Den Bibel, Inhoudende dat Oude ende Nieuwe Testament (Biestkensbijbel)

Den Lofsanck der drie Mannen in dat Vyer.

DOen hieuen de drie aen met malcanderen te singen: Sy presen ende loefden Godt inden Ouen, ende spraken:

50

Gelouet zijt ghy HEEre, de Godt onser vaderen, ende ghy moet ghepresen, ende hooch beroemt werden eewichlijc. Geloeft sy dijnen heerlijcken ende heyligen Naem: Ende moet ghepresen ende hooch beroemt werden eewichlijck.

51

Gheloeft zijt ghy in uwen Heyligen heerlijcken Tempel, ende moet ghepresen ende beroemt werden eewichlijck.

52

Gheloeft zijt ghy,^* ghy die sit op den Cherubim, ende siet inde diepte, ende moet ghepresen ende hooch beroemt werden eewichlijck.

* Psal. 80.a.2. 99.a.1.

53

Gheloeft zijt ghy op uwen heerlijcken Conincklijcken^† Stoel, ende moet ghepresen ende hooch beroemt werden eewichlijck.

† Esa. 66.a.1.

54

Gheloeft zijt ghy inde stercte des He-

[p. 155v]

mels, ende moet ghepresen ende hooch beroemt werden eewichlijck.

55

^* Alle wercken des HEEren, moeten louen den HEERE, ende hem prijsen ende beroemen eewichlijck.

* Psa. 145.b.10

56

^† Ghy Hemelen loeft den HEERE, prijst ende beroemt hem eewichlijck.

† Psal. 69.e.35. 148.a.1.

57

Loeft den HEERE^‡ ghy Enghelen des HEEREN, prijst ende beroemt hem eewelijck.

‡ Psal. 103.c.20. 148.a.2.

58

^* Alle wateren daer bouen aenden Hemel loeft den HEERE, prijst ende beroemt hem eewichlijck.

* Psa. 148.a.4

59

Alle heyrscharen des HEEren, loeft den HEERE, prijst ende beroemt hem eewichlijck.

60

^† Sonne ende Maen loeft den HEERE, prijst ende beroemt hem eewichlijc.

† Psal. 148.a.3

61

Alle Sterren aenden Hemel loeft den HEERE, prijst ende beroemt hem eewichlijck.

62

Regen ende Dauwe loeft den HEERE, prijst ende beroemt hem eewichlijc.

63

Alle Winden loeft den HEERE, prijst ende beroemt hem eewichlijck.

64

Vyer ende Hitte loeft den HEEre, prijst ende beroemt hem eewichlijck.

65

Coude ende Somer loeft den HEEre, prijst ende beroemt hem eewichlijck.

66

^‡ Storm ende Hagel loeft den HEEre, prijst ende beroemt hem eewichlijck.

‡ Psal. 148.b.8

67

Dach ende Nacht loeft den HEEre, prijst ende beroemt hem eewichlijck.

68

Licht ende Duysternisse loeft den HEEre, prijst ende beroemt hem eewichlijck.

69

Iis ende Vorst loeft den HEERE, prijst ende beroemt hem eewichlijck.

70

Rijm ende^* Sneeu loeft den HEEre, prijst ende beroemt hem eewichlijck.

* Psal. 148.b.8

71

Blixem ende Wolcken loeft den HEEre, prijst ende beroemt hem eewichlijck.

72

Aerde loeft den HEEre, prijst ende beroemt hem eewichlijck.

73

^† Bergen ende cleyne Bergen loeft den HEEre, prijst ende beroemt hem eewichlijc.

† Psal. 148.b.9

74

Al wat wt der Aerden wast, loeft den HEEre, prijst ende beroemt hem eewichlijck.

75

Ghy Fonteynen loeft den HEEre, prijst ende beroemt hem eewichlijck.

76

De See ende de Waterstromen, loeft den HEEre, prijst ende beroemt hem eewichlijc.

77

^‡ Ghy Waluisschen, ende al wat hem int water geneert, loeft den HEERE, prijst ende beroemt hem eewichlijck.

‡ Psal. 148.a.7

78

Alle Vogelen onder den Hemel, loeft den HEERE, prijst ende beroemt hem eewichlijck.

79

Alle wilde Dieren ende Beesten loeft den HEEre, prijst ende beroemt hem eewichlijc.

80

Ghy menschen kinderen loeft den HEEre, prijst ende beroemt hem eewichlijck.

81

Israel loeft den HEEre, prijst ende beroemt hem eewichlijck.

82

Ghi Priesters des HEEren loeft den HEEre, prijst ende beroemt hem eewichlijc.

83

^* Ghy knechten des HEEren loeft den HEEre, prijst ende beroemt hem eewichlijc.

* Psal. 134.a.1.

84

Ghy Geesten ende Sielen der Rechtueerdigen loeft den HEERE, prijst ende beroemt hem eewichlijck.

85

Ghy Heyligen, ghy die elendich ende bedroeft zijt, loeft den HEERE, prijst ende beroemt hem eewichlijck.

86

^‡ Anania, Asaria, ende Misael, loeft den HEERE, prijst ende beroemt hem eewichlijck. Want hy heeft ons verlost wt der Hellen, ende heeft ons geholpen vanden doot. Ende heeft ons verlost wt den gloyenden Ouen, ende heeft ons midden in dat vyer behouden.

‡ Dan. 1.b.6.

87

^* Danct den HEERE, want hy is vriendelijck, ende zijne goedertierenheyt duert eewichlijck.

* Psal. 106.a.1. 107.a.1. 118.a.1. 136.a.1.

88

Alle die den HEERE vreesen^† loeft den Godt alder goden, prijst hem ende beroemt dat zijne goetheyt eewichlijck duert.

† Deu. 10.d.17 Dan. 2.g.47. 12.a.1. Psal. 136.a.1.