Den Bibel, Inhoudende dat Oude ende Nieuwe Testament (Biestkensbijbel)

¶ Dat .iij. Capittel.

¶ Van de maeltijt die Darius toemaecte, ende van de drie, der welcker een yeghelijck dat wijste raden wilde.

1

⁺ DE Coninck Darius^† maeckte een groote maeltijt sinen dienaren, ende alle zijn Hof,

+ A vers 1

† 1.Hest. 1.a.3.

2

Oock alle Officiers van Medien ende Persen, ooc alle Voochden ende Voorstanders, die onder hem waren, van Iudia aen tot in Etiophien, hondert ende seuenentwintich Landen.

3

Als si nv gheten ende ghedroncken hadden, ende ooc wel versaet weder thuys keerden, so ghinc Darius de Coninck in zijn Camer, ende leyde hem slapen: Ende daer na ontwaecte hi weder.

4

Doen hebben de drie Iongelingen, die des Conincx bewarende knechten waren, ende zijns lijfs wachten, met malcanderen ghesproken:

5

Een yegelijc van ons sal wat seggen, ende welcx reden de wijste ende voornaemste is, dien sal de Coninc Darius groote gauen gheuen,

6

⁺ Ende hem met Purpur becleeden, ende sal hem gulden drincvaten geuen, gulden gewaet ende decsel: Hy sal hem eenen costelijcken wagen maken, ende eenen gulden toom, een sneeu witte Huyue op setten, eenen gulden rinc om sinen hals,

+ B vers 6

7

Ende hy sal de naeste ende voornaemste zijn naest den Coninc Dario, ende dat om zijnder wijsheydt wille. Oock sal hy een vrient des Conincx ghenoemt werden.

8

Doen heeft een yegelijc zijn meyninghe gheschreuen, ende gheopenbaert, ende hebbent onder des Conincx Cussen gheleyt, ende ghesproken:

9

Als de Coninck opstaet, so willen wy hem ons gescriften geuen: Ende wie de Coninc ende zijn opperste macht seyt, dat hy de wijste reden gesproken heeft, die heuet gewonnen:

10

De een hadde ghescreuen: Sterck is den Wijn:

11

De ander: De Coninck is stercker.

12

De derde: De Wijuen zijn stercker, Maer de waerheyt ouerwint die alle.

13

⁺ Als nv de Coninck opghestaen was, hebben de drie haer gescriften genomen, ende die den Coninc gegeuen, ende hy heeftse ghelesen.

+ C vers 13

14

Doen heeft hy wtgesonden, ende laten roepen alle zijn opperste macht, alle Voochden ende Voorstanders der Landen Medien ende Persen,

15

Ende als si inden raet geseten zijn, so heeftmen haer gheschriften voor hen ouerlesen.

16

Ende hy heeft de Ionghelinghen heeten roe-pen, dat si haer meyninghe metten monde selue souden openbaren. Doen si nv gheroepen worden, ende binnen quamen,

17

Sprack de Coninck tot hen: Bewijst ons, ende gheeft ons te kennen, wat dat sy dat ghy geschreuen hebt. Doen begonde de eerste, die van de stercte des Wijns ghesproken hadde, ende sprack:

18

^* O ghy mannen, de Wijn is treffelijck sterck, ende ouerweldicht allen die hem drincken,

* Prou. 20.a.1. Genes. 9.c.21. Ephesi. 5.b.18

19

Hy verleyt dat verstant, ende maect dat de armen ende Coningen dwaes ende brootdroncken werden.⁺ Also doet hy ooc met den eyghen man, ende met den vrijen, ende met den Armen ende Rijcken:

+ D vers 19

20

Hy neemt henlieden alle verstant, ende maectse sorgeloos ende vrolijc, so dat haerder geen noch op trueren, noch om schult oft plicht en ghedenckt:

21

Hy maeckt oock dat de mensche meynt, wat hy voor hem neemt, dattet eerlijck sy ende recht, ende en ghedenct niet dat hy een Coninc is, niet dat hi een Ouerste is, ende dat hem sulcx niet en betaemt.

22

De menschen vergheten oock, wanneer si drincken alle vrientscap, alle broederlijcke trouwe ende liefde, terstont als si drincken, crijghen si dat sweert, ende willen vechten:

23

Ende als si vanden Wijn neder geleyt zijn, ende weder opstaen, en weten si niet wat si gedaen hebben.

24

Nv oordeelt ghi oft niet de Wijn de stercste en sy. Wandt wie wilde anders alsulcke dingen voornemen te doen? Ende doen hy dit wtghesproken hadde, heeft hy ghesweghen.