Den Bibel, Inhoudende dat Oude ende Nieuwe Testament (Biestkensbijbel)

¶ Dat .x. Capittel.

¶ Hoe Iesus zijne twaelf Apostelen voor hem wt sant met alle goede leeringhe, ende macht ouer de cranckheden. Ende hoe hy spreect dat hy opt Aertrijc niet gecomen en is, om vrede te seynden, mer om tsweert te seynden.

1

⁺ ENde hy^* riep zijne twaelf Iongheren tot hem, ende gaf haer macht ouer de onreyne gheesten, dat sy de selue wt dreuen, ende ghesont maecten alderley siecten ende alderley crancheden.

+ A vers 1

* Marc. 3.b.13. 6.a.7. Luce. 6.b.13. 9.a.1. 10.a.1.

2

De namen der twaelf Apostelen zijn

[p. 5v]

dese: De eerste Symon, ghenaemt Petrus, ende Andreas zijn Broeder: Iacobus Sebedei soone, ende Iohannes zijn Broeder:

3

Philippus ende Bartholomeus: Thomas ende Mattheus de Tollenaer: Iacobus Alphei sone:

4

Lebbeus met den toenaem Thaddeus: Symon van Cana, ende Iudas Iscarioth, die hem verriet.

5

Dese twelf seynde Iesus wt, ende gheboot hen ende sprack: En gaet niet op der Heydenen wech, ende en trect niet inder Samaritanen Stadt:

6

Maer gaet henen totten verloren Schapen wt den huyse Israels.

7

Gaet, ende predict, ende spreect: Dat Hemelrijc is naby ghecomen.

8

Maect de crancken gesont, reynicht de Melaetsche, verwect de dooden, drijft de Duyuelen wt.^† Om niet hebt ghijt ontfanghen, geuet ooc om niet.

† Actu. 8.b.19.

9

^* Ghy en sult gheen Gout, noch Siluer, noch Coper in uwe Gordelen hebben,

* Marc. 6.a.8. Luce. 9.a.3. 10.a.4.

10

Oock gheen Tessche op den wech, oock gheen twee Rocken, gheen Schoenen, ooc gheenen Stock:^† Want een arbeyder is zijnder Spijse weert.

† Luce. 10.b.7. 1.Tim. 5.c.18.

11

^+* Maer waer ghy in een Stadt oft Vlecke gaet, daer beuraecht v, oft yemant daer in sy, die dies weerdich is. Ende by den seluen blijft, tot dat ghy van daer trect.

+ B vers 11

* Mar. 6.b.10 Luce. 9.a.4. 10.a.5.

12

Ende als ghy in een huys gaet, so groet dat selue:

13

Ende indien dat selue huys dies weerdich is, so sal uwen vrede op hem comen:

14

Maer ist des niet weerdich, so sal uwen vrede hem weder tot v keeren.^* Ende waer v yemant niet aennemen en sal, noch uwe redenen hooren, so gaet daer wt vanden seluen huys oft Stadt, ende slaet dat stof af van uwe voeten.

* Marc. 6.b.11. Luce. 9.a.5. 10.a.10. Actu. 13.e.51. 18.a.6.

15

Voorwaer ic seg v, den Lande Sodoma ende Gomorra salt verdraechlijcker gaen, inden dach des oordeels, dan sulcken Stadt.

16

^† Siet, ic seynde v als Schapen midden onder de Woluen, daerom zijt cloec als de Slangen, ende sonder valscheyt, als de Duyuen.

† Luce. 10.a.3.

17

^* Maer hoedet v voor de menschen, wandt si sullen v ouer leueren voor hare Raedtshuysen, ende sullen v gheesselen in hare Scholen.

* Marc. 13.b.9. Luce. 21.b.11. Ioan. 16.a.2. Apoca. 2.b.10

18

Ende men sal v voor Vorsten ende Coningen leyden om mijnen twille, tot een ghetuychenisse ouer haer, ende ouer de Heydenen.

19

^+* Als si v nv ouerleueren sullen, soo en sorcht niet, hoe oft wat ghy spreken sult, want het sal v in die vre ghegeuen worden, wat ghy spreken sult.

+ C vers 19

* Marc. 13.b.11 Luce. 12.b.11. 21.b.13.

20

Want ghy en zijtet niet die daer spreeckt, maer ws Vaders gheest ist, die door v spreect.

21

^† Het sal de een Broeder den anderen ouerleueren tot der doot, ende de Vader den Sone, ende de kinderen sullen hen verheffen teghen hare Ouders, ende haer ter doot helpen.

