Den Bibel, Inhoudende dat Oude ende Nieuwe Testament (Biestkensbijbel)

¶ Dat Ghebet Asarie, Danielis .iij. wt den Griecschen.

24

ENde Azaria stont^† midden inden gloeyenden Ouen, ende dede zijnen mont op, ende badt, ende sprack:

† Dan. 3.d.23.

25

^† Gelouet zijt ghi HEEre, de Godt onser Vaderen, ende uwen Name moet ghepresen ende geeert werden eewichlijck:

† 3.Re. 8.b.15.

26

^† Want ghy zijt rechtueerdich in allen [dingen] die ghy ons ghedaen hebt. Alle uwe wercken zijn volcomen. Ende wat ghy doet dat is recht, ende alle uwe oordeelen zijn onstraffelijc.

† Tren. 1.d.18. Baruch. 1.d.15. 2.b.6.

27

^† Ghy doet ons recht dat ghy ons gheordeelt hebt met sulcke straffe die ghy ouer ons hebt laten gaen,^* ende ouer Ierusalem, de heylige Stadt onser vaderen, Ia ghy doet recht ende wel daer aen, om onser sonden wil.

† Dan. 9.a.7.

* 4.Regum. 25

28

^† Want wy hebben gesondicht ende quaet gedaen, daer mede dat wy van v af geweken zijn, ende ouer al tegen v gedaen hebben,

† Psal. 106.a.6 Iudit. 7.c.20. Tren. 3.d.42. Baru. 2.b.12.

29

Ende uwe geboden niet gehoorsaem, noch die niet geacht en hebben, dat wy daer na deden, als ghy ons beuolen hebt, op dattet ons wel gaen soude.

30

Daerom hebt ghy recht ghedaen, dat ghy sulcx altemael ouer ons hebt laten gaen, ende ons ghegheuen in de handen onser vianden,

31

Der godloosen boose lieden, ende den onrechtueerdigen ende grouwelijcksten Coninc op Aerden.

32

Ende wy en doruen onsen mont niet op doen, so zijn wy te schanden ende tot spot geworden voor uwe knechten, ende voor alle de gene, die v vreesen.

33

Maer en verstoot ons doch euenwel niet geheel, om ws heiligen Naems wille, ende en verworpt v verbont niet,

34

Ende en neemt uwe bermherticheyt niet van ons, om Abraham ws lieuen vrients wille, ende dijns knechts Isaac ende Israel dijns Heyligen.

35

^† Den welcken ghy beloeft hebt, haer Saet te vermeerderen, ghelijck als de Sterren aenden Hemel, ende als dat sant aen de See.

† Gen. 15.a.5. 22.c.17. 26.a.4. 28.c.14.

36

Want wy zijn weyniger geworden dan alle Heydenen, ende zijn nv de alder verachste op Aerden, om onser sonden wil:

37

^† Also dat wy nv geenen Vorst, Propheet, noch Leeraer, noch Brantoffer, noch dagelijcxen Offer, noch Spijsoffer, noch Roocwerc meer en hebben, Ende en hebben geen plaetse, daer wy voor v offeren, ende genade vinden mochten:

† 2.Par. 15.a.3. Hosee. 3.a.4.

38

Maer met een bedroeft herte ende vernederden geest, comen wy voor v, alleleens als brochten wy brantoffer van Rammen ende Runderen, ende veel duysent vette Schapen.

39

Alsoo^† wilt doch onsen Offer heden voor v gelden, ende aengenaem zijn laten:^† Want ghy en laet die niet te schanden werden, die so op v^‡ betrouwen.

† Sap. 3.a.6.

† Psal. 25.a.3. Eccl. 2.b.12.

‡ Iere. 17.b.7 Psal. 2.b.12.

40

Alsoo comen wy nv met gheheelder herten, ende soecken v aensicht met vreesen,

41

Daerom en laet ons niet te schanden werden, Maer doet ons HEEre na uwe genade, ende na uwe groote bermherticheyt,

42

Ende verlost ons na uwe wonderdaden, ende geeft dijnen Name de Eere,

43

Dat haer schamen moeten, alle die uwen Knechten leet doen, ende te schanden werden, voor uwe groote macht ende gewelt, ende hare macht verstoort werde,

44

Op dat sy vernemen dat ghy de HEEre zijt^† de eenige Godt, heerlijc op dat geheel Aertrijck.

† Deu. 32.f.39. Esa. 43.b.10. 45.a.5.

45

Ende de Dienaers des Conincx, diese inden ouen geworpen hadden, en hielden niet op, ende wierpen altoos toe, solfer ende pec, ende heye, ende drooge rijsen,

46

So dat de vlamme bouen wt den Ouen sloech, by negenenveertich ellen hooch,

47

Ende at om hem,^† ende verbrande de Chaldeen, de welcke het afreycken conde voor den Ouen.

† Dan. 3.d.22. 3.mac. r.187.s.201. Dan. 6.e.24. Susan. h.62. Psal. 7.b.16.

48

Maer de Engel des HEEren ginc met den genen, die by Azaria waren inden Ouen: Ende stiet de vlamme des viers wt den Ouen,

49

Ende maectet inden Ouen, gelijc eenen coelen dauwe^† so dat haer dat vier niet eens en aenroerde, noch en brande, oft schade en dede.

† Esa. 43.a.2. Psal. 66.b.12