Den Bibel, Inhoudende dat Oude ende Nieuwe Testament (Biestkensbijbel)

¶ Dat .iij. Capittel.

1

⁺ ENde^† de Coninginne Esther keerde haer ooc tot den HEERE in sulcken doots strijt,

+ A vers 1

† 1.Hes. 4.c.16

2

Ende leyde haer Coninclijcke Cleederen af, ende troc droefcleederen aen, ende voor dat edele Water ende Balsem^† stroydese Asschen ende stof op haer hooft, ende verootmoedichde haer lijf met vasten. Ende op alle de plaetsen, daer sy te voren vrolijck gheweest was, daer ructese haer hayr wt, ende badt tot den Godt Israels, ende sprac:

† Iudit. 9.a.1.

3

HEERE,

[p. 154r]

ghy die alleen onse Coninc zijt, helpt my Elendige:

4

Ick en heb gheenen anderen hulper, dan v alleen, ende den noot is voor handen.

5

Ick hebbe van mijnen vader gehoort, HEERE, dat ghy^* Israel wt alle Heydenen wtgecoren, ende onse vaderen van outs her, tot een eewige Erue aengenomen, ende hebt haer gehouden, wat ghy haer beloeft hebt.

* Deu. 4.c.20. 7.b.6. 10.c.15. 32.a.9. Iere. 51.d.19.

6

^+† Wy hebben voor v ghesondicht, daer om hebt ghy ons ouergegeuen in onser vianden handen.

+ B vers 6

† Iere. 22.c.28 Tob. 3.a.4. Dan. 9.a.7.

7

HEEre, ghy zijt rechtueerdich, want wy hebben hare goden gheeert.

8

Maer nv en latense haer daer aen niet genoegen, datse ons in groot bedwanck houden,^† maer hare ouerwinninge scrijuense oock haren Afgoden toe.

† Dan. 5.a.4. 3.Mac. l.122.

9

Ende willen uwe Beloeftenisse te niet maken, ende v Erue wtroyen, ende den mont der ghenen, die v louen, toe stoppen, ende die eere ws Tempels ende Altaers vernielen.

10

Ende den Heydenen de mont op doen, om de macht der Afgoden te prijsen, ende eewelijck eenen sterflijcken Coninck te beroemen.

11

⁺ O HEERE, en geeft uwen Scepter den genen niet, die niet en zijn, op datse onsen iammer niet en bespotten. Maer keert haer voornemen ouer haer, ende teeckent den ghenen, die dat teghen ons aenghericht heeft.

+ C vers 11

12

Gedenct aen ons HEERE, ende openbaert v in onsen noot, ende sterct mi HEERE, ghy Coninc alder Goden ende Heerschappien.

13

^† Leert my hoe dat ick voor den Leeuwe spreken sal, ende bekeert zijn herte, dat hy op onsen vianden toornich wert, op dat die selue met zijnen aenhanc vernielt wert.

† Exod. 4.c.11. Ierem. 1.a.6.

14

Ende verlost ons door uwe handt, ende helpt my uwe Maget, die gheen ander hulpe en heeft, dan v HEERE alleen^* ghi die alle dinc weet.

* Ioan. 16.d.30 21.c.17.

15

Ende weet, dat ick geen vruechde en hebbe, aen de Eere, die ick by den godloosen heb: Oock gheenen lust, aen der Heydenschen ende Vreemden vrijnghe.

16

⁺ Ghy weet dat ick het doen moet, ende dat ick niet en achte den heerlijcken Cieraet, die ick op mijn hooft draghe, wanneer ick Staet voeren moet, Maer dat ick die houde, ghelijc als eenen onreynen doeck, ende en draghe hem niet, wanneer dat ick den Staet niet en behoeue te voeren.

+ D vers 16

17

Oock en heb ick nemmermeer met Haman gegeten, noch vruechde ghehadt, by den Coninclijcken^* Disch, noch gedronken vanden offer wijn.

* Tafel

18

Ende uwe Maget en heeft noch nemmermeer vruechde ghehadt, vanden tijt aen, dat ick hier toe gebracht ben, tot op desen tijt, sonder aen v alleen HEEre, ghy Godt Abrahams,

19

Verhoort de stemme der genen die verlaten zijn, ghy stercke Godt bouen alle: Ende verlost ons vander godloosen handt, ende verlost my wt mijnen nooden.