Den Bibel, Inhoudende dat Oude ende Nieuwe Testament (Biestkensbijbel)

¶ Dat .xiiij. Capittel.

¶ Godt verschijnt Esdre inden Bosch spreect met hem, ende geeft hem beuel wat hy doen sal.

1

⁺ OP den derden dach sadt ick onder eenen Eycken boom, doen quamper een stemme tot my wt den Bosch, ende sprac: Esra Esra. Doen sprack ick:

+ A vers 1

2

Hier ben ick HEERE, ende stondt op mijne voeten. Doen sprac hy tot my:

3

^† Int Bosch ben ick Mose verschenen ende heb met hem ghesproken,

† Exod. 3.a.2.

4

Ick^* heb mijn volck wt Egipten gheleyt op den Berch Sina, daer heb ick hem veel dagen by my gehadt,

* Exod. 14. 19

5

Ende hem mijn wonderen vertelt, ende heb hem getoont de heymelijckheyt des tijts, ende dat eynde^† ende heb hem beuolen,

† Mala. 4.a.4

6

Dese woorden sult ghy openbaren, ende niet verberghen.

7

Nv segge ick v, dat ghy den droom dye ghy ghesien hebt,

8

Ende de wtlegginge die ick v gheopent hebbe, in uwer herten verbercht:

9

Want ghy sult van allen genomen zijn: Ghy sult bekeert ouerblijuich met mijnen raet zijn, ende met ws gelijcken, tot dat den tijt geeyndet wort.

10

Want de werelt heeft haer iuecht verloren, ende den tijt aenghenomen te houden.

11

Want den tijt is gedeylt in twelf deelen, ende het zijn thien deelen, ende dat halue des thienden deels, alschoon verloopen,

12

Noch isser voorhanden, dat nae dat halue deel des thienden is.

13

⁺ So bereyt nv ende ordineert v huys, ende straft v volc:^† Troost haer bedroefde, ende segt vander verstooringe:

+ B vers 13

† 1.Tess. 5.b.14

14

Laet varen de menschelijcke gedachten: Werpt van v de menschelijcke lasten:^† Trect wt de swacke natuere: Legt aen deen zijde die alder swaerste gedachten, ende haestet om te gaen van dese tijden:

† Ephe. 4.c.22. Collo. 3.a.9.

15

Want de quaden ende boosheyt die ghy nv hebt sien gemoeten, die sullen sy noch veel booser doen.

16

^† Want so veel als de werelt ende tijt meer swac wort, so veel sullen de sonden ende boosheyt meer toenemen inden genen die opter Aerden woonen.

† Mat. 24.a.12 1.Ioan. 5.c.19

17

^* Want de waerheyt is wech geuloden, ende de luegene die heeft haer na by ghemaect. Want nv sal dat comen dat ghy ghesien hebt.

* Esaie. 59.b.15.

18

Doen heb ick geantwoort ende ghesproken:

19

Siet, HEEre ick wil gaen so ghy my gheheeten hebt, ende wil dat volc dat tegenwoordich is, straffen. Maer die namaels eerst gheboren werden, wie wil de selue vermanen ende straffen?

20

^† So is nv de werelt in duysternisse, ende de Inwoonders der Aerden sonder licht:

† Esaie. 60.a.2.

21

Want uwe wet is aengesteken, waer by niemant en weet wat van v geschiet is, oft wat noch gheschieden sal.

22

Heb ick genade voor v vonden, so seyndet in my den heyligen geest, so wil ick alle dat gene scrijuen, dat van het begin des werelts gheschiet is, wat in uwe Wet ghescreuen is, waer mede de menscen eenen wech moghen vinden, ende dat die ooc moghen leuen, die ten laetsten tijden wesen sullen.

