Den Bibel, Inhoudende dat Oude ende Nieuwe Testament (Biestkensbijbel)

¶ Dat .ij. Capittel.

1

⁺ ENde Mardocheus badt tot den HEERE, ende vertelde zijne wonderlijcke wercken,

+ A vers 1

2

Ende sprack: HEERE Godt^* ghy zijt de Almachtige Coninc. Alle dinc staet in uwe macht^* ende uwen wille en can niemant tegenstaen als ghi Israel helpen wilt.

* Eccl. 1.b.7.

* Iudit. 16.c.18

3

^† Ghy hebt Hemel ende Aerde ghemaect, ende al wat daer in is.

† Gen. 1.a.1. Psa. 146.a.6 Acto. 14.c.14 Apoc. 14.b.7

4

Ghy zijt alder dingen HEERE,^* ende niemant en can v tegenstaen,

* 2.Par. 20.a.6.

5

Ghy weet alle dinc, ende hebbet ghesien, dat ic wt gheen hertneckicheyt noch hooueerdicheyt, den stouten Haman^† niet en heb willen aenbidden:

† 1.Hest. 3.a.5

6

Want ic ware wel bereet, alst tot Israels profijt ware, oock zijne voeten ghewillichlijc te cussen.

7

Maer ic hebt gedaen wt vreesen^* op dat ic niet de Eere, die mijnen Godt toebehoort, eenen Mensche en geue, ende niemant anders en aenbidde, dan alleen mijnen Godt.

* Deu. 6.a.13. Mat. 4.b.10.

8

⁺ Ende nv O HEERE, ghy Coninc ende Godt Abrahams, ontfermt v ouer v volc, want onse vianden willen ons vernielen,^* ende v Erue, dat ghy van begin gehat hebt, wtroyen.

+ B vers 8

* Deut. 4.c.20. 10.c.15. 32.a.9. Iere. 51.d.19.

9

En veracht v hoopken niet,^† dat ghy wt Egypten verlost hebt.

† Exod. 14.g.30.

10

Verhoort mijn ghebet, ende weest v volck genadich, ende verandert onse droeffenisse in blijschap, op dat wy leuen, ende uwen Name prijsen. Ende en laet den mont der ghenen, die v louen, niet vernielen.

11

Ende dat gheheele Israel riep wt alle crachten tot den HEERE, want sy waren in doots nooden.