Den Bibel, Inhoudende dat Oude ende Nieuwe Testament (Biestkensbijbel)

[p. 157r]

¶ Vanden Draeck te Babel.

1

⁺ OP die selue plaetse was ooc eenen groten^† Draeck, den welcken die van Babel aenbaden.

+ A vers 1

† Roma. 1.c.23.

2

Ende de Coninc sprac tot Daniel: Hoe? wilt ghy nv van desen ooc seggen, dat hy niet anders dan eenen metalen Afgod en is? Siet, hy leeft doch, want hy eet ende drinct, ende ghy en cont niet seggen, dattet geen leuendich God en is, daerom so bidt hem aen.

3

Maer Daniel antwoorde,^* Ic wil den HEEre mijnen Godt aenbidden, want die,^† is de leuendige God.

* Deut. 6.c.13.

† Iere. 10.b.10

4

Maer ghi Heer Coninc, geeft my oorlof, so wil ic desen Draec dooden, sonder eenich sweert oft stock. Ende de Coninc sprac: Ia, Ic geue v oorlof.

5

Doen nam Daniel pec, vet, ende hayr, ende soyt dat tsamen, ende maecte daer Coecxkens af, ende wierpse den Draec inden hals. Ende den draec berst midden ontwee. Ende Daniel sprac: Siet, dat zijn uwe Goden.

6

Doen nv die van Babel sulcx hoorden, soo verdroot haer seer, ende maecten eenen oploop teghen den Coninc, ende spraken: Onse Coninc is een Iode geworden,^* want hy heeft Bel vernielt ende den Draec gedoot, ende de Priesters om gebracht.

* Bel. c.21.

7

Ende si traden voor den Coninc, ende spraken:^† Geeft ons Daniel herwaerts, en doet ghijt niet, soo willen wy v ende v geheele huys ombrengen.

† 1.Reg. 11.d.12.

8

Als nv de Coninc sach, datse met ghewelt op hem drongen, so moeste hi haer Daniel ouer geuen.

9

⁺ Ende si^† wierpen hem by de Leeuwen inden Cuyl, daer lach hy ses dagen in.

+ B vers 9

† Dani. 6.c.16.

10

Ende daer waren seuen Leeuwen inden Cuyl, die gafmen dagelijcx twee menscen ende twee scapen.

11

Maer in dese dagen, en gafmen haer niet met allen, op datse Daniel eten souden.

12

Maer daer was een Propheet Habacuc, in Iudea, dese had eenen Brij gesoden, ende broot ghesneden, in een diepe Schotel, ende ginc daer mede op dat velt, op dat hijt den Mayers soude brengen.

13

Ende de Engel des HEEren sprack tot Habacuc: Ghy moet dat eten, dat ghy draecht, Daniel brengen te Babel, in der Leeuwen Cuyl.

14

Ende Habacuc antwoorde: HEEre, Ic en heb de Stadt Babel noyt ghesien, ende en weet niet, waer dat den Cuyl is.

15

Doen^* vatte hem de Enghel bouen by dat hayr, ende voerde hem ghelijck als eenen stercken wint, te Babel aenden Cuyl.

* Ezech. 8.a.3.

16

Ende Habacuc riep, ende sprack: Daniel, Daniel, Neemt dat eten, dat v Godt gesonden heeft.

17

Ende Daniel sprac: HEEre God, ghy gedenct ymmers aen my,^* ende en verlaet de gene niet, die v aenroepen, ende v lief hebben.

* Psal. 37.d.25. Ecclesi. 2.b.12

18

Ende hy stont op, ende adt. Maer de Engel Godts bracht Habacuc terstont wederom op zijn plaetse.

19

^† Ende de Coninc quam op den seuenden dach, om Rou te dragen, ouer Daniel, Ende als hy aenden Cuyl quam, ende daer in sach, Siet, doen sadt Daniel midden onder de Leeuwen

† Dani. 6.d.19.

20

Ende de Coninck riep luyde, ende sprac: O HEEre ghy God Danielis, ghy zijt een groot Godt,^* ende daer en is geen ander God meer, dan ghi alleen.

* Deut. 32.f.39.

21

^† Ende hi liet hem wt den Cuyl nemen.^‡ Mer de ander, die hem wouden ter doot gebracht hebben,^* die liet hy inden Cuyl werpen. Ende si werden also terstont voor sinen oogen, van de Leeuwen verslonden.

† Iere. 38.b.10.

‡ Dan. 6.e.24

* 1.hes. 7.b.10 Susan. h.62. Psal. 7.b.16. 9.c.16. Eccle. 28.a.2. Eccle. 10.a.4. Dani. 6.e.24.