Den Bibel, Inhoudende dat Oude ende Nieuwe Testament (Biestkensbijbel)

¶ Een schoon aendachtich ghebet Manasse, des Conincx Iuda, als hy te Babylon geuanghen lach.

1

⁺ O HEERE Almachtige^† Godt onser Vaderen Abraham, Isaac ende Iacob, ende haers Rechtuaerdighen Saets:

+ A vers 1

† Exodi. 3.b.6. Mat. 22.d.32.

2

^* Ghy die Hemel ende Aerde, met alle dat daer in is, ghemaect hebt.

* Genesis. 1.a.1 Psa. 146.a.6 Acto. 4.c.24. 14.c.14. 17.d.24. Apoc. 14.b.7.

3

^‡ Ende hebt de zee beseghelt met uwen gebode, ende hebt de diepte besloten, ende beseghelt, tot eere ws verschrickelijcken ende heerlijcken Naems:

‡ Gene. 1.a.9. Iob. 26.b.10. Prou. 8.c.29. Ierem. 5.d.21.

4

So dat een yegelijc moet voor v verschricken,^* ende hem vreesen voor uwe groote macht:

* Esaie. 2.b.10

5

Want uwen toorne is onuerdraechlijc, den welcken ghi de Sondaers dreycht: Maer^† onwtsprekelijc is de barmherticheyt uwer beloften:

† Exo. 20.a.6.

6

Wandt ghy zijt de HEEre, de Alderhoochste ouer dat gantsce Aertrijc,^‡ lancmoedich, van grooter goetheyt, ende seer genadich, ende en straft de Lieden niet geerne, ende hebt na uwe goetheyt belooft,^* boete tot vergeuinge der sonden.

‡ Exod. 34.a.6 Psal. 86.a.5. 145.a.8. Iohel. 2.c.13. Ione. 4.a.2.

* Luce. 24.d.46. Acto. 2.e.38.

7

Maer nademael dat ghy zijt, een God der Rechtuaerdigen, so en hebt ghy sulcke boete niet gheset den Rechtuaerdigen^† Abraham,^‡ Isaac ende^* Iacob, die teghen v niet ghesondicht en hebben.

† Gene. 15. 17. 22.

‡ Gen. 26.a.6

* Gen. 28.b.13

8

^† Maer ick hebbe gesondicht, ende mijne sonde is meerder, dan dat Sandt aen de zee is.^‡ Ende ic ben ghebogen in sware ijseren banden, ende en hebbe gheen ruste.

† 4.Re. 21.a.2

‡ 2.Pa. 33.c.11.

9

Daerom dat ic uwen toorne verwect hebbe, ende groot quaet voor v ghedaen, daer mede, dat ic sulcke grouwelijcheden ende so veel erghernisse, aengericht hebbe.

10

Daerom buyge ic nv de knien mijns herten, ende bidde v HEEre om genade:

11

^* Och HEEre ic hebbe ghesondicht, Iae ghesondicht heb ick,^† ende bekenne mijne misdaet.

* Psalm. 51.a.6

† Psal. 31.a.5. Iob. 13.b.15.

12

So bidde ick v nv ende begheere vierichlijck, vergheuet my O HEERE, vergeuet my,

13

En laet my niet in mijne sonden verderuen, ende en laet de straffe niet eewichlijc op my blijuen.

14

Maer wilt doch my onweerdighe helpen, nae uwe groote barmherticheyt.^* So wil ic v altijt louen, alle mijn leuen lanck:

* Esaie. 38.d.20 Luce. 1.f.69.

15

Wandt v louet alle dat Hemelsche heyr, ende v salmen prijsen altijt ende eewichlijck, Amen.