Den Bibel, Inhoudende dat Oude ende Nieuwe Testament (Biestkensbijbel)

¶ Dat .xij. Capittel.

¶ Meer vanden voorgaenden droom ende zijnder wtlegghinghe.

1

⁺ ENde het is geschiet, als de Leeuwe dese woorden gesproken hadde tot den Arent,

+ A vers 1

2

Doen hebbe ick ghesien dat dat hooft, dat te voren douerhandt hadde ghehadt, recht als oft niet meer geweest en is: Oock so en zijn niet meer verschenen de vier vlueghelen, die tot hem ghecomen, ende opgerecht waren om te regeren. Ende haer Rijc was cleyn ende vol oproers.

3

Ende ick hebbe gesien, ende siet, si en verschijnen nerghens meer, ende dat geheele Lichaem des Arents wordt verbrandt, ende de Aerde verschrickte seer. Doen ontwaecte ic vanden verschricken mijns ghemoets, ende van grooter vreesen, ende sprack tot mijnen gheest:

4

Siet, ghy hebt my dat ghegheuen, daer in dat ghy

[p. 171r]

my doorgrondet den wech des Alderhoochsten:

5

Nv ben ic noch beswaert in mijnen gemoede, ende ben in mijnen geest seer swack, ende weynich crachts is in my van grooten verschricken, dat ic desen nacht ontfangen hebbe.

6

So wil ic nv den Alderhoochsten bidden, dat hy my totten eynde stercke,

7

⁺ Ende sprac: O HEEre heb ic genade voor uwen oogen vonden, ende ben ick gerechtueerdicht by v voor veel ander, ende is mijn gebet voor v aensicht gecomen,

+ B vers 7

8

Soo sterct my, ende toont my uwen dienaer de wtlegginghe, ende dat onderscheyt van dit grouwelijc ghesichte, op dat ghy volcomelijc mijn siele troost:

9

Want ghy my daer toe goet acht, dat ghy my wilt dat laetste der tijden toonen.

10

Ende hy sprac tot my: Dat is de wtlegginge van desen gesichte:

11

Den Arent die ghy vander zee hebt sien opgaen, is dat Rijc, dat gesien is inden gesichte^* ws broeders Daniel:

* Dan. 7.a.1.

12

Maer hem en ist niet wtgeleyt: Want nv legge ict v wt.

13

De tijt coemt datter een Rijc op Aerden op staen sal, ende dat salmen vreesen bouen alle Rijcken, die voor hem geweest zijn.

14

Inden seluen Rijcke sullen twelf Coningen regeren, den eenen na den anderen:

15

Want de ander sal beginnen te regeren, ende sal meer tijts hebben dan die andere.

16

⁺ Ende dat bedieden de twelf vlogelen, die ghy gesien hebt.

+ C vers 16

17

Maer de stemme die met v gesproken heeft, ende die ghy hebt sien wt gaen, niet van zijn hoofden, maer vant midden des lijfs, bediedet,

18

Dat na de tijt des Rijcx groote gekijuen sullen opstaen, ende het sal in perykel staen, dattet vallen sal, maer het en sal noch niet vallen, maer sal weder in zijn begin worden gestelt.

19

Ende de acht onderste vluegelen, die ghy hebt sien hangen aen zijn vluegelen, bedieden,

20

Dat in hem acht Coningen sullen opstaen , welcker tijt cleyn wesen sal, ende snelle Iaren: Ende twee wt hen sullen baren.

21

Maer als de middeltijt coemt, so sullen de vier behouden werden in die tijt, als daer begint te comen zijnen tijt dattet geeyndet sal werden, maer twee sullent tot int eynde behouden.

22

Maer de drie hoofden die daer rusten, bedieden,

23

Dat de Alderhoochste in zijnen laetsten drie Rijcken verwecken sal, ende in haer veel wederroepen: Ende si sullen de Aerde verheeren,

24

Ende die opter Aerden woonen met veel arbeyts ouer alle, die voor die geweest zijn. Daerom zijn sy genoemt hoofden des Arents,

25

Want het zijn de gene die weder ten voorschijn brengen sullen zijn boosheyt, ende zijn laetste voluoeren ende volbrengen sullen.

