Den Bibel, Inhoudende dat Oude ende Nieuwe Testament (Biestkensbijbel)

¶ Dat .ix. Capittel.

¶ Teeckenen des toecomenden tijts ende straffinghe Gods. Esdre gheschien oock openbaringhen.

1

⁺ DOen sprac hy tot my: Meet neerstich den tijt in haer seluen, wanneer ghy sien sult, dat een deel der Teekenen geschieden die ic v voorseyt hebbe,

+ A vers 1

2

So sult ghy wel verstaen dattet dien tijt is, daer de Alderhoochste de Werelt, die van hem gemaect is, besoecken wil,

3

^† Ende alsmen inde Werelt sal sien Aertbeuinghen, ende oproeren des volcx,

† 4.Esd. 13.c.31 Mat. 24.a.7

4

Soo sult ghy wel verstaen, dat de Alderhoochste van dien dingen gesproken heeft, van dien dagen die voor v geweest zijn.

5

Want in gelijcker wijse, dat alle het gene dat inder Werelt gemaect is, een begin ende een eynde heeft, ende dat eynde is openbaer:

6

Also hebben ooc de tijden des Hoochsten openbare beghintselen in teekenen ende wonderen, maer de eynden in werckinge ende teeckenen.

7

Een yegelijc die behouden wort, ende die door zijne wercken ontulieden mach,^† ende door dat gelooue, in welcke ghy gelooft hebt,

† Mar. 16.b.16 Ioan. 3.c.16.e 36. 6.e.47. 11.c.25.

8

Die sal behouden zijn vande geseyde perijckelen, ende sal sien mijn salicheyt in mijnen Lande ende Lantpalen: Want ic hebbe my vander werelt geheylicht.

9

Ende dan sullen worden ontfermt die mijne weghen misbruyckt hebben, ende die mijnen wech versteken ende veracht hebben^* die sullen in de pijne woonen.

* Apoc. 14.b.11

10

⁺ Want die int leuen weldaet ontfangen^* ende my niet gekent en hebben,

+ B vers 10

* 2.Tess. 1.b.8.

11

Ende die een verdriet van mijne wet ghehadt hebben,^* doen sy noch vrijheyt hadden,

* Rom. 2.a.5.

12

Doen sy noch plaetse hadden der beteringhe ende des wederkeerens, ende doen zijt niet en verstonden, maer verachten,^† die moetent na de doot in de pijne bekennen.

† Sap. 5.a.6.

13

Ende daerom en weest ghy niet voorder sorchuuldich, hoe de godloose gepijnicht, ende hoe de gerechtige salich werden, ende de welcke de werelt sy, om welcker wille de werelt, ende wiens sy is.

14

Doen sprac ic:^* Ick heb voor ghesproken, ende spreke als nv, ick sal oock voort aen spreken,

* 4.Es. 8.a.1.

15

Dat der geender^† veel meer zijn die verdoemt zijn, dan die salich worden,

† Mat. 7.b.13. 20.b.16. 22.b.14. 1.Pet. 4.c.18.

16

Gelijc dan de vloedt grooter is dan de druppelen. Doen sprack hy tot my:

17

Ghelijck dat velt is, alsoo is oock dat saet: Alsoo de bloemen zijn, also zijn ooc de colueren: Gelijc de boer is, also is ooc de bouwinge: Want het was den tijt der werelt.

18

Ende doen ic toebereyde den ghenen die nv zijn, eer de werelt was in welck sy woonen souden, doen en wedersprac my niemant.

19

⁺ Want tot dier tijt was een yegelijc, ende ooc nv de schepper inde bereyde werelt, ende de maendt die niet op en houdt, ende de wet die niet doorghegrondeert en mach werden, haer seden zijn verstoort.

+ C vers 19

20

Ende ick hebbe de Werelt doormerct, ende siet daer was een perijckel om der gedachten wille die in haer waren comen.

21

Ende ick hebt ghesien, ende heb haer vast doorsien, ende hebbe my dat wijnbesiken van der druyuen behouden,^† ende een plantinge van veel gheslachten.

† Psal. 80.a.9. Esa. 5.a.1. Iere. 2.c.18.

22

Soo verderue nv de menichte die sonder oorsake gewassen is, ende mijn druiue ende wijnbesie worde behouden, mijn plantinghe: Want ick hebse met grooten arbeyt wtgedruct.

23

^† Maer ist dat ghy v noch seuen ander daghen begeeft: Doch en sult ghy niet vasten,

† 4.Esd. 5.b.13 6.c.31.

