Den Bibel, Inhoudende dat Oude ende Nieuwe Testament (Biestkensbijbel)

¶ Dat .xj. Capittel.

¶ Hoe Iohannes sine Discipulen tot Iesum sant, Ende hoe Iesus totten Scharen van Iohannes sprac. Hoe Iesus de steden strafte, die gheen boete gedaen en hadden: Hoe Iesus dat sinen Vader belijdende was. Ende hoe dat zijn Iock soete is, ende zijnen last licht.

[p. 6r]

1

⁺ ENde het geschiede, doen Iesus sulcke gheboden, tot sinen twaelf Ionghers voleynt had, ghinck hy van daer voort, om te leeren ende te prediken in hare Steden.

+ A vers 1

2

^* Ende als Iohannes inder geuanckenis, de wercken Christi hoorde, seynde hy twee van sine Ionghers henen, ende liet hem seggen:

* Luce. 7.b.18.

3

Sijt ghy die daer comen sal, oft sullen wy eenen anderen verwachten?

4

Iesus antwoorde ende sprack tot haer: Gaet henen, ende segt Iohanni wederom, wat ghy siet ende hoort:

5

^† De Blinde sien, ende de Lamme gaen, de Melaetsche werden reyn, ende de Dooue hooren, de Doode staen op,^* ende den Armen wordt dat Euangelium ghepredict.

† Esaie. 35.a.5.

* Esaie. 61.a.1.

6

Ende salich is die, die hem aen my niet en arghert.

7

^† Doen die henen ghinghen, begoste Iesus te spreken, tot den volcke van Iohanne: Wat zijt ghy wtghegaen inder Woestijnen te sien? Wout ghy een Riet sien, dat den wint herwaerts ende derwaerts waeyt?

† Luce. 7.c.24.

8

Oft wat zijt ghy wtghegaen te sien? Wout ghy een mensch in saechte cleederen sien? Siet, die daer saechte cleederen draghen, die zijn inder Coninghen huysen.

9

⁺ Oft wat zijt ghy wtgegaen te sien? Wout ghy eenen Propheet sien? Ia ick seg v, die oock meer is, dan een Propheet.

+ B vers 9

10

Want dese ist, van dien gheschreuen staet:^* Siet, ick seynde mijnen Enghel voor v henen, die uwen wech voor v bereyden sal.

* Malac. 3.a.1. Marc. 1.a.2. Luce. 7.c.27.

11

Voorwaer ick seg v: Onder allen, die van Wijuen gheboren zijn, en isser niemant opgecomen, die grooter si, dan Iohannes de Dooper.^† Maer die de cleynste is int Hemelrijck, die is grooter dan hy.

† Philip. 2.a.7. Hebre. 2.b.9.

12

Maer vanden daghen Iohannis des Doopers tot nv toe, lijdt dat Hemelrijck ghewelt, ende die ghewelt doen, die treckent tot haer.

13

^* Wandt alle Propheten, ende de Wet, hebben ghepropheteert tot op Iohannem.

* Luce. 16.c.16.

14

Ende ist dat ghijt wilt aennemen,^† Hy is Elias, die daer sal toecomende zijn.

† Malac. 4.a.5 Luce. 1.a.13.

15

⁺ Wie ooren heeft te hooren, die hoore.

+ C vers 15

16

^* Maer by wien sal ick dit geslacht gelijcken? Het is ghelijck den kinderkens, die op de marct sitten, ende roepen tot haer ghesellen, ende spreken:

* Luce. 7.d.31

17

Wy hebben v ghepepen, ende ghy en wout niet dansen: Wy hebben v gheclaecht, ende ghy en wout niet weenen.

18

Iohannes is gecomen, ende adt niet, ende en dranck niet, ende si seggen: Hy heeft den Duyuel.

19

Des Menschens Sone is ghecomen, eet ende drinct, ende si segghen: Siet welck een Verslinder ende Wijnsuyper is die mensche, der Tollenaren ende der Sondaren geselle? Ende de wijsheyt moet haer laten rechtuaerdigen van hare kinderen.

20

⁺ Doen begost hy de Steden te schelden, in welcken zijner daden aldermeest gheschiet waren, ende en hadden haer nochtans niet gebetert.

+ D vers 20

21

^† Wee v Chorazin, wee v Bethsaida, waren sulcke daden tot Tyro ende Sydon gheschiet, als by v geschiet zijn, si hadden in voor-tijden in Sacken ende inder Asschen boete ghedaen.

† Luce. 10.b.13.

22

Nochtans ick seg v, het sal Tyro ende Sydon verdraechlijcker gaen inden dach des oordeels, dan v.

23

Ende ghy Capernaum, ghy die ten Hemel toe verheuen zijt, ghi sult tot in de Helle neder ghestooten werden.^* Wandt waert dat tot Sodoma die daden geschiet waren, die by v gheschiet zijn, si stont noch hedens daechs.

* Genesis. 19. Ezec. 16.e.49

24

^† Doch, ick seg v: Het sal Sodomer Lant verdraechlijcker gaen, inden daghe des oordeels, dan v.

† Marc. 6.b.12.

25

^+† Ter seluer tijt antwoorde Iesus, ende sprack: Ick prijse v Vader, ende HEEre des Hemels, ende der Aerden,^* dat ghy sulcx den Wijsen ende verstandighen verborghen hebt, ende hebbet den onmondighen gheopenbaert:

+ E vers 25

† Luce. 10.c.21.

* Prouer. 11.a.2 1.Cor. 1.d.19. 2.a.7.

26

Ia Vader, want het is also wel behaechlijc geweest voor v.

27

^† Alle dingen zijn my ouergegheuen van mijnen Vader.^* Ende niemandt en kent den Sone, dan alleen de Vader: Ende niemant en kent den Vader, dan alleen de Sone, ende wient de Sone wil openbaren.

† Matt. 28.c.18 Luce. 10.c.22. Ioan. 3.e.35.

* Ioan. 7.c.29 8.b.19. 10.b.15

28

Coemt tot my, alle ghy die daer arbeyt, ende beladen zijt, ic wil v^† verquicken.

† Vermaken.

29

^* Neemt op v mijn Iock, ende leert van my. Want ic ben saechtmoedich, ende van herten ootmoedich, so sult ghy ruste vinden voor uwe Sielen.

* Eccl. 6.d.25. Ierem. 6.c.16

30

^* Wandt mijn Iock is soet, ende mijnen last is licht.

* 1.Ioan. 5.a.3.