Den Bibel, Inhoudende dat Oude ende Nieuwe Testament (Biestkensbijbel)

¶ Dat .vj. Capittel.

¶ Vanden wederstant der Voochden in Syria, die met gescriften aen Darium dat werck onderstonden te beletten. Maer Darius beueelt dattet by den woorde Syri soude blijuen.

1

⁺ MAer^* int tweede Iaer des Conincrijcx Darij, heeft Haggeus ende Sacharias de soon Addo ghepropheteert in Iudea ende Ierusalem, inden Naem des Godts Israels ouer haer.

+ A vers 1

* Hagge. 1.a.1. 1.Esdre. 5.a.1

2

Doen stont^† Serubabel de soon Sealtiel, ende Iehoschua de soon Iosedek, ende begonden te timmeren dat huys des HEEREN tot Ierusalem, doen hen holpen de Propheten des HEEren.

† 3.Esd. 4.b.13 5.e.79

3

Op den seluen tijt quam tot hen Sysennes de Ondervoocht in Syria ende Phenicien, ooc zijn Lantsheeren ende zijn ghesellen, ende spraken tot hen:

4

Wie heeft v geheeten ende beuolen dat huys te timmeren? Dat dack ende alle dinck weder te maken? Ende wie zijn de Timmerlieden die dit timmeren?

5

Maer de Ouders die wter gheuanckenisse gecomen waren, hadden de ghenade vanden HEEre, dat si haer niet en lieten verschricken (hoe wel dat si so aengeuochten werden)

6

Timmerden voort ende voort, tot datmen den Coninc Dario dat alle te weten dede, ende een antwoorde van hem ontfinc.

7

Ende den Brief, die si totten Coninc Dario screuen, luyde also:⁺ Sysennes de ondervoocht in Syrien ende Phenicien: Ende de Lantsheeren met haren gesellen, die in Syria ende Phenicia voochden zijn, ontbieden den Coninck Dario onse vriendelijcke groete.

+ B vers 7

8

Condt ende kennelijck doen wy onsen Heere den Coninc, hoe dat wy gecomen zijn in dat Iootsche Lant, ende zijn gegaen tot Ierusalem:

9

Daer hebben wy gheuonden, dat si dat groote huys Gods timmerden, ende den Tempel met groote costelijcke gehouwen steenen, ooc met costelijck hout totten wanden,

10

Ende haesten seer metten wercke, helpen malcanderen, ende het gaet hen gheluckelijc vander hant, ende wort met grooter vlijdt, ende groote verchieringe ghemaect.

11

Doen hebben wy den Ouders gheuraecht: Wie dat haer dat huys ende dat werck heeft heeten maken:

12

Ende dat hebben wy daerom ghedaen: Dat wy v der geender namen, die den wercke voorghestelt zijn, eygentlijck mochten te kennen gheuen, ende schrijuen.

13

Doen hebben si ons dese antwoorde gegeuen: Wy zijn dienaers des HEEren,^* die Hemel ende Aerde ghemaeckt heeft:

* Genesis. 1.a.1 Psa. 146.a.6

14

^† Ende dit huys wort voortijden vanden grooten ende machtigen Coningen Israels getimmert ende opgerecht.

† 3.Reg. 6.a.1

15

Mer doen onse vaders God vergramden, ende si tegen den God Israels sondichden,^* so gaf hy haer in dat gewelt Nebuchodonosors des Conincx tot Babilonien, des Conincx der Chaldeen,

* 4.Reg. 24. 25.

16

Die braken ende verbranden dat Huys, ende voerden dat volck gheuanghen in Babilonien.

17

^+† In het eerste Iaer doen Cyrus de Coninc tot Babylon regeerde, doen heeft Cyrus brieuen laten wtgaen, ende beuolen dit huys weder te timmeren,

+ C vers 17

† 1.Esd. 5.e.47

18

Ende heeft alle de vaten, die NebucadNezar van Ierusalem tot Babilonien geuoert heeft, ende sinen Tempel toegheechent, wederom gegeuen, ende heeftse ouergheleuert Serubabel ende Salmanaser den ondervoocht,

19

Ende heeft hen gheboden, dat sy de selue vaten weder tot Ierusalem inden Tempel doen souden, ende dat si van die tijt aen den Tempel begonden weder te timmeren op zijn plaetse.

