Den Bibel, Inhoudende dat Oude ende Nieuwe Testament (Biestkensbijbel)

¶ Dat .iiij. Capittel.

¶ Hoe Iesus van den Duyuel ghetempteert wert, Hoe Iesus Petrum, Andream, Iacobum ende Ioannem riep, Ende hoe Iesus in Galilea menschen van haer crancheden ghenas.

1

⁺ DOen wert Iesus^* vanden gheest gheleyt in der woestijnen: Op dat hy vanden Duyuel becoort werde.

+ A vers 1

* Marc. 1.b.12. Luc. 4.a.1.

2

Ende doen hy veertich daghen ende veertich nachten gheuast hadde, hongerde hem.

3

Ende de becoorder tradt tot hem, ende sprack: Sijt ghy Gods soon, so spreect dat dese steenen broodt worden. Ende hy antwoorde, ende sprack:

4

^† Daer staet gheschreuen: De mensch en leeft niet alleen vanden broode, maer van eenen yegelijcken woorde, dat door den mont Gods gaet.

† Deut. 8.a.3. Sapi. 16.d.26

5

Doen voerde hem de Duyuel met hem in de heylige Stadt, ende sette hem op de tinnen des Tempels,

6

Ende sprack tot hem: Sijt ghy Gods sone, soo laet v nederwaerts.^† Want daer staet gescreuen: Hy sal zijnen Engelen ouer v beuel doen, ende sy sullen v op de handen dragen, op dat ghi uwen voet niet aen eenen steen en stoot.

† Psal. 91.b.12.

7

Doen sprack Iesus tot hem: Wederom stater ooc gescreuen:^† Ghi en sult Godt uwen HEEre niet becoren.

† Deut. 6.c.16.

8

Wederom voerde hem de Duyuel met hem, op eenen seer hoogen Berch, ende toonde hem alle Rijcken der werelt, ende haer heerlijcheyt,

9

⁺ Ende sprac tot hem: Dat wil ick v altemael geuen, ist dat ghi neder valt, ende my aenbidt.

+ B vers 9

10

Doen sprack Iesus tot

[p. 3r]

hem: Packt v van my wech Satan,^* Want daer staet ghescreuen: Ghy sult Godt dijnen HEERE aenbidden, ende hem alleen dienen.

* Deut. 6.c.13. 1.Re. 7.a.3.

11

^† Doen verliet hem de Duyuel, ende siet, doen traden de Engelen tot hem, ende dienden hem.

† Mar. 1.b.13.

12

^‡ Doen nv Iesus hoorde, dat Iohannes gheleuert was, tooch hy in dat Galileetsche lant,

‡ Mar. 1.b.14. Luc. 4.b.14.

13

^* Ende verliet de stadt Nazaret, hy quam ende woonde te Capernaum, die daer leyt aen de zee, aen de Lantpalen Sabulon ende Nephtalim,

* Luc. 4.d.31. Ioan. 2.b.12.

14

Op dat veruult werde, datter geseyt is, door den Propheet Isaiam, die daer spreect:

15

^† Dat lant Sabulon, ende dat lant Nephtalim, byden wech der zee, op gene sijde der Iordane, ende de Heydensche Galilea:

† Esa. 8.c.23. 9.a.1.

16

Dat volck dat inder duysternisse sat, heeft een groot licht ghesien, ende die daer saten aenden cant ende schaduwe des doots, dien is een licht op gheghaen.

17

^* Van die tijt aen begost Iesus te prediken ende te seggen:^† Doet boete, dat Hemelrijck is na by ghecomen.

* Mar. 1.b.15.

† Mat. 3.a.2.

18

^+† Als nv Iesus aen de Galileesche zee ghinck, sach hy twee broeders, Simon die daer heet Petrus, ende Andream zijnen broeder, die wierpen haer net inde zee, want sy waren visschers.

+ C vers 18

† Mar. 1.b.16. Luc. 5.a.1.

19

Ende hy sprack tot haer: Volcht my na^† ic wil v visschers der menschen maken.^‡ Terstont verlieten sy haer netten, ende volchden hem na.

† Iere. 16.c.16. Eze. 47.b.10.

‡ mat. 19.d.27 Mar. 16.d.28 Lu. 5.b.11. 18.e.28.

20

Ende doen hi van daer voortaen ghinck, sach hy twee ander broeders Iacobum de sone Sebedei, ende Ioannem zijnen broeder int Schip, met haren vader Sebedeo, dat sy haer netten lapten, ende hy riepse.

21

^* Terstont verlieten sy dat schip en haren vader, ende volchden hem na.

* Mat. 19.d.27. Luc. 5.b.11.

22

^† Ende Iesus omghinck dat gheheel lant van Galileen, leerende in haer scholen, ende predicte dat Euangelium vanden Rijcke, ende maecte gesont alderley siecten ende crancheden int volc.

† Mar. 1.c.14.

23

Ende zijn gherucht wert verbreyt ouer dat gheheel Syrien lant. Ende sy brochten tot hem alderley crancken, met menigherley siecten ende qualen beuanghen, de beseten, de maensuchtighen, ende de gichtighen. Ende hy maecktese alle ghesont.

24

^* Ende veel volcx volchde hem nae van Galileen, van den thien Steden, van Ierusalem, wt den Iootschen Lande, ende van gheen sijde der Iordanen.

* Mar. 3.a.7. Luc. 6.b.17.