Den Bibel, Inhoudende dat Oude ende Nieuwe Testament (Biestkensbijbel)

¶ Dat .vij. Capittel.

¶ Dat wy niet ordeelen en sullen de ghebreken van allen menschen, Dat wy geen roosen voor de vercken stroyen en sullen, Vanden boomen te kennen, die goede vruchten draghen.

1

⁺ EN ordeelt niet,^† op dat ghy niet geordeelt en wort.

+ A vers 1

† Luc. 6.d.37. Rom. 2.a.1.

2

^* Want met welckerley ordeel dat ghy ordeelt, sult ghy geordeelt worden: Ende met welckerley maet ghy meet, sal v gemeten worden.

* Mar. 4.c.23 Luc. 6.d.38.

3

^† Wat siet ghy den splinter in ws broeders ooge, ende en wort niet gewaer des balcs in v ooge?

† Luc. 6.d.41.

4

Of hoe dorft ghy seggen tot uwen broeder: Hout stille, ick wil v den splinter wt uwe ooge trecken, ende siet, in uwe ooge is eenen balc.

5

^† Ghy Huychelaer, trect eerst den balc wt uwe ooghe, daer na besiet, hoe ghy den splinter wt ws broeders ooghe trect.

† Pro. 18.c.17.

6

^* Ghi en sult dat Heylichdom den honden niet gheuen, ende uwe peerlen en sult ghi niet voor de verckens worpen, op dat sy de selue niet en vertreden met haren voeten, ende haer omkeeren, ende v verscueren.

* Psal. 137.a.4. Prou. 9.a.7. 23.a.9.

7

^† Bidt, soo wort v ghegheuen: Soect, soo sult ghy vinden: Clopt aen, so wort v op ghedaen.

† Iere. 29.c.13. Luc. 11.b.9. Ioan. 16.c.23. Prou. 8.b.17.

8

Want wie daer bidt, die ontfangt: Ende wie daer soect, die vindt: Ende wie aenclopt, dien wort op ghedaen.

9

Wie isser onder v menschen, in dien hem zijn soon biddet om broodt, die hem eenen steen biede?

10

Of in dien hy hem biddet om eenen visch, die hem een slange biede?

11

^† Ist dat ghi dan, die doch erch zijt, nochtans uwen kinderen goede gauen cont geuen: Hoe veel meer, sal uwen Vader inden Hemel wat goets gheuen, die hem bidden.

† Gene. 6.a.5.

12

^* Al wat ghy nv wilt, dat v de Lieden doen sullen, dat doet hen oock, dat is de Wet ende de Propheten.

* Eccle. 31.b.18. Tob. 4.c.16. Luc. 6.c.31.

13

^+† Gaet in door de enge Poorte, want de Poorte is wijt, ende den wech is breet die daer leyt totter verdoemenisse, ende veel zijnder die daer op wandelen.

+ B vers 13

† Luc. 13.c.22. 4.Esdr. 7.a.7

14

Ende de Poorte is enghe, ende den wech is smal, die totten leuen leyt: Ende weynich zijnder, die hem vinden.

15

^† Siet voor v, voor de valsche Propheten, die in Schaepscleederen tot v comen, maer inwendich zijn sy grijpende Woluen: Aen haer vruchten sult ghijse kennen.

† Deut. 13.a.1. 1.Ioan. 4.a.1. Rom. 16.b.16.

16

^‡ Machmen ooc Wijndruyuen lesen vanden doornen? Oft Vijghen vanden dijstelen?

‡ Luc. 6.e.44.

17

Also eenen yeghelijcken goeden boom brengt goede vruchten: Maer eenen vuylen boom brengt quade vruchten.

18

^* Eenen goeden boom, en can gheen quade vruchten brenghen.

* Matt. 12.d.33.

19

Ende eenen vuylen boom en can gheen goede vruchten brenghen.^* Eenen yeghelijcken boom die geen goede vrucht en brengt, wort afghehouwen, ende int vier gheworpen.

* Iere. 11.c.17. Matt. 3.a.10. Luc. 3.b.9.

20

Daerom, aen hare vruchten sult ghyse kennen.

21

^† Sy en sullen niet alle die tot my segghen: HEEre, HEERre, int Hemelrijck comen, maer die doen den wille mijns Vaders inden Hemel.

† Mat. 25.a.11. Luc. 6.e.46. 13.c.23.

22

Veel sullender tot my seggen in dien dach: HEEre, HEEre, en hebben wy niet in uwen Naem ghepropheteert?^‡ En hebben wy niet in uwen Naem Duyuelen wtghedreuen? En hebben wy niet in uwen Naem veel daden ghedaen? Dan sal ick hen belijden: Ick en heb v noch noyt gekent:

‡ Act. 19.b.13.

23

^+* Wijcket alle van my ghy quaetdoenders.

+ C vers 23

* Psal. 6.b.9. Mat. 25.d.42 Luc. 13.c.25.

24

^† Daerom, wie dese mijne redenen hoort, ende doetse, dien ghelijcke ick by eenen cloecken man, die zijn huys op eenen steen timmerde.

† Luc. 6.e.47 Rom. 2.b.13. Iaco. 1.c.22.

25

Doender nv eenen slachregen viel, ende een water quam, ende de winden waeyden, ende stieten aen dat huys, doen en vielt doch niet, want het was op eenen steen ghefondeert.

26

^‡ Ende wie dese mijne redenen hoort, ende en doetse niet, die is eenen sotten man gelijck, die zijn huys opt sant timmerde.

‡ Iaco. 1.c.23.

27

Doender nv^† eenen slachregen viel, ende een

† Eze. 13.b.11.

[p. 4v]

water quam, ende de winden waeyden, ende stieten aen dat huys, doen vielt, ende dede eenen grooten val.

28

Ende het ghebuerde,^† doen Iesus dese redenen voleynt hadde, ontsettede hem dat volck ouer zijne leeringe.

† Marc. 1.b.22. Luc. 4.d.32.

29

Want hy predicte geweldelijcken, en niet als de Schriftgeleerden.