Den Bibel, Inhoudende dat Oude ende Nieuwe Testament (Biestkensbijbel)

¶ Dat .vj. Capittel.

¶ Van onser bedinge ende vastinge, Dat wy gheen twee Heeren dienen en moghen, Dat wy niet sorchuuldich wesen en sullen voor ons voetsel, ende voor onse cleederen, noch voor den naesten toecomenden dach.

1

⁺ HEbt acht op uwe^† aelmissen, dat ghy die niet en gheeft voor de Lieden, dat ghy van haer gesien wort, anders en hebt ghy gheenen loon by uwen vader inden Hemel.

+ A vers 1

† Luc. 11.d.42.

2

Wanneer ghy nv aelmissen gheeft, soo en sult ghy geen trompetten voor v laten blasen, als de Huychelaers doen inde scholen, ende op de straten, op dat sy vanden Lieden ghepresen worden. Voorwaer ick seg v, sy hebben haren loon wech.

3

^† Maer wanneer ghy aelmissen gheeft, so en laet uwe slincker hant niet weten, wat de rechter doet,

† Rom. 12.b.8.

4

Op dat uwe aelmisse verborgen sy. Ende uwe Vader die int verborghen siet^† die salt v int openbaer verghelden.

† Luc. 14.b.14.

5

Ende als ghy bidt^* so en sult ghy niet zijn als de Huychelaers, die daer gheern staen ende bidden in de Scholen, ende aen de hoecken op de straten, op dat sy vanden Lieden gesien worden. Voorwaer ic segge v: Sy hebben haren loon wech.

* Esa. 29.c.13. Luc. 11.a.2.

6

^* Mer als ghy bidt, so gaet in v camerken, ende sluyt de duere toe, ende bidt tot uwen Vader int verborgen. Ende v vader, die int verborgen siet, salt v int openbaer vergelden.

* 4.Re. 4.d.33. Act. 10.a.9.

7

⁺ Ende als ghy bidt,^† so en suldy niet veel woorden maken, ghelijck de Heydenen, want sy meynen, dat sy verhoort worden, als sy veel woorden maken.

+ B vers 7

† Esa. 1.b.15.

8

Daerom en sult ghy desen niet gelijc worden.^† Want uwe Vader weet wat ghy behoeft, eer ghy hem bidt.

† Rom. 8.d.26.

9

Daerom sult ghy aldus bidden:^† Onse Vader inden Hemel, Vwen Naem worde gheheylicht.

† Luc. 11.a.2.

10

Dijn Rijcke come. Vwen wil gheschie, op Aerden als inden Hemel.

11

Onse dagelijcx broot geeft ons heden.

12

Ende vergeeft ons onse schulden, ghelijck wy onsen schuldenaers vergeuen.

13

Ende en leyt ons niet in becoringhe. Maer verlost ons vanden quaden. Want v is dat Rijck, de Cracht, ende de heerlijcheyt inder eewicheyt, Amen.

14

^† Want ist dat ghy den menschen hare feylen vergeeft, so sal v uwe Hemelsche Vader oock vergheuen.

† Mat. 18.d.35. Marc. 11.c.25. Luc. 17.a.3.

15

Maer ist sake dat ghy den menschen hare feylen niet en vergeeft, so en sal v uwe Vader, uwe feylen oock niet vergheuen.

16

^† Wanneer ghy vast, so en sult ghy niet suer sien als de Huychelaers. Want sy veranderen hare aensichten: Op dat sy voor den menschen schijnen met haren vasten. Voorwaer ick segghe v, sy hebben haren loon wech.

† Esa. 58.a.3. Matt. 9.b.14 Mar. 2.c.18.

17

Maer als ghy vast, soo salft uwe hooft, ende wast uwe aensicht,

18

Op dat ghy niet en schijnt voor de menschen met uwen vasten, maer voor uwen vader, die int verborgen is, ende uwe Vader die int verborgen siet, salt v int openbaer vergelden.

19

^+† Ghy en sult v geen schatten vergaderen opter Aerden, daerse de Motten ende den roest eten, ende daerde dieuen na

+ C vers 19

† Eccl. 29.b.13 Ierem. 17.a.3. Pro. 23.a.4. Luce. 12.d.33. 1.Tim. 6.d.19.

[p. 4r]

grauen ende stelen.

20

Maer vergadert v schatten inden Hemel, daerse noch de motten noch den roest eten, ende daer de dieuen niet na en grauen, noch en stelen.

21

Want waer uwen schat is, daer is oock uwe herte.

22

^† De ooghe is des lichaems licht. Wanneer dijn ooge eenuoudich is, so sal v geheel lichaem licht zijn.

† Luc. 11.c.34.

23

Maer wanneer v ooge een schalck is, so sal v geheel lichaem duyster zijn. Mer als dat licht dat in v is, duysternis is, hoe groot sal dan de duysternis selue zijn?

24

^† Niemant en can twee heeren dienen, of hy sal den eenen haten, ende den anderen lief hebben, of hy sal den eenen aenhangen, ende den anderen verachten. Ghy en cont Gode niet dienen, ende den Mammon.

† Luc. 16.b.13.

25

Daerom segge ick v:^† En sorcht niet voor uwe leuen: Wat ghy eten ende drincken sult, oock niet voor uwe lijf, wat ghy aentrecken sult. Is dat leuen niet meer dan de spijse? Ende dat lijf meer dan de cleedinghe?

† Psal. 55.e.23. Luc. 12.c.22. Philip. 4.a.6 1.Pet. 5.a.7.

26

^† Siet de vogelen onder den Hemel aen, sy en sayen niet, sy en mayen niet, sy en vergaderen niet in de Schueren, ende uwe Hemelsche Vader voetse nochtans. Sijt ghy dan niet veel meer dan sy?

† Psal. 147.b.9 Luc. 12.c.24.

27

⁺ Wie isser onder v, die zijnder lengde een elle toe setten can, oft hyder alschoon om sorcht?

+ D vers 27

28

Ende waerom sorcht ghy voor de cleedinge? Siet de Lelien op den velde aen, hoe sy wassen. Sy en arbeyden niet, noch sy en spinnen niet.

29

Ick seg v: Dat ooc Salomon, in al zijn heerlijcheyt niet becleedt en is gheweest, als der seluen een.

30

Na dien dan Godt dat gras op den velde also cleedt, dat doch heden staet, ende morgen inden ouen geworpen wordt, en soude hy v dat niet veel meer doen? O ghy cleyn gheloouighen.

31

Daerom en sult ghy niet sorgen, ende seggen: Wat sullen wy eten? Wat sullen wy drincken? Waer mede sullen wy ons cleeden?

32

Na sulcken allen soecken de Heydens. Want uwen Hemelsche Vader wetet, dat ghy dies al behoeft.

33

^† Soeckt ten eersten na den Rijcke Gods, ende na zijner gerechticheyt, so sal v sulcx altemael toeuallen.

† 3.Re. 3.b.9.

34

Daerom en sorcht niet voor den anderen morghen, want den dach van morgen, sal voor dat zijne sorgen. Het is ghenoech, dat elcken dach zijn eygen Plage hebbe.