24

Ende gaet dan op dat velt der bloemen daer geen huys getimmert en is^† ende eet alleen vander bloemen des velts, ende en proeft geen vleesch, drinct geenen wijn, maer eet alleen bloemen.

† 4.Es. 12.e.51.

25

Biddet den Alderhoochsten sonder ophouden, so wil ic comen ende met v spreken.

[p. 169v]

26

⁺ Doen ginck ick henen ende quam op dat velt dat Ardath heet, soo hy my beuolen hadde, ende sat in de bloemen, ende adt vanden cruyden des velts, ende de selue spijse heeft my versaet.

+ D vers 26

27

Na seuen daghen sat ic op dat gras, ende mijn herte was swaermoedich als te voren,

28

Ende ic dede mijnen mont op, ende beghost te spreken voor den Alderhoochsten, ende sprac:

29

O HEERE ghy die v ons vertoont^* ghy hebt v geopenbaert ende geopent onse vaders in de woestijne, in een plaetse daer niemandt en woondt, in eenen onuruchtbaren hoec, doen sy wt Egipten trocken, ende hebt gheseyt:

* Exo. 19.d.18. 24.a.10. Deut. 4.b.11.

30

Israel hoort ghy my, ende ghy saet Iacobs luystert op mijn redene.

31

Nemet waer, Ick saeye mijn Wet in v, ende sy sal in v vrucht brengen, ende ghy sult eewelijck daer in eerlijc worden.

32

^† Want onse vaders, die de Wet ontfinghen^* en hebbense niet gehouden ende uwe seden ende gebruyckingen en hebben sy niet gehouden, ende de vrucht ws wets en is nyet openbaer gheworden: Want si en mocht niet, want si was uwe.

† Exod. 20.a.1.

* Ioan. 7.b.19. Act. 7.g.53. 15 b.10.

33

^† Want diese ontfangen hadden die verdoruen, doen si niet en hielden dat in hen ghesaeyt was.

† Exo. 32.f.35. Num. 14. 16.

34

⁺ Het is een ghewoonte wanneer dat Aertrijck dat saet ontfangt, oft de See een Schip, oft een vat spijse ende dranc, dat waer dat verderft oft gebroken wort, daer in men gesaeyt heeft, oft daer in datmen yet gedaen heeft,

+ E vers 34

35

Dat oock de dinghen verderuen, ende breken die daer in gesaeyt oft ghedaen zijn. Ende het is ymmers alsoo gheschiet:

36

Want wy die de Wet ontfangen hebben zijn in sonden verdoruen, ende ons herte, dat de Wet ontfangen heeft:

37

^† Maer de Wet en is niet verdoruen noch vergaen, maer is gebleuen in haren arbeyt.

† Esa. 40.a.8. 2.Tit. 2.b.19.

38

Ende doen ic dit also in mijnder herten ouerleyde, soo sach ic om met mijnen oogen, ende op der rechter side sach ick^* een wijf, die was seer truerich, ende voerde een groote clage, sy weende met luyder stemmen, haer cleederen waren ghescuert, ende asschen hadde sy op haer hooft.

* 4.Es. 10.d.41

39

⁺ Doen liet ick mijne gedachten, in welcke ick was gheuaren, ende keerde my tot haer, ende sprac:

+ F vers 39

40

Waerom weent ghy? Ende waerom zijt ghy soo truerich ende ongemoet? Doen sprac sy tot my:

41

Heere, laet my weenen ende truerich zijn, want ic ben seer becommert.

42

Ick sprac tot haer: Wat gebreect v, oft wie heuet v gedaen? Segghet my doch. Sy sprac:

43

Ick ben onuruchtbaer ende sonder baren geweest, ic hebbe eenen Man dertich Iaren ghehadt.

44

Ende de dertich Iaren en doe ick niet anders, dach ende nacht ende alle vren dan bidden den Alderhoochsten.

45

Na dertich Iaren heeft my uwe dienersse, Godt verhoort, heeft mijne ellende aengesien, ende mijn benautheyt, ende heeft mij eenen sone ghegheuen daer ouer heb ick groote vruecht ontfangen, ick, mijn Man, ende alle gebueren, ende wy eerden vast seere den Stercken,

46

Ende ick heb hem met sueren arbeyt opghebracht:

47

Doen hy nv opwies, ende tot den tijt quam dat hy een wijf nemen soude, so hebbe ic een maeltijt toebereyt.