23

⁺ Doen antwoorde hy my, ende sprac: Gaet henen, vergadert v volc te samen, ende spreect tot hen: Dat si v in veertich dagen niet en soecken:

+ C vers 23

24

Maer ghy, maect v veel Bosboom bereyt, ende neemt met v Saream, Dabriam, Selemiam, Echanum, ende Asiel, die vijue, die ghereet zijn, snel te schrijuen,

25

Ende coemt al hier, soo wil ick in uwer herten een licht des verstants aensteken, dat nemmermeer wtblusscen en sal tot dat sulcx veruult wort, als ghy beginnen sult te scrijuen.

26

Ende dan sult ghi den volcomen sommighe dinghen openen,^* maer sommighe den Wijsen verborghentlijck seggen. Morgen tot deser vren sult ghy beginnen te scrijuen.

* 4.Esdre. 14.e.46.

27

⁺ Doen heb ic my opgemaect, ben henen gegaen, so hy my geheeten hadde, ende hebbe al het volc te samen vergadert, ende hebbe tot hen gheseyt:

+ D vers 27

28

O Israel hoort dese woorden,

29

Onse Vaders waren vanden beginsel vreemdelingen in Egipten, vandaer worden si verlost,

30

^* Ende doen namen si de Wet des leuens,^† die si niet gehouden en hebben, die ghi ooc na hen ouertreden hebt.

* Deut. 4. 5.

† 4.esd. 9.d.32 Ioan. 7.b.19. Actor. 7.g.53. 15.b.10.

31

Doen is nv dit Lant doort lot te besitten wtgedeylt, namelijc Sion. Mer uwe Vaders ende ooc ghy, hebt onrecht gedaen, ghy hebt den wech die v de Hoochste geboden heeft, niet gehouden.

32

Tewijle dat hi nv^† een gerecht Rechter is, so heeft hy van v by tijden genomen, dat hy v wt genaden gegeuen hadde.

† Psalm. 7.b.12 Iere. 11.d.20.

33

Also ghy nv hier zijt tsamen met uwe broederen,

34

So sult ghy uwen verstande gebieden, ende v herte verstandich maken, so sult ghy leuendich behouden worden, ende na den doot bermherticheyt vercrijgen:

35

Want dat^† oordeel sal nae den doot comen, als wy weder leuendich werden: Dan so sullen der booser ende goeder wercken openbaer zijn.

† Matt. 25.c.30.

36

So en gae nv niemant als nv tot my, ende niemant en vrage die veertich dagen na my.

37

⁺ Ende doen nam ick de vijf mannen, so my beuolen was met my, ende wy gingen

+ E vers 37

[p. 172v]

int Velt, ende waren daer.

38

Op den nauolgenden dach riep my een stemme: Esdra, doet uwen mont open,^* ende drinct dat ick v geue.

* Ezech. 3.b.2. Apo. 10.b.9.

39

Doen dede ic mijnen mont open, doen gaf hy my eenen vollen Beker, die vol waters was, maer zijn verwe was als vyer,

40

Ende ic namt ende dranc. Ende doen ic gedroncken hadde, wert mijn herte verstandich, ende de wijsheyt wiesch in my: Want mijnen geest wert inder gedachtenissen behouden,

41

Ende mijnen mont is open ghedaen, ende voort niet toeghedaen.

42

De Hoochste heeft de vijue verstant gegeuen, so dat si schreuen de hooge dingen der nachten, die si niet en wisten:

43

Maer des nachts aten si, maer ick sprack inden dach, ende des nachts en sweech ick niet.

44

In veertich dagen schreuen si twee hondert ende vier boecken.

45

Ende doen de veertich dagen wt waren, so heeft de Hoochste also gesproken: Dat eerste dat ghi vooren hebt geschreuen, segt dat openbaer, op dattet de weerdige ende onweerdige mogen lesen.

46

Maer die tseuentich laetste behout^* ende segghet alleen den Wijsen ws volcx:

* 4.Esdre. 14.c.26.

47

Want in die is verstant ende wijsheyt.

48

Ende ick dedet alsoo.