Den Bibel, Inhoudende dat Oude ende Nieuwe Testament (Biestkensbijbel)

¶ Dat .ij. Capittel.

¶ Hoe de Wijsen met giften wt Oosten quamen. Hoe Ioseph met Iesus ende Maria in Egypten vloot. Hoe de onnoosel kinderkens ghedoot werden. Ende hoe hy weder wt Egypten keerde.

1

⁺ DOen Iesus gheboren was te Bethlehem int Iootsche lant,

+ A vers 1

2

Inder tijdt des Conincx Herodis, Siet, doen quamen de Wijsen van Oosten tot Ierusalem, ende spraken: Waer is de nieu gheboren Coninck der Ioden?^† Wy hebben zijn Sterre ghesien in Oosten lant, ende wy zijn ghecomen om hem aen te bidden.

† Nu. 24.c.17.

3

Doen dat de Coninc Herodes hoorde, verschricte hy, ende met hem dat gantse Ierusalem.

4

Ende hy liet vergaderen alle hooge Priesters ende Scriftgeleerden onder den volcke, ende vraechde van haer, waer Christus soude geboren worden?

5

Ende sy seyden hem: Tot Bethlehem int Iootsche lant. Want also stater gheschreuen door den Propheet:

6

^† Ende ghy Bethlehem int Iootsche lant, en zijt in gheenderley wijse de minste onder de Vorsten Iuda:^* Want wt v sal my comen de Hertooch, die ouer mijn volck Israels een HEERE sy.

† Mich. 5.a.2.

* Ioan. 7.d.42

7

⁺ Doen riep Herodes de Wijsen heymelijck tot hem, ende leerde met neerste van haer, wanneer de Sterre verschenen ware?

+ B vers 7

8

Ende hy wees haer na Bethlehem, ende sprac: Trect henen, ende vraecht neerstelijck na het kindeken, ende als ghijt vint so segghet my weder, op dat ick oock come, ende het aenbidde.

9

Als sy nv den Coninc ghehoort hadden, togen sy henen: Ende siet, de Sterre, die sy in Oostlant gesien hadden, ginc voor haer henen, tot dat sy quam, ende stont daer bouen, daer dat kindeken was.

10

Doen sy de Sterre sagen, werden sy seer verblijt. Ende ginghen in dat huys, ende vonden dat kindeken met Maria zijn moeder,^† ende vielen neder, ende badent aen.

† Psal. 72.b.10. Esa. 60.a.6.

11

Ende dede hare schatten op, ende schenckten hem Goudt, Wieroock, ende Myrrhe.

12

Ende Godt beual haer inden droom, dat si niet weder tot Herodes en souden keeren. Ende sy togen door eenen anderen wech weder in haer landt.

13

⁺ Ende na dat sy wech gereyst waren, siet, doen verscheen de Engel des HEEren, Ioseph in den droom, ende sprac:^† Staet op, ende neemt dat kindeken ende zijn

+ C vers 13

† Exo. 4.d.19.

[p. 2v]

moeder tot v, ende vliet in Egypten lant, ende blijft daer tot dat ict v segge. Want het is voorhanden, dat Herodes dat kindeken soecke, om dat selue te verdoen.

14

Ende hy stont op, ende nam dat kindeken ende zijn moeder tot hem, inder nacht, ende weeck in Egypten lant,

15

Ende bleef daer, tot na den doot Herodis, op dat veruult werde, dat de HEERE door den Propheet ghesproken heeft, die daer spreect:^† Wt Egypten heb ick mijnen Sone gheroepen.

† Nu. 24.b.8. Osee. 11.a.1.

16

Doen Herodes nv sach, dat hy vanden Wijsen bedrogen was, wert hy seer toornich, ende seynde wt, ende liet alle kinderen te Bethlehem dooden, ende in allen byghelegen vlecken, die daer tweeiarich ende daer onder waren, na der tijt, die hy met neerste vanden Wijsen gheleert had.

17

Doen is veruult, datter gheseyt is vanden Propheet Ieremia,^† die daer spreect:

† Iere. 31.c.15.

18

Op den gheberchte heeftmen een gheroep ghehoort, veel clagens, weenens ende huylens. Rahel beweende haer kinderen, ende en woude haer niet laten troosten. Want het was met hen wt.

19

⁺ Maer doen Herodes ghestoruen was, Siet, doen verscheen de Engel des HEEREN Ioseph in den droom, in Egypten lant, ende sprac:

+ D vers 19

20

Staet op, ende neemt dat kindeken ende zijn moeder tot v, ende trect henen in dat Lant Israel. Sy zijn gestoruen, die na des Kints leuen stonden.

21

Ende hy stont op, ende nam dat kindeken ende zijn moeder tot hem, ende quam in dat Lant Israel.

22

Maer doen hy hoorde, dat Archelaus in het Iootsche landt Coninc was, in de plaetse zijns vaders Herodis, ontsach hy hem derwaerts te comen. Ende inden droom ontfinck hy een beuel van Gode, ende tooch inde eynden des Galileetschen lants,

23

Ende quam woonen inder stadt, die daer heet Nazareth: Op dattet veruult werde, datter geseit is door den Propheet:^† Hy sal Nazarenus heeten.

† Iud. 13.b.7.