Den Bibel, Inhoudende dat Oude ende Nieuwe Testament (Biestkensbijbel)

¶ Dat .xj. Capittel.

¶ Hier wert eenen anderen droom ende verschijninghe beschreuen.

1

⁺ DOen hebbe ic^† eenen droom gesien. Vander zee is eenen^* Arent op geulogen, die hadde twaelf vlueghelen, ende drie hoofden,

+ A vers 1

† Danie. 7.a.1.

* Ezec. 1.b.10. 10.b.14. 17 a.3 Danie. 7.a.4

2

Sijn vlueghelen strecte hy ouer alle de Aerde, ende alle de winden waeyden in haer, ende si werden weder te samen gedaen:

3

Vanden vederen werden ander cleyne vederen:

4

Ende de hoofden waren rustende, dat middel hooft was grooter dan de ander, doch rustet oock metten anderen.

5

Voort sach ic, dat de Arent met sinen vlueghelen vlooch, ende regeerde opter Aerden, ende ouer alle die opter Aerden woonden.

6

Alle dingen onder den Hemel waren hem onderworpen, niemant en

[p. 170v]

was hem wederspannich, Ia niet een Creature opten Aertbodem.

7

Voort sach ick, hoe de Arent op stont, op zijn clauwen, ende gaf eenen voys metten vederen, ende een stemme die luyde alsoo:

8

Ghy en sult niet alle met malcanderen waken, een yegelijck sal slapen op zijn plaetse, ende waken eenen tijt:

9

Maer de hoofden werden int laetste behouden.

10

Maer ick sach dat de stemme niet van zijnen hoofde wt en ghinc, maer van het midden zijns lichaems.

11

⁺ De ander vederen die daer tegen waren, telde ick, dier waren acht.

+ B vers 11

12

Ende vander rechter sijden stont een veder op, ende regeerde ouer alle de Aerde.

13

Ende het is gheschiet, als sy gheregeert hadde, so is haer dat eynde ghecomen, ende haer plaetse en is niet verschenen. Doen is de nagaende opgestaen, ende heeft gheregeert, die heeft eenen langen tijt ghehadt:

14

Ende doen sy gheregeert hadde, doen is oock haer eynde gecomen, als dat voorgaende, so dat si nergens meer verschenen en is.

15

Doen isser een stemme tot haer ghecomen, ende heeft gheseyt:

16

Hoort, ghy die soo lange dat Aertrijc inghehouden hebt, dit segge ic v eer dat ghy ophout te zijn:

17

Niemant en sal na v uwen tijt inhouden, Ia niet den haluen tijt.

18

Doen hief haer de derde op, ende regeerde als de voorgaende, ende en was oock niet meer.

19

Alsoo ginct met alle de ander na malcanderen dat een yegelijck regeerde, ende niet meer en was.

20

Doen sprack ick, ende siet: In die tijt sullen de nauolgende vederen opgerecht worden op der rechter zijden, dat si ooc regeren souden, ende sommige wt die regeerden ooc: Maer terstont en werden si niet meer ghesien:

21

Want sommighe wt hen werden opghericht, doch en regeerden si niet.

22

⁺ Na dien sach ick, doen en waren de twelf vederen niet meer daer, ende de twee vluegelen,

+ C vers 22

23

Ende daer en was niet meer aen het lichaem des Arents, dan twee hoofden, die rusteden, ende ses vederkens.

24

Doen sach ic voort, dat de ses vederkens in tween ghedeylt werden, ende bleuen onder dat hooft dat ter rechter zijden was:

25

Want de vier bleuen op haer plaetse. Doen sach ic, dat die onder de vluegelen waren, haer onderwonden op te rechten, ende te regeren.

26

Doen isser een opgerecht: Maer so haest en was si nerghens meer.

27

Ende de ander waren snelder daer henen dan de eerste.

28

Doen hebben de twee ooc bi haer seluen gedacht te regeren:

29

Ende doen si dat dachten: Doen is dat een vanden rustenden hoofden ontwaect, namelijc, dat groote ende dat middelste.

30

Ende doen sach ic, dat twee hoofden met hem veruult waren,

31

Ende dat hooft is bekeert geworden metten genen die by hem waren, ende verslinde de twee onderste vlueghelen, die geregeert wilden hebben.

32

⁺ Maer dat hooft verschricte dat geheel Aertrijc, ende regeerde opter Aerden, ouer die, die opter Aerden met veel arbeyts woonden, ende had ghewelt ouer den Aertbodem, ouer alle vlueghelen die daer geweest waren.

+ D vers 32

33

Na dien sach ick dat dat middelste hooft snellijc nergens meer en was: Als ooc de vluegelen.

34

Doen quamen de twee hoofden, die regeerden ooc op Aerden: Ende ouer die, die opter Aerden woonden.

35

Doen sach ic, hoe dat hooft opter rechter zijden dat opter slincker zijden verslinde,

36

Ende hoorde een stemme, die sprac tot my: Siet voor v, ende merct wat ghy siet.

37

Doen sach ick, ende nemet waer,^† als eenen Leeuwe, die daer brullet, haestelijck vanden woude loopende, ende liet een stemme eens menscen wt totten Arent,

† 4.esd. 12.d.31

38

Ende sprack: Hoort ghy, ick wil tot v spreken, ende de Alderhoochste salt v segghen:

39

En zijt ghy niet, dat, ouerwonnen hebt vanden vier dieren, die ick hadde doen regeren opter Aerden, ende in mijn woudt, ende dat door haer quame dat eynde haerder tijt?

40

^+* Ende de vierde quam, ende verwan alle dieren, die voorghegaen waren, ende heeft gewelt ouer de Werelt gehadt met grooten verschricken, ende den geheelen Aertbodem met schandelijcken arbeyt, ende heeft soo veel tijts de Aerde bewoont met bedroch,

+ E vers 40

* Danie. 7.b.7.

41

Ende heeft de Aerde gheoordeelt ende gericht, niet met trouwe.

42

Want ghy hebt de saechtmoedige beswaert, den rustenden ende stillen ghewont: Ghy hebt lief ghehadt de Luegenaers, ende hebt der geender wooninge die vrucht brachten, gebroken: Ende hebt der gheender mueren ter neder gheworpen, die v geen schade ghedaen en hebben.

43

Daeromme is uwe onbermherticheyt ende smaet totten Alderhoochsten ghecomen, ende uwe hooueerdicheyt totten stercken:

44

Ende de Hoochste heeft aengesien den hoouaerdighen tijt, ende siet, sy zijn gheeynt, ende haer lasteren zijn veruult.

45

Ende daerom ghy Arent en verschijnt niet meer, ende uwe grouwelijcke vluegelen, ende uwe boose vederen, ende uwe scalcachtighe hoofden ende uwe schandelijcke clauwen, ende alle v gheheel ydel lichaem:

46

Waer mede de Aerde weder verquict worde, ende haer weder verhale, als sy ontledicht is van uwen gewelde, op dat si verhopen mach oordeel ende bermherticheyt, des, diese ghemaect heeft.