20

Doen leyde Salmanaser dat fondament aent huys des HEEREN tot Ierusalem: Ende vanden seluen tijt aen hebben si daer aen ghetimmert, ende en is noch niet volmaeckt.

21

Ende daerom, O Coninck, duncket v goet, so soecke men in des Conincx Cyri Liberie ende brieuen,

22

Ende vintmen dan dattet met raetslach

[p. 161v]

ende verwillinge des Conincx Cyri gheschiet is, ende duncket onsen Heere den Coninc goet te wesen, soo laetmen ons sulcx weten.

23

^+* Doen heeft Darius de Coninc beuolen datmen de Liberie doorsoecke. Doen heeftmen tot^† Egbathanis in een stedeken in Media alsulcken gescrift geuonden.

+ D vers 23

* 1.Esd. 6.a.1. 3.esd. 4.c.47

† Iudith. 1.a.1

24

Int eerste Iaer des Rijcx Cyri, heeft Cyrus gheboden, datmen dat huys des HEEren tot Ierusalem weder timmere, op datmen aldaer den HEEre sonder ophouden soude roocken.

25

Namelijc, zijn hoochde sal wesen thien elleboghen, zijn wijde tsestich ellebogen, ende viercant met drie gehouwen steenen, ende met eenen solder vanden houte des seluen Lants, ende eenen nieuwen solder: Ooc soudemen de costen geuen vanden huyse des Conincx Cyri.

26

Ooc de gulden ende silueren vaten, die NebucadNezar wt den huyse des HEEren tot Ierusalem ghenomen hadde, die soudemen weder inden Tempel doen tot Ierusalem, daer si te voren waren.

27

Oock en sullen Sysennes den Ondervoocht in Syrien ende Phenicien, de Vorsten ende haer medegesellen, ende ander die in Cyria ende Phenicia geordineert zijn, haerder plaetsen niet aennemen noch onderwinden.

28

⁺ Ick Cyrus hebbe oock gheboden datmen dat huys des HEEren gheheel sal timmeren, ende hebbe bestelt dat si den ghenen, die wter gheuanckenisse gecomen zijn, helpen sullen, tot dat dat huys des HEEren volmaeckt worde:

+ E vers 28

29

Sullen oock hen vanden chijns ende schattinge, diemen in Syria ende Phenicia iaerlijcx op lecht, een bysonder summe gheuen, totten Offer des HEEren, ende dat sal ouergeleuert worden, Serubabel den voocht,

30

Dat hy daer mede bestelle, Ossen, Rammen, Lammeren, ooc Coren, Sout, Wijn ende Olie, ende dat voort en voort Iaerlijcx, nae sulcx als de Priesters die tot Ierusalem zijn, voorgeuen, ende na datmen daghelijcx ghebruyct,^* dat salmen henlieden sonder vertreck gheuen,

* 1.Esd. 6.b.9.

31

Waer mede si dagelijcx offerhanden sullen offeren den hoochsten Godt, voor den Coninck ende voor zijn dienaers, ende voor haer leuen bidden.

32

Het sal ouer al vercondicht worden, dat een yeghelijck die sulck ghebodt des Conincx ouertreedt oft veracht, aen een galghe (die van sinen goede ghemaect is) ghehanghen sal worden, ende alle zijn goet sal den Coninck veruallen zijn.

33

Ende daerom so wille ooc de HEEre, wiens Name daer aengheroepen wort, wtroeden ende verderuen alle Coninghen ende volcken, die haer met ghewelt souden onderstaen sulcx te beletten, oft dat huys des HEEren tot Ierusalem te beswaren.

34

Ic Darius hebbe bekent, dat dit neerstelijck nae gheuolcht werde.