26

Ende dat ghy dat grootste hooft niet en hebt gesien meer verschijnen, bediet, dat een wt hen op zijn bedde steruen sal, ende doch met pijne:

27

Want de twee die ouerblijuen, worden metten sweerde gedoot.

28

Want des eens sweert sal den anderen verslinden, doch sal de selue metten sweerde int laetste vallen.

29

⁺ Ende de twee onderste vluegelen, die ghy gesien hebt bouen thooft, dat op der rechter sijden is, bediet,

+ D vers 29

30

Dattet die zijn die de Hoochste tot in haer eynde bewaert heeft, dat is een clein Rijck, der moeyten ende onrusten vol.

31

^* Den Leeuwe die ghy gesien hebt vanden woude opstaen, ende brullen, ende totten Arent spreken, ende hem straffen om zijn ongherechticheyt,

* 4.Es. 11.d.37

32

Is de wint, die Godt heeft gehouden tot hen ende tot haer boosheyt tot int eynde, die salse straffen, ende haer verscueren.

33

Want hy salse leuendich voor dat oordeel stellen ende salse straffen:

34

^* Want dat ouerblijuende mijn volc sal hy met elende lossen, die behouden zijn ouer mijn eynden, ende sal haer vrolijc maken, tot dat den dach des oordeels comen sal, van welc ic v int begintsel geseyt hebbe.

* Apo. 7.c.14.

35

Dat is den droom die ghy ghesien hebt, ende dat is de wtlegginge.

36

V heeft alleen Godt daer toe geordineert, dat hy v de heymelijcheyt des Alderhoochsten geopenbaert heeft:

37

Ende daerom schrijft dit alle dat ghy gesien hebt, in een boeck, ende verberget:

38

Ende leeret den wijsen int volc, der welcker herte sulcke heymelijcheyt begrijpen ende behouden mach.

39

^† Maer wacht ghy noch ander seuen dagen, op dat v getoont werde, wat v dan God toonen wil:

† 4.Esd. 9.c.23

40

⁺ Ende met dien is hi van my ghegaen. Ende na dien dat al het volck verstondt, dat de seuen dagen geleden waren, ende dat ic niet in de Stadt ghecomen en was, doen hebben sy hen alle in de Stadt vergadert, cleyn ende groot, hooch ende neder, ende dat volc quam tot my, ende sprac:

+ E vers 40

41

Wat hebben wy v gedaen, ende waermede hebben wy v vergramt, dat ghy ons verlaet ende hier op dese plaetse woont?

42

V alleen hebben wy wt allen volcken, ghelijck als een druyue vanden wijngaert, ende als een keersse in eenen duysteren hoec, ende als eenen Oeuer ende Schip dat den onweder ontloopen is.

43

En hebben wy niet anders onghelucx ghenoech [dan] wanneer ghi ons verlaet?

44

Waert ons niet beter dat wy met Sion waren verbrant?

45

Wy en zijn doch niet beter dan die vergaen zijn, ende bitterlijc geweent hebben.

46

Doen antwoorde ic hen, ende sprac: Israel weest mannelijc, ende ghi huys Iacobs en verscrickt v niet:

47

Want de Alderhoochste heeft uwer gedacht, ende de Stercke en heeft v niet vergheten inder aenuechtinge.

48

Want ick en heb v niet verlaten, ic en ben van v niet geweken, maer op dese plaetse ben ick gecomen, op dat ic voor de ellendicheyt Sions soude bidden, ende dat ic bermherticheit soude soeken voor de vernederinge uwer heyliginghe:

49

Ende daerom soo gaet ghy henen een yegelijc in zijn huys, ende na dien dagen wil ic tot v comen.

50

Doen is dat volck henen getogen in de stadt, so ick hen geheeten heb,

51

Maer ick bleef int velt seuen dagen, so my de Engel beuolen had,^* ende ick at alleen vanden bloemen des velts, ende vanden cruyden at ick den seluen dach.

* 4.Es. 9.c.24. 2.Ma. 5.d.27