Den Bibel, Inhoudende dat Oude ende Nieuwe Testament (Biestkensbijbel)

[p. 2r]

Euangelium S. Mattheus.

¶ Dat .I. Capittel.

¶ Vander geboorte ons Heeren Iesu Christi, Ende hoe Maria Ioseph ondertroude. Ende hoe de Engel Gods Ioseph openbaerde, die Mariam verlaten wilde.

1

⁺ DIt is dat boec vander^† Geboorte Iesu Christi, die daer is een Sone Dauids des soons Abraham.

+ A vers 1

† Luce. 2.a.7. 3.d.23.

2

^‡ Abraham wan Isaac.^* Isaac wan Iacob.^‡ Iacob wan Iuda ende zijn broeders.

‡ Genes. 21.a.2.

* Gen. 25.c.25

‡ Genesis. 29.f.35.

3

^* Iuda wan Phares ende Saram van Thamar.^† Phares wan Hezron. Hezron wan Ram.

* Gen. 38.e.29.

† Genesis. 46 b.12. 1.Par. 2.a.5.

4

^‡ Ram wan Aminadab.^† Aminadab wan Nahasson.^* Nahasson wan Salma.

‡ 1.Par. 2.a.10

† Nu. 7.b.12.

* 1.Par. 2.a.11

5

Salma wan Boas van Rahab. Boas wan Obed^† van Ruth. Obed wan Iesse.

† Rut. 4.d.17 1.Par. 2.a.12.

6

^‡ Iesse wan den Coninc Dauid.^* De Coninc Dauid wan Salomon, vanden wijue Vrie.

‡ 1.Re. 16.a.1.

* 2.Regum. 12.e.24.

7

^† Salomon wan Roboam. Roboam wan^‡ Abia. Abia wan Assa.

† 3.Regum. 11.g.43. 1.Par. 3.b.10.

‡ 3.Reg. 14.g.31.

8

⁺ Assa wan Iosaphat. Iosaphat wan Ioram. Ioram wan Osia.

+ B vers 8

9

Osia^* wan Iotham.^† Iotham wan Achas. Achas^‡ wan Ezechia.

* 2.Par. 26.d.23.

† 2.Par. 27.b.9

‡ 2.pa. 28.d.27

10

Ezechia^* wan Manasse.^† Manasse wan Amon. Amon^‡ wan Iosia.

* 4.Reg. 20.c 21.

† 4.Reg. 21.d.18.

‡ 4.Reg. 21.d.24.

11

Iosia wan^* Iechonia ende zijn broeders, ontrent den tijt der Babylonischer geuanckenis.

* 4.re. 23.f.30. 24. 25

12

Na der Babylonischer geuanckenis, wan Iechonia Sealtiel.^† Sealthiel wan Sorobabel.

† 1.Par. 3.c.19 Hagg. 1.a.1. 1.Esdr. 3.a.2.

13

Sorobabel wan Abiud. Abiud wan Eliachim. Eliachim wan Asor.

14

Asor wan Sadoch. Sadoch wan Achin. Achin wan Eliud.

15

Eliud wan Eleasar. Eleasar wan Mathan. Mathan wan Iacob.

16

Iacob wan Ioseph, den man Marie, van welcker is geboren Iesus, die daer heet Christus.

17

Aller^‡ leden van Abraham tot op Dauid, zijn veerthien Leden. Van Dauid tot op de Babylonische geuanckenis, zijn veerthien leden. Van der Babylonischer geuanckenis, tot op Christum, zijn veerthien leden.

‡ Geslachten.

18

⁺ Ende het ginck metter geboorte Christi aldus toe. Als Maria zijn moeder^* Ioseph ondertrout was, eer hyse te huys haelde, beuantmen, dat sy beurucht was vanden Heyligen Gheest.

+ C vers 18

* Luce. 1.b.23.

19

Maer Ioseph haer Man was vroom ende en wildese niet^† beruchtighen, maer dachtse heymelijck te verlaten.

† Beschamen.

20

Ende doen hi also dachte, Siet, doen openbaerde hem een Engel des HEEREN inden droom, ende sprack: Ioseph, ghy sone Dauids, en vreest niet Mariam uwe wijf tot v te nemen: Want dat in haer geboren is, dat is vanden heyligen geest.

21

^† Ende sy sal eenen soon baren, diens Name sult ghy Iesus heeten. Want hy sal zijn volck salich maken van haren sonden.

† Gen. 16.c.11. 17.c.19. Iudic. 13.a.3. 4.Regum. 4.c.17.

22

Ende dit is al geschiet op dat veruult werde, dat de HEER door den Propheet ghesproken heeft, die daer seyt:

23

^† Siet, een Maecht sal beurucht zijn ende eenen sone baren, ende sy sullen zijnen naem EmanuEl heeten, dat is verduyscht, God met ons.

† Esa. 7.c.14.

24

Doen nv Ioseph vanden slaep wacker werde, dede hy gelijck hem de Engel des HEEREN beuolen had, ende nam zijn wijf tot hem.

25

Ende en bekendese niet, tot dat sy haren eersten soon^† baerde. Ende hiet zijnen naem Iesus.

† Luc. 2.a.7.