Den Bibel, Inhoudende dat Oude ende Nieuwe Testament (Biestkensbijbel)

¶ Dat .iij. Capittel.

¶ Esdras verhaelt de hooghe wercken Godts, die Godt sinen volcke oyt ende oyt bewesen heeft, ende heeft eenen vriendelijcken twist met Godt, dat hy de Babylonische ouer haer laet heerschappen, daer si doch oock Sondaers zijn.

1

⁺ INt dertichste Iaer des vals der stadt was ick tot Babilon, ende lach becommert op mijn bedde, ende menigerley ghedachten quamen my in mijn herte,

+ A vers 1

2

Want ick sach de verwoestheyt Sions, ende den oueruloet der geender die tot Babilon woonden:

3

Ende mijn verstant is my machtich beweecht gheworden, so dat ick begost tot den Hoochsten vreesachtighe woorden te spreken, ende seyde:

4

O heerschappende HEERE, ghy hebt vanden beghinne gesproken,^† doen ghy dat Aertrijck gheplant hebt, (ende dat alleen) ende hebt den volcke gheboden,

† Genesis. 1.a.1

5

Ende hebt^* Adam een lichaem ghegheuen, die was een maecsel uwer handen, ende hebt hem ingheblasen eenen gheest des leuens, soo dat hy voor v dat leuen heeft ghehadt,

* Genes. 2.a.7.

6

Ende hebt hem int Paradijs ghedaen, welcken Lusthof uwe rechter hant gheplant heeft, eer dat Aertrijcke was:

7

Ende ghy hebt hem beuolen uwen wech te beminnen,^* dien heeft hy ouertreden:^† Ende soo haest hebt ghy den doot in hem gheschickt, ende in sinen gheslachte. Van hem zijn comen volcken ende stammen, ende geslachten, der welcker gheen ghetal en is.

* Genes. 3.a.6.

† Rom. 5.b.12

8

^* Ende een yeghelijck volck heeft in sinen wille gheleeft, ende hebben wonder voor v ghedaen: Vwe geboden hebben si veracht.

* Genes. 6.b.12

9

^+† Doen hebt ghy metter tijt de Diluuie ouer alle die laten comen die inder werelt waren, ende hebtse verdoruen ende te niet ghebracht:

+ B vers 9

† Gene. 7.b.11. Sapi. 10.a.4 Luce. 17.c.27.

10

Ende also in Adam den doot is, also is in dese de diluuie gheweest.

11

Maer eenen wt hen hebdy laten ouerblijuen^* namelijc Noe met sinen huysgesinne, van welcke alle gherechtige comen.

* Genes. 6. 7. 8.

12

Maer doen de Inwoonders der Aerden begosten te vermenichfuldigen, veel kinderen vercreghen, ende groote volcken worden, soo begosten si godlooser te worden dan de eerste.

13

^* Gelijc si nv alle, also booslijc voor v leefden,^† so hebt ghi v eenen man wt alle dien wtgelesen, die hiet Abram,

* Sapi. 10.a.5.

† Genes. 12. 15.

14

Dien hebt ghy bemint, ende hem uwen wille getoont,

15

^* Ende met hem een eewich verbont gemaect, hem toegeseyt, dat ghy zijnen sade nemmermeer verlaten en wilt.

* Gen. 17.b.9.

16

^† Ghy hebt hem gegeuen Isaac,^* den Isaac Iacob ende Esau.^† Maer Iacob hebt ghy v bysonder vercoren, ende hebt hem seer vermeert.

† Gen. 21.a.2.

* Gen. 25.c.25

† Gen. 32.

17

Ende doen ghy zijn nacomelingen wt Egipten leydet,^† so hebt ghijse op den Berch Syna gheleyt.

† Exod. 19.a.1. Deu. 4.b.10.

18

Ghy hebt den Hemel gebogen, ende dat Aertrijc ghestelt, den Aertbodem beefde, den afgront hebdy doen beuen, ende de werelt verschrict:

19

Ende uwe heerlijcheyt is door vier vyerige poorten ghegaen, ende aertbeuinghe, ende winden ende coude, op dat ghy den sade Iacobs de Wet geuen sout, ende den geslachte Israels neersticheyt.

20

⁺ Ende ghy en hebt van hen niet ghenomen dat boosachtich herte, als dat uwe Wet in hen, vreese brengen soude.

+ C vers 20

21

Want den eersten Adam heeft een boosachtich herte gedragen,^* heeft ouertreden, ende is verwonnen geworden, ia ooc alle die van hem geboren zijn.

* Gen. 3.a.6.

22

Also is de swacheyt metter Wet in dat herte des volcx, met de boosheyt der wortelen, ende dat goed is omgeuallen, ende dat quaet is bleuen.

23

Also zijn de tijden verloopen, ende de iaren geeyndet.^† Doen hebt ghy v eenen dienaer met namen, Dauid, verwect,

† 1.Re. 16.c.13. 2.Re. 5.a.2.

24

Ghy hebt hem beuolen een stadt te timmeren in uwen Naem, datmen v daer in wieroock ende offerhande op offeren soude, dat is nv veel Iaren gheschiet.

25

^+* Doen hebben de Inwoonders der seluer stadt v verlaten,

+ D vers 25

* 3.Re. 12.e.30. 16.e.26.

26

Ende hebben in allen dingen ghedaen als Adam ende alle menschen: Want sy hebben ooc een boosachtich herte gehadt.

27

^† Doen hebt ghy de stadt inde handen uwer Vianden ghegheuen.

† 4.Re. 25.a.4 2.Par. 36.a.6

28

Sijn nv die tot Babilonien beter ende gerechtiger dan v volc, dat sy daerom souden ouer Sion heerschappen?

29

Want also ic daer ben gecomen, ende haer godloos wesen gesien hebbe, ende soo veel boosheyts, die niemant tellen en mochte, ia doen ick dat int dertichste iaer ghesien hadde, Doen is my mijn hert ontuallen:

30

Want ic heb^† ghesien hoe dat ghi verdroecht alsulck een godloosheyt, ende ouersiet hen als sy onrecht doen: Maer v volck hebt ghy wtgheroeyt, ende uwe Vianden laten blijuen, ende ghi en hebt my dat niet te verstaen ghegheuen.

† Iob. 21.a.7. Psal. 73.a.2. Iere. 10.a.1. Aba. 1.c.13.

31

⁺ Ick en can my niet versinnen hoe dattet toegaet. Doen dan die tot Babilonien beter dan die tot Sion?

+ E vers 31

32

^* Oft isser ergens een ander volc dat ic kenne, dan v volck Israel?

* Iere. 10.d.25.

33

Oft welcke gheslachten hebben oyt v verbont ghelooft, als Iacob? Ende haren loon en is doch nergens voorhanden, ende haren arbeyt en heeft gheen vrucht. Want ick hebbe door de Heydenen ghins ende weder ghewandelt, so sie ick dat sy rijcke ende wel hebbende zijn, ende die en volgen uwe geboden niet na.

34

Nv so weecht onse boosheyt op een waghe, ende daer teghen der gheender die

[p. 165v]

inder werelt woonen, so en wort uwen Naem nergens gheuonden dan in Israel.

35

Oft waer isser een volck op Aerden dat niet voor v gesondicht en heeft? Oft welck volck heeft uwe gheboden alsoo ghehouden?

36

So sult ghy vinden dat Israel uwe geboden ende Wet ghehouden heeft, ende de ander volcken ende de Heydenen niet.