Den Bibel, Inhoudende dat Oude ende Nieuwe Testament (Biestkensbijbel)

¶ Dat .xiiij. Capittel.

¶ Hoe Iohannes Baptista onthooft werdt. Hoe vijf duysent Mannen, met vijf brooden ende twee Visschen ghespijst werden. Hoe Iesus op de zee wandelde. Ende hoe hy Petrum verloste, die by na verdroncken was. Hoe Iesus int Lant Genasar veel crancke menschen ghenas.

1

⁺ DOen ter tijt quam dat gherucht van Iesu voor den Viervorst Herodis:

+ A vers 1

2

^* Ende hy sprac tot zijnen knechten: Dese is Iohannes de Dooper. Hi is vanden dooden weder opgestaen, daerom doet hy sulcke daden.

* Marc. 6.b.15 Luc. 9.a.7.

3

^† Want Herodes had Iohannem gheuangen, gebonden, ende inde gheuanckenis gheleyt, van weghen Herodias zijns broeders Philippus Wijf.

† Mar. 6.b.18. Luc. 3.c.19.

4

Want Iohannes hadde tot hem gheseyt:^† Het en is nyet recht dat ghyse hebt.

† Leu. 18.b.16.

5

Ende hi had hem geern gedoot, maer hy ontsach dat volc,^* want sy hielden hem voor eenen Propheet.

* Matt. 21.c.26

6

^† Als nv Herodes zijnen Iaerdach hielt, doen danste de dochter Herodias voor hen, dat behaechde Herodi wel.

† Ge. 40.c.20 Matt. 6.c.22.

7

Daeromme beloefde hy haer met eenen Eedt, hy woude haer geuen wat si eyschen soude.

8

Ende als sy te voren van haerder Moeder toegestooct was, sprac sy: Geeft my hier in een Schotel dat hooft Iohannes des Doopers.

9

Ende de Coninck wert truerich, nochtans om des Eedts wille, ende der gheender die met hem ter Tafel saten, beual hijt haer te gheuen.

10

⁺ Ende seynde henen, ende onthoofde Iohannem inder geuanckenisse.

+ B vers 10

11

Ende zijn hooft wert gebracht in eender Schotelen, ende den Meysken gegeuen: Ende si brachtet haerder Moeder.

12

Doen quamen zijne Iongers, ende namen zijn Lichaem, ende begroeuent, ende quamen, ende vercondichdent Iesu.

13

^* Doen dat Iesus hoorde, weec hy van daer op een Schip, in een Woestijne alleen.^† Ende doen het volck dat hoorde, volchdet hem na te voet, wt den Steden.

* Mar. 6.d.31. Luc. 9.b.10.

† Ioan. 6.a.2.

14

Ende Iesus ginc voort, ende sach dat groote volck, ende hem iammerde der seluen, ende heelde hare crancken.

15

Ende des Auonts traden zijne Iongeren tot hem, ende spraken: Dit is een Woestijne, ende den nacht coemt aen, laet dat volck van v, dat sy inde Vlecken gaen, ende haer spijse coopen.

16

Maer Iesus sprack tot haer: Ten is niet van nooden, dat sy henen gaen, gheeft ghy haer te eten.

17

Sy spraken: Wy en hebben hier niet dan vijf brooden ende twee visschen.

18

⁺ Ende hy sprack: Brengtse my herwaerts.

+ C vers 18

19

Ende hy hiet dat volck neder sitten op dat gras, ende nam de vijf brooden, ende de twee visschen, sach op ten Hemel, ende dancte, ende brackse, ende gaf de brooden den Iongheren, ende de Ionghers gauense den volcke.

20

Ende si aten alle, ende werden versaedt. Ende

[p. 8r]

namen op, datter ouer bleef van brocken, twaelf coruen vol.

21

Ende die daer ghegeten hadden, waren by vijf duysent mannen, sonder de Wijuen ende kinderen.

22

^† Ende terstont^* dreef Iesus sine Iongheren, dat si in dat Schip traden, ende voor hem ouer voeren, tot dat hy dat volck van hem liete.

† Marc. 6.e.45 Ioan. 6.b.17.

* Dwanck.

23

Ende doen hy dat volck van hem ghelaten hadde,^† clam hy op eenen berch alleen, om te bidden. Ende des auonts was hy aldaer alleen,

† Luce. 6.b.12.

24

Ende dat Schip was midden op de zee, ende leet noot vanden baren, want de wint was haer tegen.

25

Maer inder vierder nachtwake, quam Iesus tot haer, ende ghinc op de zee.

26

Ende doen hem de Ionghers sagen op de zee gaen, verschricten si, ende spraken: Het is een ghedrocht, ende riepen van vreesen:

27

Maer terstont sprac Iesus met hen ende seyde: Hebt eenen goeden moet, Ick bent, en vreest niet.

28

⁺ Maer Petrus antwoorde hem, ende sprack: Heere, zijt ghijt, so heet my tot v comen opt water.

+ D vers 28

29

Ende hy sprack: Coemt. Ende Petrus tradt wt den Schepe, ende ghinck opt water, dat hy tot Iesum quame.

30

Maer hy sach eenen stercken wint, doen verschricte hy, ende begost te sincken, riep, ende sprack: HEEre, helpt my.

31

Ende Iesus reyckte terstont zijn hant wt, ende greep hem, ende sprack tot hem: O ghy cleyn gheloouighe, waerom twijfelt ghy?

32

^† Ende si traden in dat Schip, ende de wint ghinck ligghen:

† Marc. 6.f.52.

33

Ende die int Schip waren, quamen, ende vielen voor hem neder, ende spraken: Ghy zijt voorwaer Godts soon.

34

Ende si scheepten ouer, ende quamen in dat Lant Genazeret.

35

Ende als de Lieden van de selue plaetse zijnder ghewaer werden, schicten si wt in dat Lant rontom, ende brachten alderley onghesonden tot hem,

36

Ende baden hem: Dat sy slechts den soom zijns cleedts aenroeren mochten. Ende alle die daer aenroerden, werden ghesont.