Den Bibel, Inhoudende dat Oude ende Nieuwe Testament (Biestkensbijbel)

¶ Dat .iiij. Capittel.

1

⁺ ENde op den derden dach^* leyde sy hare daghelijcxe cleederen af,^† ende trock haer Coninclijcke Cieraet aen, ende was seer schoon ende riep Godt den Salichmaker aen,^* die alle dinghen siet, Ende nam twee Maechden met haer, ende leende haer properlijck op die eene, Maer die ander volchde haer, ende droech haer den sleyp nae van haren Rock.

+ A vers 1

* Iudit. 10.a.1.

† 1.Hest. 5.a.1

* 2.Par. 16.b.9 Psalm. 33.b.13 Prou. 15.a.3. Eccle. 23.d.27. 2.Mac. 9.a.5. Hebre. 4.c.13

2

Ende haer aensicht was seer schoon, lieflijck ende vrolijc ghestelt. Maer haer herte was vol angsten ende sorghen.

3

Ende als si door alle de dueren in quam, soo tradt si teghen den Coninck ouer,^† daer hi sat op sinen Coninclijcken Stoel, in sine Coninclijcke cleederen, die van Goudt ende Edel ghesteenten waren, ende was verschrickelijck aen te sien.

† Iudit. 10.d.17

4

⁺ Doen hy nv de ooghen op hief, ende sachse toornichlijck aen: So wert de Coninghinne seer bleeck, ende sanck [neder] in een onmachticheyt, ende leyde dat hooft op de Maghet.

+ B vers 4

5

^* Doen veranderde God den Coninc zijn hert tot goetheydt, ende hem werdt banghe voor haer, ende spranc van sinen Stoel, ende omgreepse met sinen armen, tot datse weder by haer seluen quam.

* 3.Mac. o.152. Prou. 21.a.1.

6

Ende sprackse vriendelijck aen: Wat is v Esther? Ic ben v Broeder, en vreest v niet, Ghy en sult niet steruen:

7

^* Want dit ghebot gaet alle anderen aen, maer v niet, coemt slechs herwaerts.

* 1.Hest. 3.c.12.

8

^† Ende hy hief den gulden Scepter op, ende leyden op hare schouderen, ende custese, ende sprack: Spreect op.

† 1.Hest. 5.a.2.

9

Ende si antwoorde: Doen ick v aen sach, soo docht my, Ick sach eenen^† Enghel Godts. Daerom verschrickte ick voor uwe groote Maiesteyt,

† Gene. 33.b.10. 2.Reg. 19.c.27

10

Wandt ghy zijt seer verschrickelijck, ende uwe ghestaltenisse is gheheel heerlijck.

11

Ende als si soo sprack, soo sonck sy wederom in een onmachticheydt, ende viel daer neder.

12

Maer de Coninck verschricte met alle sine Dienaers, ende troostense.