Den Bibel, Inhoudende dat Oude ende Nieuwe Testament (Biestkensbijbel)

¶ Dat .vij. Capittel.

¶ De wederstaenders worden versaecht, ende en beletten dat volck niet meer aen haer werck. Also wort dat werck des Tempels volbracht ende opghemaect, ende heerlijck ghewijdt, oock dat Passah ghehouden.

1

⁺ DOen waren^† Sysennes den Ondervoocht in Celosyria ende Phenicia, ende ander Landtsheeren ende haer mede gesellen gehoorsaem, het gene dat Darius bekent hadde,

+ A vers 1

† 2.Esd. 6.c.18.

2

Hielden neerstich aen dat heylighe werck, ende waren medehulpers metten ouden Voorstanders der Ioden.

3

Ende alsoo ghinck dat werck des Heylichdoms spoedelijck ende gheluckich vander hant, also Haggeus ende Sacharias propheteerden.

4

Ende volbrachten alle dinghen door dat ghebot des HEEren des Gods Israels, ende wt den raetslach Cyri, Darij, ende Artaxersis de Coningen in Persia.

5

⁺ Ende alsoo^† wert onse huys volmaect, tot op den drientwintichsten dach des maents Adar, int seste Iaer des Conincx Darij.

+ B vers 5

† Ioan. 2.c.20.

6

Ende de kinderen Israels, de Priesters ende Leuiten, ende de ander die wter geuanckenisse ghecomen waren, ende die daer toegedaen zijn, deden na het gene dat inden boeck Mosi ghescreuen is.

7

Ende si hebben op des Tempels wijinghe geoffert hondert Osschen, twee hondert Rammen, vier hondert Lammeren,

8

Ende twaelf Bocken voor de sonde des gantschen volcx Israels, na het ghetal der Stammen Israels.

9

Ende de Priesters ende Leuiten stonden gecleet met Priesterlijcken ghewade, na de geslachten, ouer alle de wercken des HEEren des Godts Israels, na dat boeck Mosi, ende de Poortiers by alle dueren.

10

⁺ Ende de kinderen Israels met alle den genen die wter gheuanckenisse gecomen waren, hebben dat Passah ghehouden op den veerthiensten dach der eerster Maent, als de Priesters ende Leuiten gheheylicht waren.

+ C vers 10

11

Die wter gheuanckenisse gecomen waren, die en werden niet alle met malcanderen gheheylicht: Maer de Leuiten werden met malcanderen geheylicht,

12

Ende also hebben alle die wter geuanckenisse gecomen waren, dat Paeschlam geslagen, haren Broederen, de Priesters ende haer seluen.

13

Ende de kinderen Israels die wter geuanckenisse quamen, die ouer gebleuen waren van alle de onreynicheden der Heydenen, sochten den HEEre,

14

Ende hielden dat Feest der ongesuerder brooden seuen dagen lanck, aten ende droncken, ende waren vrolijc voor den HEEre,

15

[Om] dat de HEEre den Raetslach des Conincx in Assyrien ghekeert hadde, ende haer handen totten wercke des HEEREN Gods Israels ghesterct hadde.