† Miche. 7.a.6 4.Esd. 5.a.9.

22

Ende ghy moet ghehaet werden van alleman, om mijns Naems wille.^* Maer wie totten eynde toe volstandich blijft, die wort salich.

* Mat. 24.a.13

23

^† Maer wanneer si v in een Stadt veruolghen, so vliet in een ander. Voorwaer ick seg v: Ghy en sult de Steden van Israel niet wtrichten tot dat des Menschen Sone coemt.

† Ierem. 1.a.7. Matth. 2.c.13. 4.b.12. Actu. 8.a.1.

24

^* De discipel en is niet bouen zijnen Meester, noch de knecht bouen den Heere.

* Luce. 6.d.40. Ioan. 13.b.16. 15.b.20.

25

Het is den discipel genoech, dat hy sy als zijn Meester, ende de knecht, als zijn Heer.^* Hebben si den Huysvader Beelzebub gheheeten, hoe veel meer sullen sy zijn huysghenooten also heeten:

* Mat. 12.c.24.

26

⁺ Daerom en vreest v niet voor haer.^† Daer en is niet verborghen, dat niet openbaer en worde:

+ D vers 26

† Marc. 4.b.21 Luce. 8.b.17. 12.a.2.

27

Ende daer en is niet heymelijcx, datmen niet en sal weten. Wat ick v seg int duyster, dat spreect int licht. Ende wat ghy hoort in het oor, dat predict op de Daken.

28

^* Ende en vreest v niet voor de gene, die dat Lijf dooden, ende de Siele niet en mogen dooden. Maer vreest v veel meer voor dien, die Lijf ende Siele verderuen can inde Helle.

* Esaie. 51.b.7. Luce. 12.a.4.

29

En cooptmen niet twee Musschen om eenen Penninc? Nochtans en valter van de selue niet een op de Aerde sonder uwen Vader.

30

Maer nv zijn ooc uwe hayren op den hoofde alle getelt.

31

^† Daerom en vreest v niet, ghy zijt beter dan veel Musscen.

† Esaie. 8.a.4.

32

^* Daerom, wie my bekent voor de menschen, dien wil ic bekennen voor mijnen Hemelschen Vader:

* Marc. 8.e.38. Luce. 9.c.26. 12.a.8.

33

^† Maer wie my versaect voor de menschen, dien wil ick oock versaken voor mijnen Hemelschen Vader.

† 2.tim. 2.b.12

34

^+* Ghy en sult niet meynen, dat ick ghecomen sy, om vrede te seynden op Aerden. Ick en ben niet gecomen om vrede te seynden, mer dat sweert.

+ E vers 34

* Luce. 12.f.51.

35

^† Want ic ben gecomen den mensch te verwecken tegen sinen Vader, ende de dochter tegen haer Moeder, ende des Soons Wijf, tegen haers Mans Moeder.

† Mich. 7.a.6.

36

^* Ende des menschen Vianden sullen zijn eyghen huysghenooten zijn.

* Psa. 54.b.14

37

^† Wie Vader ende Moeder meer bemint dan my, die en is mijns niet weerdich: Ende wie Soon oft dochter meer bemint dan my, die en is mijns niet weerdich.

† Luce. 14.d.26

38

Ende wie niet zijn Cruys op hem en neemt, ende volcht my na, die en is mijns niet weerdich.

39

^† Wie zijn leuen vint, die salt verliesen: Ende wie zijn leuen verliest om mijnen twille, die salt vinden.

† Matt. 6.d.25. Marc. 8.e.35. Ioan. 12.c.25.

40

^* Wie v aen neemt, die neemt my aen: Ende wie my aen neemt, die neemt den ghenen aen, die my gesonden heeft.

* Luc. 9.e.48. 10.b.16.

41

^† Wie eenen Propheet aen neemt in eens Propheten naem, die sal eens Propheten loon ontfangen. Wie eenen Rechtueerdigen aen neemt, in eens Rechtueerdighen naem, die sal eens Rechtueerdighen loon ontfanghen.

† 3.Reg. 17.b.15 18.a.4. 4.Re. 4.b.8.

42

^* Ende so wie eenen van desen alder cleynsten, alleen eenen Beker cout waters te drincken gheeft, in eens Ionghers naem: Voorwaer, ick segghe v, ten sal hem niet ongheloont blijuen.

* Mat. 25.d.41 Marc. 9.e.40