Den Bibel, Inhoudende dat Oude ende Nieuwe Testament (Biestkensbijbel)

Vanden Bel te Babel.

1

⁺ NA de doot Astiagis quam dat Conincrijc aen Cyrum wt Persia. Ende^† Daniel was altoos by den Coninck, ende eerlijcker gehouden, dan alle vrienden des Conincx.

+ A vers 1

† Dan. 6.e.28.

2

Nv hadden die van Babylon eenen Afgodt, die hiet^† Bel, den seluen moestmen daghelijcx offeren, twelf molder terwen, ende veertich Schapen, ende drie Aem wijns.

† Esa. 45.c.26. Iere. 50.a.2. 51 g.44.

3

Ende de Coninc diende den Afgodt selue, ende ghinc dagelijcx af om dien aen te bidden.^* Maer Daniel badt zijnen Godt aen.

* Dani. 6.b.10.

4

Ende de Coninck sprac tot hem: Waerom en bidt ghy den Bel oock niet aen? Maer hy sprac: Ick en diene de Afgoden niet, die met den handen ghemaect zijn,^† Maer den leuendigen Godt, die^* Hemel ende Aerde gemaect heeft, ende een HEERE is ouer al wat daer leeft.

† Deut. 6.c.13. 1.Reg. 7.a.3. Mat. 4.b.10.

* Psalm. 146 a.6. Acto. 14.c.14 Apoc. 14.b.7

5

Doen sprack de Coninck tot hem: En hout ghy Bel dan niet voor eenen leuendigen Godt? Siet ghy niet, hoe veel dat hy daghelijcx eet ende drinct?

6

Maer Daniel loech, ende sprac: Heer Coninck, en laet v niet verleyden: Want desen Bel en is binnen niet dan Leem, ende buyten metael,^* ende en heeft noch noyt yet geten.

* Eccle. 30.c.19.

7

⁺ Doen wert de Coninc toornich, ende liet alle zijn Priesters voor hem comen, ende sprac: Ist sake dat ghi my niet en segt, wie dat desen Offer verteert, so sult ghy steruen:

+ B vers 7

8

Maer cont ghy dat bewijsen, dat Bel sulcx verteert, so sal Daniel steruen,^† want hy heeft den Bel ghelastert. Ende Daniel sprack: Ia heer Coninck, het geschie also, gelijc ghy ghesproken hebt.

† Leui. 24.c.14

9

Maer daer waren tseuentich Priesters des Bels, behaluen hare vrouwen ende kinderen. Ende de Coninc ginc met Daniel inden Tempel des Bels.

10

Doen spraken de Priesters des seluen [Bels] Siet, wy willen wt gaen, ende ghy Heer Coninc sult de Spijse ende den dranc, selue daer henen setten, ende de duere nae v toe sluyten, ende met uwen eygen Rinc toe segelen.

11

Ende als ghy des morgens vroech weder coemt, ende beuint, dattet Bel niet altemael verteert en heeft, soo willen wy gheerne steruen, Oft Daniel sal ghedoot werden, die sulcx op ons ghelogen heeft.

12

Maer si verlieten haer daer op, datse eenen heymelijcken ganc, onder de Tafel gemaect hadden, door den seluen gingen si altoos daer in,^† ende verteerden al wat daer was.

† Baru. 6.d.27

13

Doen nv de Priesters wt waren, so liet de Coninc den Bel, de Spijse voorsetten. Mer Daniel beual sine knechten, datse Asschen halen souden, ende lietse stroyen door den gheheelen Tempel, in teghenwoordicheydt des Conincx. Daer na gingen si wt, ende sloten de dueren toe, ende besegheldense met des Conincx rinck, ende gingen daer af.

14

Maer de Priesters gingen des nachts daer in, nae hare ghewoonte, met haren vrouwen ende kinderen, aten ende droncken wt al wat daer was.

15

⁺ Ende des morgens seer vroech was de Coninc op, ende Daniel met hem.

+ C vers 15

16

Ende de Coninck sprack: Is den Seghel ooc ongequetst? Maer hy antwoorde: Ia, heer Coninc.

17

Ende terstont als de duere op ghedaen was, so sach de Coninck op de Tafel, ende riep met luyder stemmen: Bel. ghy zijt een groot Godt, ende het en is gheen bedroch met v.

18

Maer Daniel lachte, ende hiel den Coninck, op dat hy daer niet voort in en ghinck, ende sprack: Siet op de Aerde, ende merct wiens voetstappen dat dit zijn?

19

De Coninck sprack: Ick sie wel voetstappen van Mannen, Vrouwen ende Kinderen.

20

Doen werdt de Coninck toornich, ende liet de Priesters vangen, met haren Vrouwen ende kinderen. Ende si moesten hem wijsen de heymelijcke weghen, daer si door wt ende in waren ghegaen, ende verteert hadden, al wat op de Tafel was.

21

Ende de Coninc lietse dooden, ende gaf Daniel den Bel in zijn gewelt.^† Die vernielde hem ende zijnen Tempel.

† Ierem. 50.a.2. 51.g.44.