zijn kercke timmeren soude op de belijdinge des gheloofs. Hoe Petrus van Christo ghestraft wert, Ende dat een yeghelijck zijn cruys draghen moet, Ende dat de sommighe de doot niet sien en sullen, voor dat si den Soon des menschen in zijn Rijck en sien.

1

⁺ DOen traden de Phariseen ende Saduceen tot hem,^* die tempteerden hem, ende eyschten, dat hi haer een Teecken vanden Hemel liete sien.

+ A vers 1

* Mat. 12.d.38. Marc. 8.b.11. Ioan. 6.d.30.

2

Maer hy antwoorde, ende sprack:^† Des auonts segt ghy: Het sal eenen schoonen dach worden, want den Hemel is root.

† Luc. 12.f.54

3

Ende des morghens segt ghy: Het sal heden een onweder zijn, wandt den Hemel is root ende duyster. Ghy Huychelaers, des Hemels ghedaente condt ghy ordeelen, en condt ghy dan oock de teeckenen deser tijt niet ordeelen?

4

^* Dese boosen ende ouerspelighen aert, soect een teecken, ende haer en sal geen teecken ghegheuen worden,^† dan alleen dat teecken des Propheten Ionas. Ende hy verlietse, ende ghinck van daer.

* Mat. 12.d.39. Luce. 11.c.29.

† Ione. 1.c.17.

5

^* Ende als sine Iongheren ouer waren gheuaren, hadden si vergheten broot met haer te nemen.

* Marc. 8.b.14

6

Ende Iesus sprac tot haer:^† Siet toe, ende wacht v voor den suerdeech der Phariseen ende Saduceen.

† Luce. 12.a.1.

7

Doen dachten si by haer seluen, ende spraken: Dat salt zijn, dat wy geen broot met ons ghenomen en hebben.

8

Doen dat Iesus vernam, sprac hy tot haer: Ghy cleyn gheloouighen, wat becommert ghy v doch, dat ghy geen broot met v genomen en hebt?

9

En verstaet ghy noch niet?^* En ghedenckt ghy niet aen de vijf brooden, onder de vijf duysent, ende hoe veel coruen ghy doen op naemt?

* Mat. 14.c.19.

10

^† Oock niet aen de seuen brooden onder de vier duysent, ende hoe veel coruen ghy doen op naemt?

† Mat. 15.d.34

11

⁺ Hoe en verstaet ghy dan niet, dat ic v niet en segge vanden broode, als ick seg: Wacht v voor den suerdeech der Phariseen ende Saduceen?

+ B vers 11

12

Doen verstonden si, dat hi niet geseyt en hadde, dat si haer wachten souden voor den suerdeech des broots, maer voor de leeringhe der Phariseen ende Saduceen.

13

^* Doen quam Iesus in de gheleghentheyt der Stadt Cesaria Philippi, ende vraechde zijnen Iongheren, ende sprack: Wat segghen de Lieden wie des menschen sone sy?

* Mar. 8.d.27. Luce. 9.c.18.

14

Sy spraken: Sommighe seggen:^† Ghy zijt Ioannes de Dooper. Die anderen: Ghy zijt Helias. Sommighe: Ghy zijt Ieremias, oft een vanden Propheten.

† Mat. 14.a.2.

15

⁺ Hy sprac tot haer: Wat segt ghi dan, wie ick sy? Doen antwoorde Simon Petrus, ende sprac:

+ C vers 15

16

Ghy^* zijt Christus des leuendighen Gods sone.

* Ioan. 6.g.69.

17

Ende Iesus antwoorde, ende sprack tot hem: Salich zijt ghy Simon Ionas soon, want vleesch ende bloet, en heeft v dat niet gheopenbaert,^* maer mijn Vader inden Hemel.

* Mat. 11.e.25. Ioan. 6.e.44.

18

Ende ick segghe v oock: Ghy zijt Petrus, ende op desen^† Steen, wil ic bouwen mijn Ghemeynte.^* Ende de Poorten der Hellen, en sullense niet ouerweldighen.

† 1.Cor. 10.a.4 Esa. 28.b.16.

* 1.Pa. 18.b.9

19

^‡ Ende ick wil v gheuen de Sluetelen des Hemelrijcx. Alle wat ghi op Aerden binden sult, sal ooc inden Hemel gebonden zijn: Ende alle wat ghy opter Aerden ontbinden sult, sal ooc inden Hemel ontbonden zijn.

‡ Matth. 18.b.18. Ioan. 20.c.23.

20

Doen verboot hy zijnen Iongheren, dat zijt niemanden segghen en souden, dat hy Iesus de Christus ware.

21

^* Van die tijt aen, begost Iesus, ende dede sinen Iongheren condt, Hoe dat hy moeste na Ierusalem gaen, ende veel lijden, vanden Outsten ende hooghe Priesters, ende Schriftgheleerden, ende ghedoot worden, ende op den derden dach weder opstaen.

* Mat. 17.d.22. 20.b.18. Mar. 8.d.31. Luc. 9.c.22. 18.d.31. 24.a.6.

22

⁺ Ende Petrus nam hem tot hem, voer hem aen, ende sprack: Heere, verschoont v seluen, dat en moet v gheensins ouer comen.

+ D vers 22

23

Maer hy keerde hem om, ende sprack tot Petro: Maect v van my Sathan, ghy zijt my ergherlijc, want ghy en meynt niet wat godlijck, maer wat menschelijck is.

24

Doen sprack Iesus tot sinen Iongheren:^* Wil my yemandt nae volghen, die versake hem seluen, ende neme zijn cruys op hem, ende volghe my nae.

* Mat. 10.e.38. Mar. 8.e.34. Luce. 9.c.23. 14.d.27.

25

^† Want wie zijn leuen wil behouden, die salt verliesen: Maer wie zijn leuen verliest, om mijnent wille, die salt vinden.

† Ioan. 12.c.25. Mat. 10.e.39. Mar. 8.e.35. Luce. 17.d.33.

26

Wat helpet den mensche, al waert dat

[p. 9r]

hy de geheele werelt wonne, ende naem doch schade aen zijnder sielen?^* Oft wat can de mensch gheuen, daer hy zijn siel weder mede losse:

* Psal. 49.a.9.

27

^† Want het sal ymmers geschien, dat des menschen Soon sal comen inde heerlijcheyt zijns vaders met zijnen Enghelen.^‡ Ende dan sal hy verghelden eenen yeghelijcken na zijne wercken.

† Mat. 24.c.30.

‡ Marc. 8.e.39. Luce. 9.c.27. Roma. 2.a.6. 2.Cor. 5.b.10.

28

Voorwaer ick segge v: Hier staender sommige die den doot niet smaken en sullen, tot dat sy des Menschen soon sien comen in zijn Rijck.